1 Kasi na ntangu yayi, Yave yina yidikaka nge, nge Yakobi,

yandi yina salaka nge, nge Isayeli,

yandi ke na kutuba:

«Kutala boma ve,

samu ti mu me kuula nge.

Mu me bokila nge na nkumbu ya nge,

nge kele ya munu!

2 Kana nge sabuka maza,

mu ke vwanda na nge,

kana nge luta na banzadi,

yawu ke dyamisa nge ve,

kana nge tambula na tiya,

nge ke nyenga ve,

milaka ya tiya ke yoka nge ve.

3 Ya tsyelika, mu kele Yave Nzambi ya nge,

Nzambi ya Longo ya Isayeli, Muvuukisi ya nge.»

«Mu yekulaka Ngipiti samu na kufuta nkudulu ya nge,

mu yekulaka Kuse mpe Seba na kisika ya nge.

4 Nge kele ntalu mingi na meso ya munu,

nge kele mfunu mingi samu na munu, mpe mu zola nge,

mu ke pesa bantu na kisika ya nge

mpe makanda ya bantu samu na luzingu ya nge.»

5 «Kutala boma ve,

samu ti mu kele na nge,

mu ke katula bana ya nge na esete,

mpe mu ke kutikisa beno na wesete.

6 Mu ke tuba na node: “Pesa”!

Mu ke tuba na sude: “Bika ti bantu ya munu kukwenda”!

Katula bana ya munu ya babakala ntama

mpe katula bana ya munu ya bakento kuna na bandilu ya ntoto,

7 bayina nyonso ke nataka Nkumbu ya munu,

bayina mu yidikaka samu na nkembo ya munu,

bayina mu salaka mpe mu bongisaka.»

8 Bika ti dikanda ya bampofo kubasika,

ata ti bawu ke na meso,

bika ti bayina ke na makutu ya kufwa, bawu kubasika

ata bawu ke na makutu.

9 Bika ti bayinsi nyonso kuvukana,

mpe ti bantu makanda ya bantu kuyonzama!

Nani na kati ya bawu bikulaka na mambu yayi?

Ba nani vwandaka bantu ya ntete na kubikula yawu?

Bika ti bawu kulakisa bambangi ya bawu,

mpe ti bawu kulakisa mambu ya bawu ya kudedama.

Bika ti ba kuwa bawu mbote,

mpe ti ba kutuba: «Ee, ya kele ya tsyelika»!

10 Bambangi ya munu ni beno bantu ya munu,

beno na kisyelo ya munu yina mu soolaka,

beno zaba yawu,

beno kukwikila munu

mpe ti beno kubakula ti ni munu:

Tekila munu, Nzambi ya nkaka vwandaka ve,

mpe na manima ya munu,

ya ke vwanda ve na Nzambi ya nkaka.

Ni Yave me tuba yawu.

11 Kaka ni munu, ni munu kele Yave,

mpe kana ni munu ve, ya kele ve na Muvuukisi ya nkaka.

12 Ni munu zonzaka mambu yayi,

ni munu ke vuukisaka mpe ni munu bikulaka yawu,

kasi ya kele ve nzambi ya nzenza na kati ya beno me sala yawu,

beno kele bambangi ya munu,

ni munu kele Nzambi,

ni Yave me tuba yawu.

13 Mu kele Nzambi katuka ntama

mpe muntu ve lenda kuula muntu na yisi ya lutumu ya munu,

ntangu mu ke salaka, nani ke tediminaka munu?

14 Kikuudi ya beno, Yave Nzambi ya Longo ya Isayeli,

ke na kutuba mutindu yayi:

«Ya kele ni samu na beno mu ke fidisa muntu na kwenda nwanisa yinsi ya Babilone,

mu ke dyamisa ba-Kalede yina ke kima na babwatu,

ata ya vwanda babwatu yina ke yangidikaka bawu.

15 Mu kele Yave Nzambi ya beno ya longo,

Kiyidiki ya Isayeli, ntinu ya beno.»

16 Yave yina yidikaka nzila fyoti na kati ya mubu,

yina ke pasulaka maza ya sunda samu na kulakisa nzila,

17 yina tambusaka bapusu-pusu ya mvita mpe bampunda,

mukangu ya binwani mpe binwani ya ngolo,

bawu lalaka bawu nyonso,

bawu telamaka dyaka ve,

bawu kufwaka, bawu manisaka mutindu singa ya mwinda.

18 «Beno bambuka dyaka ve moyo na mambu ya ntama,

beno tula ve ntima na mambu ya ntangu ya ntama.

19 Beno tala, mu me sala dyambu ya malu-malu,

yina me banda kumena,

beno zaba yawu ve?

Mu ke yidika nzila na kati ya yinsi ya kuyuma,

mu ke tula banzadi na ntoto yina ata kima ke menaka.

20 Bibulu ya mfinda, bambulu mpe ba-otelise ke kembila munu,

samu ti mu ke tula maza na yinsi ya kuyuma,

banzadi na bisika yina ata kima ke menaka,

samu na kunwikisa bantu ya munu yina mu soolaka.

21 Dikanda ya bantu yina mu yidikaka

ke yimbidila munu mikunga ya nzitusu.»

22 Yave ke na kutuba:

Yakobi, ni munu ve nge me bokila!

Isayeli, ya tsyelika nge me lemba munu!

23 Ya kele ve samu na munu,

nge pesaka munu ve minkayulu ya kuyoka ya bana ya mameme,

mpe nge zitisaka ve munu na minkayulu ya nge,

mu kwamisaka ve nge na kupesa munu makabu

to mu lembisaka nge ve na kupesa munu maaka ya nsunga ya mbote.

24 Nge sadilaka ve mbongo ya nge na kusumba maaka ya nsunga ya mbote samu na munu

mpe nge yukutisaka ve munu na mafuta ya minkayulu ya nge,

kasi nge kwamisaka munu na masumu ya nge,

nge lembisaka munu na yimbi ya nge.

25 Kasi munu, ni munu mosi ke katulaka masumu ya nge, samu na munu mosi,

mpe mu ke bambukaka ve moyo na masumu ya nge.

26 Bambula munu moyo na dyambu yina nge ke na kufunda munu, mpe beto sala lufundusu ya dyambu yayi beto na nge,

zonza nge mosi samu ti nge kukinwanina.

27 Nkooko ya nge ya ntete sumukaka na ntadisi ya munu,

mpe banzonzi ya nge balukilaka munu.

28 Ni yawu yina, mu safulaka bamfumu yina ke twadisaka Yinzo ya longo.

Mu yekulaka bawu na maboko ya Yakobi, samu ti bawu kufwa samu na Nzambi.

Mu yekulaka Isayeli na bifingu ya bambeni ya yandi.