1 Kyadi na nge, nge yina ke mwangisaka, kondwa ba mwangisa nge,

nge yina ke yekulaka bantu, kasi ba me yekulaka ntete nge ve!

Ntangu nge ke manisa na kumwangisa, ba ke mwangisa nge,

ntangu nge ke manisa na kuyekula, ba ke yekula nge.

2 Yave tala beto kyadi!

Beto ke tulaka kivuvu ya beto na nge.

Vwanda ngolo ya beto konso suka

mpe mpulusu ya beto na ntangu ya mpasi!

3 Ntangu bantu ke kuwa makelele ya nzasi, bawu ke kima,

samu ti ntangu nge ke telamaka, bayinsi ke kimaka.

4 Ba ke baka bimvwama yina beno kuzwaka na mvita, ba ke baka yawu,

mutindu ba ke bakaka makonko

mpe ba ke baka yawu na nswalu,

mutindu ba ke bakaka na nswalu na bikanka ya bambele-mbele.

5 Yave kele Nzambi ya Kuzangama,

samu ti yandi ke vwandaka na zulu.

Yandi me fulusa na Siyone,

kusungama mpe ludedomo.

6 Nge ke vwanda na lukengolo bilumbu nyonso ya luzingu ya nge,

ndwenga na luzabu kele kimvwama yina ke vuukisaka,

kuzitisa Nzambi,

yawu kele kimvwama ya nge.

7 Binungi-bamvita ke na kulooka na ngaanda,

binati-nsangu ya kizunu ke na kudila na kyadi nyonso.

8 Bantu kele dyaka ve na babalabala,

bantu ke na kuluta dyaka ve na banzila,

yandi me kufwa ngwisani,

yandi ke na kuvweza bambanza,

yandi ke zitisaka ata muntu mosi ve.

9 Yinsi me kota na kifwidi, yawu kele na kati mpasi.

Yinsi ya Libane me kuma na nsoni

mpe yawu me kawuka,

mudimba yina kele pene-pene ya mubu me kuma mutindu yinsi ya kuyuma,

mudimba ya Basane mpe mongo ya Kaamele ke dyaka ve na makasa ya yawu.

10 Yave ke na kutuba:

Ntangu yayi mu ke sala,

ntangu yayi mu ke telama,

ntangu yayi ke vwanda ya kuzangama.

11 Kivumu yina beno kuzwaka,

yawu kele kaka kivumu ya matiti ya kuyuma,

ntangu yawu ke butuka,

yawu kele kaka mutindu matiti ya bambuma ya faline.

Kiwumunu ya beno,

ke nyengisa beno mutindu tiya.

12 Bantu ya nkaka ke nyenga

mpe bawu ke kuma bombi.

Bawu kele mutindu bintala ya basende

yina ba me zenga mpe ba me tula na tiya.

13 Beno yina kele ntama, beno kuwa yina mu me sala!

Mpe beno yina kele pene-pene, beno zaba ti mu kele na lulendo!

14 Kuna na Siyone, bantu ya masumu me kuma na boma.

Bantu ya yimbi ke na kutekita na boma,

bawu ke na kutuba:

Nani na kati ya beto lenda telama pene-pene ya tiya yina ke kufwaka?

Na kati ya beto, nani lenda vibidila na mantwala ya tiya yina ke kufwaka ve?

15 Kaka ni muntu yina ke tambulaka na ludedomo

mpe ke tubaka na kusungama nyonso,

yandi ke ndimaka ve na kubaka bima yina ba me kuzwa na ngolo,

yandi ke ningisaka maboko ya yandi samu na kumanga madeso ya bana,

yandi ke kangaka makutu ya yandi, samu na kuwa ve mambu ya kufwa muntu,

yandi ke kangaka meso ya yandi samu na kutala ve yimbi,

16 muntu ya mutindu yina, yandi ke zinga na bisika ya kuzangama,

na kati ya bantadi, bisika yina kele mpasi na kukuma, yawu ke vwanda kiswamunu ya yandi,

ba ke pesa yandi madya,

yandi ke kondwa ve maza ya kunwa.

17 Meso ya nge ke tala ntinu na kati ya nkembo ya yandi,

bawu ke tala yinsi na bunene ya yawu nyonso.

18 Nge ke bambuka moyo na mambu yina vwandaka talisa nge boma.

Nge ke tuba na ntima ya nge:

Wapi sika kele kisoniki, wapi sika kele kilokoti-mpaku,

wapi sika kele bantu yina ke kebaka bibaka ya lukengolo?

19 Nge ke tala dyaka ve bantu yayi ya lunangu,

bantu yina ke zonzaka ndinga yina ba lenda kuwa ve,

ndinga ya nzenza yina ata muntu lenda visa.

20 Tala Siyone mbanza ya beto ya mikembo,

meso ya nge ke tala Yelusalemi, kisika ya ngemba,

yinzo ya lele yina ba ke nata dyaka ve kisika ya nkaka,

ba ke katula dyaka ve biko ya yawu,

ba ke nyangula ve basinga ya yawu.

21 Ya tsyelika, ni kuna Yave ke lakisa ti yandi kele mbote mingi,

ya ke vwanda kizunga ya banzadi ya nene

mpe banzadi ya nene, masuwa mosi ve ya mvita ke luta ve kuna,

bamasuwa ya nene ke luta ve kuna.

22 Yave kele zuzi ya beto,

Yave kele twadisa beto,

Yave kele ntinu ya beto,

ni yandi ke kuulaka beto.

23 Basinga ke dyaka ve ya kufyetama,

yawu ke na kusimba dyaka ve dikunzi yina ba ke kangilaka balele ya masuwa,

ba lenda kanga dyaka ve balele ya masuwa,

ni yawu yina, bantu ke kabula bimvwama mingi,

ata bantu ya kufwa makulu mpe ke kota na kubaka bima na ngolo.

24 Muntu mosi ve ya Yelusalemi ke tuba ti: «Mu ke na kubela.»

Bantu yina ke zingaka na Yelusalemi ke kuzwa mulemvo ya masumu ya bawu.