1 Beno kindisa, beno kindisa bantu ya munu.

Ni Nzambi ya beno ke na kutuba.

2 Beno tuba na ntima ya Yelusalemi,

beno zabisa yandi na ndinga ya ngolo ti,

ntangu ya kunwana mvita me manisa,

ba me lemvokila masumu ya yandi nyonso,

samu ti Yave futisaka yandi,

bambala zole kitumbu ya masumu ya yandiKbk 22.3,6,8; Yel 6.18.

3 Ndinga ya muntu ke na kulooka,

na yinsi ya kuyuma:

«Beno yidika nzila samu na Yave!

Beno sungika nzila samu na Nzambi ya beto,

na bisika yina kele ya kukawukaMat 3.3; Mke 1.3; Yne 1.23.

4 Mabenga nyonso ke fuluka na ntoto,

myongo nyonso ya nene mpe ya fyoti ke kuluka!

Banzila ya kutengama ke sungama,

banzila ya mabulu ke yilama.

5 Na yina, nkembo ya Yave ke talana,

bantu nyonso ke tala yawu na mbala mosi.

Ni Yave me tuba yawu.Lke 3.4-6»

6 Muntu mosi tubaka mutindu yayi: «Looka!»

Mu vutulaka: «Yinki mu fwana kutuba?»

Yandi tubaka: «Bantu nyonso kele mutindu matiti,

nkembo ya bawu mutindu bifulu ya matiti.

7 Matiti ke yuma mpe bifulu ke beba,

ntangu mpeve ya Yave ke fulaka na zulu ya yawu.

Ya tsyelika, bantu kele mutindu matiti.

8 Ee, matiti ke yumaka,

bifulu ke bebaka!

Kasi mambu ya Nzambi ya beto

kele ya bantangu nyonso!»

9 Yuluka na zulu ya mongo ya yinda,

mbanza Siyone, nge yina ke na kunata nsangu ya mbote,

looka na ndinga ya ngolo,

Yelusalemi, nge yina ke na kunata nsangu ya mbote,

zonza na ngolo, kuvwanda ve na boma,

tuba na bambanza ya Yuda:

«Beno tala, Nzambi ya beno yandi yayi!

10 Beno tala Yave Nzambi ya beno, yandi ke na kukwiza na lulendo nyonso.

Yandi kele na ngolo samu na kuyala,

yandi ke na difuta ya yandi,

mpe musendo ya yandi ke tekila na mantwala ya yandiLuz 22.12.

11 Yandi kele mutindu muvungi yina ke na kutwadisaka mameme ya yandi,

kaka na kuningisa diboko ya yandi, yandi ke vukisaka bawu kisika mosi,

yandi tulaka bana ya mameme na ntulu ya yandi,

yandi ke twadisaka na malembe, mameme yina ke na kupesaka bana mabene.»

12 Nani tezaka maza ya mubu na kati ya diboko ya yandi?

Nani tezaka bunene ya mazulu na kufungula kaka misapi ya yandi?

Nani tezaka fundu-fundu ya ntoto na kutula yawu na kati ya kantini?

Nani tezaka myongo na bitezolo ya bisengo

mpe myongo ya fyoti na bipezolo.

13 Nani tezaka Mpeve ya Yave?

Nani lenda pesa yandi malongi?

14 Nani Nzambi kwendaka tala samu na kuzwa malongi, samu na kuvisa mambu?

Nani lakisaka yandi nzila ya ludedomo?

Nani longisaka yandi ndwenga?

Nani lakisaka yandi nzila ya mayela?

15 Bantu kele mutindu dibete ya maza, yina ke na kubwa na kantini,

yawu kele mutindu fundu-fundu na zulu ya kipezolo,

bisanga na bizunga yina kele pene-pene ya mubu kele mutindu mwa fundu-fundu yina ke na kukwenda na zulu.

16 Bibulu nyonso ya yinsi ya Libane, kele fyoti samu na kupesa na Yave Munkayulu ya Kuyoka,

mpe bayinti ya yawu nyonso kele fyoti samu na tiya ya kiyokolo ya minkayulu ya Yave.

17 Makanda nyonso ya bantu kele kaka mpamba na mantwala ya yandi,

bawu kele ve na mfunu, bawu kele mutindu kima ya mpamba.

18 Na nani beno lenda fwanikisa Nzambi?

Na wapi kima yina beno lenda fwanikisa yandi?

19 Beto lenda fwanikisa yandi ve na kiteki!

Ni muntu ke pesaka yawu nzutu,

muntu ya nkaka ke pakula yawu wolo,

mpe ke tula yawu mpanga ya palata na laka.

20 Muntu yina kele mputu ya kulutila samu na kupesa munkayulu ya mutindu yina,

ke soola yinti yina ke bolaka ve.

Na manima, yandi ke sosa muntu yina zaba kusala bisalu ya maboko,

yina zaba kuyidika kiteki yina ke vwanda kaka ya kutelama.

21 Beno zaba yawu ve?

Beno kuwaka yawu ve?

Ba zabisaka beno ve mambu yina kubanda na mbandukulu?

Beno me visa ntete ve balufulu ya ntoto?

22 Nzambi ke zingaka kuna na zulu,

na mantwala ya yandi bantu ya ntoto kele mutindu makonko!

Yandi me tanda mazulu mutindu lele,

yandi me yalumuna yawu mutindu yinzo ya lele samu na kuzinga na kati.

23 Yandi ke mwangisaka bamfumu,

yandi ke kumisaka bantwadisi mutindu bantu ya mpamba.

24 Ntama mingi ve ba me soola bawu,

ntama mingi ve ba me vwandisa bawu na kimfumu,

bawu me vwanda ntete mingi ve na kimfumu,

Yave me fula bawu mupepe,

bawu me kawuka mpe kimbongila me nata bawu mutindu dititi ya bambuma.

25 Nzambi ya Longo ke na kutuba:

Na nani beno ke na kufwanikisa munu, samu ti mu vwanda kifwani ya yandi?

26 Beno vumbula yintu na zulu mpe beno tala!

Nani yidikaka bima yina?

Ni yandi basisaka nkonga ya bawu ya binwani na mulonga,

Nzambi ke bokilaka konso mbwetete na nkumbu ya yawu.

Ngolo mpe lulendo ya yandi kele ya mingi,

ntangu yandi ke bokilaka yawu,

ata mbwetete mosi ve ke kondwaka.

27 Yakobi, samu na yinki nge ke na kutuba,

samu na yinki nge Isayeli ke na kutatamana na kutuba ti:

Yave me zaba ve luzingu ya munu ya mbasi,

Yave ke na kutala ve yina me bonga na munu.

28 Nge zaba yawu ve?

Nge kuwaka yawu ve?

Ni Yave Mfumu yidikaka bandilu ya ntoto,

yandi ke lembanaka ata kima, yandi ke lembaka ve,

muntu lenda kota ve na mansweki ya mayela ya yandi.

29 Yandi ke pesaka ngolo na muntu yina me lemba,

yandi ke bwelaka ngolo na muntu yina kele dyaka ve na yawu.

30 Bantwenya ke lembaka mpe bawu ke kondwaka ngolo,

ata bantu yina kele na mvingu mpe ke bulaka mabaku.

31 Kasi bayina ke tulaka kivuvu ya bawu na Yave,

bawu ke kuzwaka dyaka ngolo.

Bawu ke kwendaka na zulu mutindu mbemba,

bawu ke kimaka mbangu kasi bawu ke lembaka ve,

bawu ke tambulaka kasi ngolo ya bawu ke manisaka ve.