1 Na yina, ntinu ke yala na ludedomo nyonso.

Na yina me tadila bamfumu, bawu ke twadisa na kusungama nyonso.

2 Muntu-muntu ke vwanda mutindu kiswamunu samu na mupepe,

mutindu kibumbamanu samu na mvula,

mutindu muzumba ke fidisaka maza na bisika ya kuyuma,

mutindu mpewo ya ntadi ya ngolo na ntoto yina ata kima ke menaka.

3 Meso ya bayina ke talaka, ke vwanda dyaka ve mutindu ya mpofo,

makutu ya bayina ke kuwaka, yawu ke kuwa mbote-mbote.

4 Bantu yina ke salaka mambu na nswalu nyonso, bawu ke yindula samu na kuvisa,

bayina ke kekamaka na kutuba, bawu ke banda na kuzonza na pwelele.

5 Ba ke tala dyaka ve kilawu muntindu muntu ya mfunu,

to muntu ya luvunu mutindu muntu ya nene.

6 Ya tsyelika, muntu ya bulawu ke basisaka kaka mambu ya buzoba,

mpe ntima ya yandi ke kanisaka kaka mambu ya yimbi,

yandi ke kukipesaka na mambu ya busafu mpe yandi ke zitisaka ve Yave,

yandi ke yiminaka madya mpe ke bikaka mputu nsatu,

yandi ke pesaka ve kima ya kunwa mpe ke bikaka, bantu na mpwila.

7 Binwanunu ya muntu ya bantima zole kele kidi-kidi.

Yandi ke kubikaka mambu ya yimbi,

samu na kuzimbisa nzila na bantu ya kukuluka,

ata ti mputu kele na luve ya yandi.

8 Kasi muntu ya mfunu ke kubikaka mambu ya mfunu,

yandi ke sadilaka kaka mambu ya mfunu.

9 Beno bakento yina ke na kuzinga na kizunu,

beno telama, beno teka makutu na kuwa mambu ya munu!

Beno bandumba yina ke tulaka kivuvu ya beno na beno mosi,

beno teka makutu na kuwa mambu ya munu!

10 Kaka mvula mosi mpe mwa bilumbu me bikana,

beno ke tekita, beno yina ke tulaka kivuvu ya beno na beno mosi.

Ba ke yonzika dyaka ve bambuma ya vinu

mpe ba ke buka dyaka ve bambuma.

11 Beno yina ke zingaka ya beno na kizunu, beno vwanda na boma!

Beno yina ke tulaka kivuvu ya beno na beno mosi, beno kutekita!

Beno katula binkuti ya beno, beno vwanda ve na binkuti na nzutu,

mpe beno kanga na luketo balele ya kyadi.

12 Ba ke na kuyawula, ba ke na kubula maboko na ntulu.

Ba ke na kubambuka moyo na kitoko ya bilanga

mpe na mutindu bilanga ya bayinti ya vinu ke butaka.

13 Na ntoto ya bantu ya munu,

bayinti ya bansende mpe bansende ke kulaka,

yawu ke fulukaka na bayinzo ya kyese

mpe na bambanza ya nsayi.

14 Samu ti bayinzo ya kitoko me bikana ya mpamba,

makelele ya mbanza ke dyaka ve.

Mongo ya Ofele mpe yinzo ya mutela ya yinda

ke vwanda mutindu bantadi ya bantangu nyonso,

samu na buyenge ya bambuluku ya mfinda,

yina ke kwenda sakana kuna,

mpe samu na bankombo na mameme yina ke kwenda kudya kuna.

15 Tii ntangu yina mpeve ke katuka na zulu mpe ke kwizila beto,

yinsi ya kuyuma ke kuma bilanga ya bayinti ya bambuma

mpe ti bilanga ya bayinti ya bambuma ke kuma mutindu mfinda.

16 Na yina, kusungama ke vwanda na yinsi ya kuyuma,

ludedomo ke vwanda na bilanga ya bayinti ya bambuma.

17 Ludedomo ke pesa kizunu,

ludedomo ke pesa luvundulu

mpe lukengolo na kudingama ya bantangu nyonso.

18 Bantu ya munu ke zinga na ntoto ya kuzuna,

na kati ya bayinzo ya kivuvu,

na bisika ya luvundulu mpe kudingama.

19 Kasi mfinda ke mwangana na mvula ya matadi

mpe mbanza ke kubwa yawu nyonso.

20 Kyese samu na beno!

Beno ke kunda bisika nyonso yina ke na maza, bangombe ya beno,

mpe bambuluku ya beno ke vwanda na lukengolo!