57
1 Muntu ya kusungama ke na kufwa,
kasi ata muntu ke na kutala kyadi,
mpe ba me katula bantu ya ntima ya mbote,
kasi ata muntu ke na kubakula samu na yinki,
ba ke na kunata muntu ya kusungama
samu ti, bampasi yina ke na kwiza kubwidila yandi ve.
2 Kizunu ke kwiza,
mpe muntu yina ke landaka nzila ya kusungama,
ke lala na kizunu.
Yave ke na kukebisa bantu yina ke sambilaka biteki
3 Kasi beno, beno belama,
bana ya bakento yayi, bakento yina ke sadilaka mikisi to bunganga samu na kuzaba mambu yina ke kwiza
dikanda ya kinsuza na kindumba!
4 Beno ke na kuseka nani?
Beno me fungula yinwa ya nene-nene na nani?
Beno ke na kulakisa ludimi na nani?
Beno kele ve bana ya masumu,
dikanda ya luvunu?
5 Beno bantu ke na kuyotila tiya na yisi ya telebinte
mpe na yisi ya konso yinti ya maza,
beno bantu ke pesaka bana ya beno mutindu minkayulu na mizumba
mpe na mabulu ya matadi?
6 Matadi ya kulenga ya muzumba,
yina ni mvwilu ya nge,
yina ni kikunku ya nge!
Ni samu na matadi yina nge ke bulumunaka malafu mutindu munkayulu,
mpe nge ke pesaka makabu mutindu minkayulu ya kuyoka!
Ni na nyonso yina mu ke kuzwa mbombolo ya munu?
7 Nge me yidikaka mfulu ya nge ya kuladila,
na zulu ya mongo ya yinda,
mpe nge ke yulukaka na zulu ya myongo,
na kupesa minkayulu.
8 Nge me tula kisi ya nge na manima ya mabaya ya mwelo!
Na mansweki, nge me katula binkuti,
nge me yuluka na mfulu ya nge ya nene.
Nge me sala ngwisani na makangu ya nge,
yina ke lala na nge,
mpe nge me tala bimpene ya bawu.
9 Nge me nata mafuta mutindu dikabu na nzambi ya Moloke,
nge me pesa yandi mananasi ya nsunga
mpe nge me fidisa bantumwa ya nge ntama.
Na yina nge me kuluka,
tii na yinsi ya bafwa!
10 Nge me lemba na kutambula mingi,
nge me tuba ve ti: «Mu me bika!»
Nge me kuzwa dyaka ngolo,
mpe nge me lemba ve.
11 Nani ke na kutalisa nge ntima mpasi,
nge vwandaka na boma ya nani,
samu ti nge vuna munu?
Samu ti nge zimbana munu,
samu ti nge bingisa munu na mayindu ya nge?
Nge ke na kuzitisa dyaka munu ve,
samu ti mu me vwanda swii, katuka ntama?
12 Mu ke lakisa ludedomo ya nge na mavanga ya nge,
mpe na mambu ya nge nyonso nge ke kuzwa ata ndandu na yawu!
13 Bika ti banzambi ya nge nyonso ya luvunu kukuula nge,
nge ke looka na sika ya bawu,
kasi mupepe ke kombola bawu nyonso,
mupepe ya ngolo ke nata bawu!
Kasi yina ke kangama na munu ke kuzwa yinsi mutindu mvwilu,
mpe yandi ke baka mongo ya munu ya longo.
Yave ke nyakisa
14 Mpe bawu ke tuba mutindu yayi: Beno fungula nzila, beno fungula yawu,
beno kubika nzila!
Beno katula bikaku nyonso,
na nzila ya bantu ya munu.
15 Yave Nzambi ya kulutila Kuzangama,
yandi ke zingaka ya mankululu, Nkumbu ya yandi kele ya longo mpe yandi ke na kutuba:
Mu ke zingaka na kisika ya kulutila kuzangama mpe ya longo,
kasi mu ke vwandaka mpe na muntu yina ke na mpasi na ntima mpe ke na ntima ya kukuluka,
samu na kuvutula mvingu na mwela ya muntu yina ke na ntima ya kukuluka,
mpe kupesa ngolo na muntu yina ke na mpasi na ntimaMga 34.19; 51.19.
16 Samu ti ya kele ve ntangu nyonso mu ke fundisa,
to mu ke dasukaka ntangu nyonso ve,
kana ve, na mantwala ya munu kiwumunu ke katuka,
bantu yina mu yidikaka ke manisa na kufwa.
17 Samu na bansatu kinsuni mpe luzolo ya mbongo,
mu me dasukila mpe mu me bula yandi,
na nkele ya munu mu bumbamaka,
kasi yandi yina ke balukilaka munu,
me landa nzila ya ntima ya yandi.
18 Mu me tala ndyatulu ya yandi,
kasi mu ke nyakisa yandi,
mpe mu ke twadisa yandi,
mu ke bomba yandi,
yandi na bayina ke na kudila na yandi.
19 Mu ke tula na bayinwa ya bawu mikunga ya nzitusu.
Kizunu, kizunu samu na muntu yina kele ntama,
mpe na muntu yina kele pene-pene!
Ya tsyelika, mu ke nyakisa yandi!
Ni Yave me tuba yawu.
20 Kasi bantu ya ntima ya yimbi kele mutindu maza ya mubu,
yawu ke ninganaka mpe ke dingamaka ve,
bimpo ya yawu ke basisaka na kumu, bima nyonso ya yimbi.
21 Kizunu kele ve samu na bantu ya yimbi,
ni Nzambi ya munu me tuba yawu.