66
Mibondi ya tsyelika na ya luvunu
1 Yayi ni mambu yina Yave ke na kutuba:
Dizulu kele kiti ya munu ya kintinu
mpe ntoto kele kisika mu ke tulaka makulu ya munu.
Wapi mutindu ya yinzo yina beno ke tungila munu
Wapi kisika yina lenda vwanda yinzo ya munu?
2 Bima nyonso yina, ni maboko ya munu yidikaka yawu,
ni yawu yina, yawu ke na kuzinga, Yave ke na kutubaBis 7.49-50:
Tala muntu yina ke yangidikaka munu:
Ni mputu, muntu ya mpasi yina kele na mpeve ya kukuluka,
yina ke tekitaka na mantwala ya mambu ya munu.
3 Muntu yina ke pesaka ngombe mutindu munkayulu,
yandi kele mutindu muntu yina me kufwa muntu samu na kupesa yandi mutindu munkayulu.
Muntu yina ke pesaka mwana ya mameme mutindu munkayulu,
yandi kele mutindu muntu yina ke pasulaka yintu ya yimbwa.
Muntu yina ke pesaka dikabu,
yandi kele mutindu muntu yina ke pesaka menga ya ngulu.
Muntu yina ke yokaka maaka ya nsunga ya mbote,
yandi kele mutindu muntu yina ke sambilaka kiteki.
Bawu kele bantu yina me soola na kulanda banzila ya bawu mosi,
mpe bawu ke na kuzola biteki ya bawu ya yimbi.
4 Mu me sola munu mpe na ku bika bawu na mavanga ya bawu ya yimbi,
mpe mu ke bwisila bawu ba mpasi yina ba ke na ku kima,
samu ti mu me bokila
mpe ata muntu me ndima,
samu ti mu me zonza
mpe ata muntu me kuwa,
kasi bawu me sala yina kele yimbi na meso ya munu,
mpe bawu me soola yina mu zola ve.
Yave ke na kukindisa mpe ke na kufundisa
5 Beno kuwa mambu ya Yave,
beno yina ke tekitaka na mantwala ya mambu ya yandi:
Tala, bampangi ya beno, bayina ke zolaka beno ve
mpe bayina ke sekaka beno,
samu na Nkumbu ya munu,
bawu me tuba:
«Bika ti Yave kulakisa nkembo ya yandi samu beto ku vwanda mbangi ya kilengi ya beno!»
Kasi bawu ke tala nsoni!
6 Beno kuwa makelele yina ke na basika na mbanza,
makelele yina ke na kwiza na Yinzo!
Ya kele ndinga ya Yave ke na kufutisa
na mitantu ya yandi yina me lunga na bawu.
7 Tekila yandi kuma na kubuta, yandi me buta mwana,
tekila yandi kuzwa misongo, yandi me buta mwana ya bakala!
8 Nani me kuwa mambu ya mutindu yayi,
nani me talaka mambu ya mutindu yayi?
Yinsi lenda kubutuka na kilumbu mosi?
Ba lenda kubuta dikanda kaka na mbala mosi?
Kasi, na ntangu yandi me kuzwa misongo, Siyone me buta bana ya yandi ya babakala na yinza!
9 Na yina, munu yina ke sala ti kento kuzwa kivumu,
mu lenda sala dyaka ti yandi kubuta ve?
Ni munu muntu ke butisaka,
mu lenda kabikisa mbutukulu ya mwana na yinza?
Ni Yave Nzambi ya nge me tuba yawu.
10 Beno yangalala na Yelusalemi,
Beno vwanda na kilengi samu na yandi,
beno bantu ke zolaka yandi!
Beno ku yangalala kintwadi na yandi,
beno bantu yina kotaka kifwidi samu na yandi!
11 Na yina, beno ke yukuta na mbombolo yina yandi ke na kupesa beno,
mutindu bana ya fyoti ke na kunwa mabene ya mama,
bana yina ke na kunwa na nsayi nyonso.
12 Samu ti Yave ke na kutuba: Mu ke fulusa yandi na kizunu mutindu nzadi,
nkembo ya bayinsi mutindu muzumba me fuluka.
Mutindu mwana ke kunwaka mabene, beno ke kunwa miliki,
mpe ba ke nata beno na mukongo,
mpe mu ke bomba beno na makoto.
13 Muntindu mama ke bombaka mwana ya yandi ya bakala,
munu mosi, mu ke bomba beno.
Ya tsyelika na Yelusalemi, ba ke bomba beno.
14 Ntangu beno ke tala yawu, ntima ya beno ke yangalala,
banzutu ya beno ke kuzwa ngolo mutindu matiti ya malu-malu.
Yave ke lakisa lulendo ya yandi na bisyelo ya yandi,
mpe yandi ke lakisa nkele ya yandi na mitantu ya yandi.
15 Samu ti Yave ke kwiza na tiya,
na bapusu-pusu ya yandi ya mvita,
mutindu mupepe ya ngolo
samu na kubulumuna nkele ya yandi,
mpe na lakisa nkele ya yandi na milaka ya tiya.
16 Samu ti ni na tiya Yave yandi ke sadila lufundusu ya yandi
mpe na mbele ya yandi ya mvita yandi ke semba bantu mingi,
Yave ke kufwa bantu mingi.
17 Bayina ke na kukubama
mpe ke na kukivedisa samu na ku kota na bilanga ya longo
na ku landaka na mulonga muntu yina ke na kati-kati
mpe ke kudyaka ngulu,
na bibulu ya kusumuka mpe na bampuku
bawu nyonso yina ke kufwa kintwadi,
Ni Yave me tuba yawu.
Lukutakanu ya nene mpe ya mansukina
18 Samu ti munu mu zaba mbote ma banza na mavanga ya bawu. Tala, mu me kwiza yonzika makanda nyonso na bantu ya bandinga nyonso. Bawu ke kwiza mpe bawu ke tala nkembo ya munu. 19 Mu ke tula kidimbu na kati-kati ya bawu, mpe mu ke fidisa bayina ke vuka na makanda ya bantu, na Talasi, na Pule mpe na Lude kisika bantu ke bendaka munani, na Tubale mpe na Yavane, na bisanga mpe na bizunga ya kumu ya mubu yina kele ntama, na bayina me kuwaka ntete Nkumbu ya munu ve mpe me talaka nkembo ya munu ve. Bawu ke zabisa nkembo ya munu na makanda yina. 20 Mpe katuka na makanda nyonso, bawu ke nata bampangi ya bawu na zulu ya bampunda, bapusu-pusu, bapusu-pusu yina kele na muludi na zulu, na zulu ya bampunda ya mitela ya nkufi mpe na zulu ya basamo na mongo ya munu ya longo na Yelusalemi, me tuba Yave, mutindu munkayulu, yina ke nataka bana ya Isayeli na bisalulu ya kuvedila, na Yinzo ya Yave. 21 Mpe na kati-kati, mu ke baka ba ya nkaka, samu na kuvwanda banganga-Nzambi na ba-Levi, me tuba Yave.
22 Mutindu dizulu ya malu-malu na ntoto ya malu-malu yina mu me yidika ke zinga na mantwala ya munu, Yave me kutuba yawu, ni mutindu yina ke zinga bana ya beno na nkumbu ya beno.
23 Yawu ke kuma tii na konso ngonda ya malu-malu
na konso Saba ya malu-malu,
bantu nyonso ke kwiza fukama,
na mantwala ya munu, me tuba Yave.
24 Ntangu bawu ke basika, bawu ke tala
bavumbi ya bantu yina mangaka munu,
mpe banselele yina ke kudya bantu yina, ke kufwa ve,
mpe tiya yina ke na kuyoka bawu ke kufwa ve,
bawu ke kuma nganzi samu na bantu nyonso.