1 Yave ke na kutuba mutindu yayi:

Beno sala yina ke ya kusungama mpe beno zitisa ludedomo,

samu ti ntama mingi ve mu ke kwiza vuukisa beno,

ludedomo ya munu me belama na kutalana.

2 Kyese na muntu yina ke sadila mutindu yina,

kyese na muntu yina ke kukipesa na yawu:

na muntu yina ke zitisa Saba mpe ke vweza yawu ve,

mpe ke sadila ngolo na kusala ve yimbi!

3 Bika ti nzenza yina ke ya kukangama na Yave kutuba ve ti:

«Yave ke katula munu na dikanda ya yandi!»

Bika ti muntu yina ba me kufwa mabuta kutuba ve ti:

«Mu kele yinti ya kuyuma!»

4 Ya tsyelika, Yave ke na kutuba:

Na bayina ba me kufwa mabuta, bayina ke zitisaka basaba ya munu,

bayina ke sadilaka mambu yina ke yangidika munu,

mpe ke tatamanaka na kusadila ngwisani ya munu,

5 mu ke pesa bawu na Yinzo ya munu mpe na bibaka ya munu,

kidimbu mpe nkumbu,

yina me lutila ntalu na bana ya babakala na ya bakento,

mu ke pesa bawu nkumbu ya bantangu nyonso,

yina ba lenda katula ve.

6 Mpe banzenza yina ke kangama na Yave,

samu na kusadila yandi,

kuzola nkumbu ya yandi,

mpe kuvwanda bisyelo ya yandi,

bayina nyonso ke zitisa saba,

kondwa kuvweza yawu,

mpe ke tatamana na kusadila ngwisani ya munu,

7 mu ke nata bawu na mongo ya munu ya longo,

mu ke yangidika bawu na Yinzo ya munu ya lusambulu,

mu ke ndima minkayulu ya bawu ya kuyoka na minkayulu ya nkaka,

yina ba ke pesa na kiyokolo ya munu ya minkayulu,

samu ti ba ke bokila Yinzo ya munu,

«Yinzo ya lusambulu samu na makanda nyonsoMat 21.13; Mke 11.17; Lke 19.46.»

8 Yave ke na kutuba mutindu yayi:

Ni yandi ke yonzikaka bantu yina ba bingisaka na Isayeli,

mu ke yonzika ba ya nkaka,

na bantu ya munu yina kele ya kuyonzama.

9 Beno nyonso, bibulu ya bilanga,

beno kwiza, beno kudya,

beno nyonso bibulu ya ba mfinda!

10 Bankebi ya Isayeli kele na meso ya kufwa bawu nyonso:

bawu ke ve na mayela,

bawu nyonso kele bayimbwa yina kele ve na ndinga,

bawu ke lolaka ve.

Bawu ke landaka banzila ya bawu mosi,

Bawu ke lalaka, bawu ke nimbaka.

11 Bawu kele ba yimbwa yina ke zolaka kudya,

kasi ba ke fulukaka ve,

bawu kele mivungi,

yina ke bakulaka ata dyambu ve.

Bawu ke landaka banzila ya bawu mosi,

mosi-mosi na bawu ke na kusosa ndandu ya yandi mosi.

12 «Beno kwiza, mu ke kwenda sosa malafu,

mpe beto ke kunwa malafu ya ngolo tii na kukola.

Mbasi, mukembo ke tatamana mutindu bubu yayi:

Malafu ke bikana dyaka mingi!»