1 Beno bisanga, beno vwanda swii samu na kuwa munu!

Bika ti makanda ya bantu kuzwa dyaka ngolo ya bawu,

bawu belama mpe bawu zonza!

Beto kwendeno beto nyonso na lufundusu.

2 Nani me telemisa katuka na esete muntu yina lufundusu ke na kunata?

Nani me yekula bayinsi mpe me kulula bantinu?

Mbele ya yandi ya mvita ke na kumwangisa makanda na mantwala ya yandi,

mpe munani ya yandi ke na kumwangisa bawu mutindu matiti ya bambuma,

yina mupepe ya ngolo ke na kunata.

3 Yandi ke landa bawu mpe ke kwenda ntama kondwa kutala mpasi,

na nzila yina dikulu ya yandi vwandaka me lutila ntete ve.

4 Nani me sala nyonso yina mpe nani lungisa yawu?

Nani ke bokilaka na luzingu bambandu ya bantu kubanda na mbadukulu?

Munu, Yave, munu kele ya ntete

mpe ni munu mpe ke vwanda na bayina kele ya mansukina, ya tsyelika, ya kele ni munu!

5 Bantu yina ke zingaka na bisanga, mpe na bizunga ya kumu ya mubu talaka yina mu salaka, bawu kuzwaka boma,

bayina ke zingaka na bandilu ya ntoto me banda na kutekita,

bawu nyonso ke na kubelama, bawu ke na kwiza.

6 Bawu ke na kusalasana, bawu na bawu,

mpe konso muntu ke na kutuba na mpangi ya yandi: Vwanda na kibakala!

7 Muntu yina ke salaka bisalu ya maboko ke na kusyamisa yina ke sulumunaka wolo.

Muntu yina ke sulumunaka bisengo, ke syamisa yina ke sadilaka na nyundu.

Yandi ke na kutuba na kisadi-bisengo: Yayi kele kisalu ya mbote!

Yandi ke tula bansonso samu na kutelemisa kiteki,

samu ti yawu kuningana ve.

8 Kasi, samu na nge Isayeli,

kisyelo ya munu, Yakobi yina mu soolaka,

mpe bana ya Abalayami, yina kele nkundi ya munu2Kk 20.7; Zak 2.23,

9 nge yina mu kwendaka baka na bandilu ya ntoto

mpe yina mu me bokila na bandilu ya ntoto,

nge na yina mu tubaka:

Nge kele kisyelo ya munu,

mu soolaka nge

mpe mu losaka nge ve.

10 Kuvwanda na boma ve,

samu ti mu kele na nge,

kuvwanda na ntalulu ya muntu yina ke na kutekita,

samu ti mu kele Nzambi ya nge,

mu ke syamisa nge,

mu ke kwiza sadisa nge,

ya tsyelika, mu ke simba nge na diboko ya munu ya lubakala yina ke nungisaka.

11 Bawu ke tala nsoni mpe bawu ke safuka,

bayina nyonso me dasukilaka nge,

bawu ke kuma bantu ya mpamba,

bawu ke zimbana,

bawu yina ke sosilaka nge mindondo.

12 Nge ke sosa bawu, nge ke tala dyaka bawu ve

bayina vwandaka swanisa nge.

Bawu ke manisa na kufwa,

mpe ke kituka bantu ya mpamba,

bayina vwandaka nwanisa nge.

13 Samu ti ni munu, Yave, kele Nzambi ya nge,

mu me simba diboko ya nge ya lubakala,

mu me tuba na nge: «Kuvwanda ve na boma,

mu kele awa samu na kusadisa nge.»

14 Kuvwanda ve na boma, Yakobi, nge yina kele kaka ngambu.

Mu ke na kwiza sadisa nge, bantu ya Isayeli.

Munu kikuudi ya nge, Nzambi ya Longo ya Isayeli.

Ni Yave me tuba yawu.

15 Tala, mu ke sala nge kisadulu ya malu-malu,

yina ba ke sadilaka samu na kukabula bambuma na matiti ya yawu,

kisadulu yina ba me lengula meno ya yawu.

Nge ke nika myongo, nge ke kitula yawu fundu-fundu mpe myongo ya fyoti,

nge ke kumisa yawu matiti ya bambuma.

16 Ya tsyelika, nge ke losa yawu na zulu mpe mupepe ke nata yawu,

kimbongila ke mwangisa yawu.

Kasi nge, nge ke looka na nsayi samu na Yave,

nge ke vwanda na kilengi na Nzambi ya Longo ya Isayeli.

17 Bayina ba ke nyokolaka mpe bamputu

ke sosa maza kasi bawu ke kuzwa yawu ve,

mpe nsatu ya maza ke yumisa baludimi ya bawu.

Kasi munu Yave, mu ke pesa bawu bamvutu,

munu Yave Nzambi ya Isayeli ke bika bawu ve.

18 Mu ke sala ti maza kubasika na zulu ya myongo,

mpe mu ke basisa maza na kati-kati ya midimba,

mu ke kitula yinsi ya kuyuma na kizinga ya kufuluka na maza,

mpe yinsi yina kele ve na maza, ke kituka yinto yina ke basisa maza.

19 Mu ke kunda na yinsi ya kuyuma, yinti ya sedele,

ya akasya, yinti ya miite, mpe yinti ya olive.

Mu ke tula na ntoto yina ata kima ke menaka ve,

yinti ya sipelese, sapine mpe bayinti ya mutindu na mutindu na kisika mosi.

20 Samu ti bawu nyonso kutala mpe bawu kundima,

bawu kufyongonina mpe kubakula

ti ni diboko ya Yave me sala nyonso yina,

ni Nzambi ya Longo ya Isayeli yidikaka bawu.

21 Yave ke na kutuba: Beno talisa dyambu ya beno,

beno lakisa kidimbu yina ke lakisa butsyelika ya beno,

ni ntinu ya Yakobi me tuba yawu.

22 Beno belama mpe beno zonzila beto

mambu yina ke salama, wapi mambu yina salamaka?

Beno lakisa yawu

mpe beto ke yindula,

to beno zonzila beto mambu yina ke kwiza

mpe beto ke zaba kana yawu ke salama!

23 Beno zabisa beto mambu yina ke kwiza

mpe beto ke zaba ti beno kele banzambi.

Ya tsyelika, beno sala dyambu ya mbote to ya yimbi,

samu ti beto fungula meso

mpe ti beto nyonso kintwadi kutala yawu.

24 Kasi beno, beno kele kaka mpamba!

Mpe mambu ya beno kele kaka ya mpamba!

Yina ke soola beno ke sala dyambu ya nganzi.

25 Katuka kuna na node,

mu ke basisa muntu, yandi ke kwiza katuka kisika yina ntangu ke basikilaka,

ba ke bokila yandi na nkumbu ya yandi,

yandi ke dyata ba mfumu mutindu poto-poto,

mutindu kisadi-bambinda ke dyataka ntoto ya kulamba.

26 Nani samunaka yawu na mbadukulu,

samu ti beto kuzaba yawu?

Nani zabisaka yawu na ntangu ya ntama,

samu ti beto kutuba: Yawu kele ya tsyelika?

Ve, ata muntu samunaka yawu,

ve, ata muntu wakisaka yawu,

ve, ata muntu kuwaka mambu yina beno tubaka.

27 Kasi munu, mu me vwanda ya ntete na kutuba na Siyone:

«Bawu yayi! Bawu yayi!»

Mu me pesa na Yelusalemi ntumwa, kinati nsangu ya mbote.

28 Mu me tala mbote, kasi mu me tala muntu ve,

ata kipesi-malongi mosi ve,

ata muntu lenda pesa mvutu na byuvu ya munu.

29 Bawu nyonso, bawu kele mpamba,

mavanga ya bawu kele ya yimbi,

mpe biteki ya bawu, yawu kele mpamba mpe kaka mupepe.