42
Mukunga ya ntete ya kisyelo ya Yave
1 Beno tala kisyelo ya munu yina mu me simbaMat 3.17; 17.5; Mke 1.11; Lke 3.22; 9.35.
Kisyelo yina mu me soola, yina ke yangidikaka munu.
Mu me tula mpeve ya munu na zulu ya yandi.
Yandi ke sala lufundusu ya mbote na bantu nyonso ya bayinsi.
2 Yandi ke looka ve,
yandi ke zangula ve ndinga,
yandi ke wakisa ve ndinga ya yandi na banzila.
3 Yandi ke zenga ve twandu ya kukondama,
mpe ke kufwa ve tiya ya singa ya mwinda yina ke na kubasisa mulinga,
kasi yandi ke sala lufundusu ya kufwanana.
4 Yandi ke lemba ve,
yandi ke bika ve tii ntangu yina yandi ke tula ludedomo na yinza nyonso,
bisanga ke na kuvingila Musiku ya yandi.
Nsemo samu na bayinsi
5 Yave Nzambi ke na kutuba,
yandi yina yidikaka zulu mpe yalumunaka yawu,
yandi yina tandaka ntoto na nyonso yina kele na ntoto,
yandi yina pesaka kiwumunu na bima nyonso ya ntoto,
mpe mpeve na bayina ke tambulaka na ntoto:
6 «Munu Yave mu me bokila nge na kukwikama ya munu,
mu me simba nge na diboko,
mu me tula nge na lweka,
samu ti nge vwanda ngwisani ya makanda ya bantu,
samu ti nge vwanda nsemo ya bayinsiLke 2.32; Bis 13.47; 26.23,
7 samu ti nge fungula meso ya bampofo,
samu ti nge basisa bankole na boloko,
samu ti nge kuula bayina ke na kuzinga na kati ya kitombe.»
8 Mu kele Yave, yina ni nkumbu ya munu,
nkembo yina me lunga samu na munu, mu ke pesa ve yawu na muntu ya nkaka,
mpe masiika yina me lunga na munu, mu ke bikila ve yawu na biteki.
9 Mambu ya ntete, yawu yayi me luta, mpe ntangu yayi,
mu ke na kuzabisa beno mambu ya malu-malu.
Ntete ti yawu kusalama, mu ke na kuzabisa beno yawu.
Beno yimbidila Yave mukunga ya malu-malu
10 Beno yimbidila Yave mukunga ya malu-malu,
beno yimbidila yandi mikunga ya nzitusu katuka kuna na bandilu ya ntoto,
beno bayina ke zyetaka na zulu ya mubu,
beno bayina ke fulusaka yawu,
bisanga mpe bantu yina ke zingaka kuna!
11 Bika ti bayinsi ya kuyuma, bambanza, babwala mpe bantu yina ke zingaka kuna na Kedale kuzangula bandinga!
Bika ti bayina ke zingaka na Sela, bawu kusala milolo ya nsayi!
Bika ti katuka kuna na zulu ya myongo, bawu kusala milolo ya kyese!
12 Bika ti bayina kele ntama, bawu kembila Yave,
mpe ti kuna na bisanga, bawu yimbidila yandi mikunga ya nzitusu!
13 Yave ke basikaka mutindu kinwani ya ngolo,
yandi ke lakisaka kimbanda ya yandi mutindu makelele ya mvita,
yandi ke zangulaka ndinga ya yandi, yandi ke lookaka,
yandi ke lakisaka ngolo ya yandi na bambeni ya yandi.
Yina Yave me kubika na kusala
14 Katuka ntama, mu kele ya kudingama,
mu kele ya munu swii, mu kele ya kuzuna,
mu ke tala mpasi mutindu kento na kati ya mpasi ya kubuta,
mu ke me kondwa kiwumunu, mpe mu ke na kupema na mpasi.
15 Mu ke sala ti myongo ya nene mpe myongo ya fyoti kukuma yinsi ya kuyuma,
mu ke yumisa matiti nyonso,
mu ke sala ti banzadi kukuma bisanga,
mpe mu ke yumisa madyanga.
16 Mu ke sala ti bampofo kutambula na nzila yina bawu zaba ve,
mu ke twadisa bawu na banzila yina bawu zaba ve.
Na mantwala ya bawu, mu ke soba kitombe na nsemo,
mu ke soba ntoto yina ke na mabaku na ntoto ya kutandama mbote,
mu ke sala yawu,
mpe mu ke bika bawu ata fyoti ve.
17 Bayina ke tulaka kivuvu ya bawu na biteki,
bawu ke vutuka manima, bawu ke tala nsoni,
bayina ke tubaka na biteki yina ba yidikaka na bisengo ya kusulumuka ti:
«Beno kele banzambi ya beto»!
Bantu ya Nzambi, bampofo mpe bantu ya makutu ya kufwa
18 Beno yina kele na makutu ya kufwa, beno kuwa!
Beno bampofo, beno fungula meso mpe beno tala!
19 Nani kele mpofo kana kaka kisyelo ya munu ve?
Nani kele na makutu ya kufwa kana kaka ve ntumwa yina mu ke na kufidisa?
Nani kele mpofo mutindu muntu yina me kuzwa kizunu?
Nani kele mpofo mutindu kisyelo ya Yave?
20 Nge me tala mambu mingi, kasi nge me sala keba ve.
Ba me fungula makutu, kasi ba me kuwa ve!
21 Yave me yangalala samu na kudedama ya yandi,
yandi me samuna Musiku ya nene mpe ya kitoko.
22 Ya tsyelika, bawu me kuma bantu yina ba me botola bima,
bantu yina ba me baka bima na ngolo!
Ba me bwila bawu nyonso na mutambu,
na kati ya dibulu mpe ya kubumbama na kati ya bayinzo ya boloko,
ba me baka bima ya bawu na ngolo,
mpe ata muntu samu na kukuula bawu!
Ba me botola bawu bima nyonso
mpe ata muntu ve ke tuba ti: «Beno vutula munu yawu!»
23 Nani na kati ya beno ke teka makutu samu na yawu?
Nani na kati ya beno ke fungula makutu, samu na kuwa nsangu ya mambu yina ke kwiza?
24 Nani yekulaka Yakobi na maboko ya bayina botolaka yandi bima?
Nani yekulaka Isayeli na maboko ya bayina ke botolaka bima na ngolo?
Ni Yave, samu ti beto sumukaka na ntadisi ya yandi.
Bantu ya Yakobi zolaka ve na kulanda nzila ya Yave,
mpe bawu tumamaka ve na Musiku ya yandi.
25 Na yina, Yave bulumunaka nkele ya yandi ya kulutila na Isayeli,
mpe bankwamusu na muzingu,
yandi fidisaka bawu mpasi mpe vwanzi,
yawu kwamisaka Isayeli na balweka nyonso,
Kasi Isayeli bakulaka ve,
yawu bwisaka Isayeli, kasi yandi salaka ve keba.