1 Mu vwandaka me kubama na kupesa mvutu na bantu yina lombaka munu ata kima ve,

mu kubamaka na kutalana na bantu yina vwandaka sosa munu ve.

Mu tubaka: «Mu kele awa! Mu kele awa!»

Na bantu ya dikanda yina ba vwandaka kubokila ve na Nkumbu ya munu.

2 Kasi, mu me lambula maboko ya munu,

bilumbu nyonso na dikanda yina mangaka munu,

vwandaka landa nzila yina kele mbote ve,

mutindu kele mabanza ya bawu,

3 dikanda yina ke pesaka munu nkele na mantwala ya bantu,

bantu ya yandi ke pesaka minkayulu na bilanga,

mpe bawu ke yokaka mananasi ya nsunga ya mbote na kiyokolo ya bibiliki.

4 Bawu ke vwandaka na zulu ya bandyamu, mpe bawu ke lalaka na kati ya bantadi,

bawu ke kudyaka musuni ya ngulu,

mpe ke fulusaka ba ndonga ya bawu na madya ya kusumuka.

5 Bawu ke na kulooka: «Vwanda kisika yina nge kele

mpe kubelama ve na munu,

samu ti mu kele ya longo kulutila nge.»

Mambu yayi kele samu na munu,

mutindu mulinga ke na kuzwa munu na mbombo,

mutindu tiya ke na kulema kilumbu nyonso.

6 Kasi, mambu nyonso yina

kele ya kusonama na mantwala ya munu,

mu ke kanga yinwa ve,

mu ke sala ti bawu kufuta yawu tii na nsukunu.

7 Yave me tuba: «Ti mu ke futisa bawu yimbi ya bawu,

mpe yimbi yina salaka bankooko ya bawu,

samu ti bawu me yoka mananasi ya nsunga ya mbote na zulu ya myongo

mpe bawu me vweza munu na zulu ya myongo ya fyoti!»

Mu ke teza mavanga ya bawu ya ntama,

mpe mu ke futisa bawu yimbi bawu salaka.

8 Yave ke na kutuba mutindu yayi: Mutindu ba ke tubaka,

kana beno me kuzwa maza ya bambuma ya vinu ya kitoko: «Beno kubebisa yawu ve

samu ti yawu kele na lusakumunu,

munu, mu ke sala mutindu mosi samu na bisyelo ya munu,

samu na kubebisa nyonso ve,

9 mu ke sala ti bana ya Yakobi kukuma mingi,

mu ke sala mpe ti bana ya Yuda kuzwa myongo ya munu.

Bayina mu soolaka ke kuzwa yawu mutindu mvwilu,

bisyelo ya munu ke zinga kuna.

10 Mudimba ya Salone ke vwanda kisika yina ya kudikilaka bibulu mpe

mudimba ya AkoleYwa 7.24-26; 15.7; Ose 2.17, kisika yina bangombe ke pemaka

samu na bantu ya munu yina kele ya kukwikama na munu.»

11 «Kasi, samu na beno bantu yina me pesa Yave mukongo,

mpe me zimbana mongo ya munu ya longo

ke salaka mesa samu na Ngade, nzambi ya kimvwama,

mpe ke fulusaka mbungu samu na Meni, nzambi ya bweso,

12 Mu me kubikila beno lufwa ya mbele ya mvita,

beno ke fukama mpe ba ke kufwa beno,

samu ti mu me bokila kasi beno me ndima ve,

samu ti mu me zonza kasi beno me wila munu ve,

mpe samu ti beno me yidika nyonso kele ya yimbi na meso ya munu,

mpe ti beno me zola yina ke yangidikaka munu ve.

13 Ni yawu yina, Yave ke na kutuba:

Bisyelo ya munu ke kuzwa madya,

kasi beno, beno ke vwanda na nsatu.

Bisyelo ya munu ke kuzwa maza ya kunwa

kasi beno ke vwanda na mpwila.

Bisyelo ya munu ke vwanda na kilengi ya kulutila,

kasi beno, beno ke tala nsoni!

14 Bisyelo ya munu ke sala milolo ya nsayi,

samu ti bawu ke fuluka na buyenge.

Kasi beno, beno looka,

na mpasi na ntima,

beno ke nyonga,

mwela ya kulemba.»

15 Bankumbu ya beno ke vwanda kidimbu ya nsingulu samu na bayina mu soolaka,

Yave, Mfumu, ke sala ti beno kufwa,

kasi na bisyelo ya yandi,

yandi ke pesa nkumbu ya malu-malu.

16 Muntu yina ke zola kuzwa lusakumunu awa na ntoto

ke kuzwa lusakumunu na «Nzambi ya Ameni»,

mpe na ntoto, yandi yina ke kudya ndefi na nkumbu ya «Nzambi ya Ameni.»

Ya tsyelika, beno ke zimbana bampasi yina lutaka,

yawu ke vwanda ya kubumbama na mantwala ya munu.

17 Mu ke yidika dizulu ya malu-malu,

ntoto ya malu-malu,

ba ke zimbana mambu nyonso ya ntama yina lutaka,

mpe ba ke banza dyaka na yawu ve.

18 Kasi, beno yangalala,

mpe beno vwanda na kilengi,

ntangu nyonso samu na yina mu yidikaka.

Ya tsyelika, mu ke yidika Yelusalemi, samu na kilengi,

mpe bantu ya yawu samu na nsayi.

19 Munu mpe mu ke vwanda na kilengi samu na Yelusalemi

mpe mu ke yangalala samu na bantu ya munu.

Ba ke kuwa dyaka ve,

bidilu to kuyawula ya kyadi.

20 Kuna, bana ya fyoti ke kufwa dyaka na bumwana ve,

to kiboba ke kufwa ve tekila yandi kuzwa lutangu ya ba mvula ya yandi.

Ntwenya ke kufwa ve tekila bamvula nkama,

kana muntu ya masumu me kufwa tekila yandi ku lungisa bamvula nkama, ya zola kutuba ti ba singaka yandi.

21 Bawu ke tunga bayinzo mpe bawu ke zinga kuna,

bawu ke kunda bayinti ya vinu, mpe bawu ke kudya bambuma ya yawu,

22 Bawu ke kutunga dyaka ba yinzo ve

samu ti muntu ya nkaka kuvwanda kuna,

bawu ke kunda dyaka bayinti ya vinu ve,

samu ti muntu ya nkaka kudya bambuma ya yawu,

samu ti bilumbu ya luzingu ya bantu ya munu ke vwanda mutindu bilumbu ya luzingu ya bayinti,

mpe bantu ya munu yina mu soolaka ke yangalala na kisalu ya bawuYel 31.5; Amo 9.14.

23 Bawu ke tala dyaka mpasi ya mpamba ve

mpe bawu ke buta ve bana yina ke tala mpasi,

bawu ke vwanda dikanda yina Yave me sakumuna,

bana ya bawu mpe ke kuzwa lusakumunu.

24 Ntete ti bawu kubokila munu,

munu, mu ke pesa bawu mvutu,

ntangu bawu ke ntete na kuzonza,

munu, mu ke lungisa bandombolo ya bawu.

25 Yingo ke kudya kintwadi na bana ya mameme,

nkosi ke kudya matiti mutindu ngombe,

nyoka ke kudya fundu-fundu.

Mambu ya yimbi to mwangusulu ke vwanda dyaka ve,

na zulu ya mongo ya munu ya longo,

ni Yave me tuba yawu!