Dibuku ya
YELEMYA
NKOTOLO
Dibuku yayi kele dibuku ya bambikululu ya Yelemya na yina me tadila Yelusalemi, yinsi ya kintinu ya Yuda mpe makanda ya bantu ya bayinsi ya nkaka. Yawu ke na kuzonzila mpe luzingu ya mumbikudi yandi mosi mpe bampasi yina yandi talaka. Yandi ke na kuzonzila mingi na dyambu yina me tadila kunata bantu na ngolo na yinsi ya nzenza (597 mpe 587) mpe mwangusulu ya Yelusalemi na ba-Kalede (587), tekila nkwizulu ya Yesu-Klisto. Yelemya vwandaka ntwenya na ntangu yina yandi kumaka ntumwa ya Yave na Yelusalemi (Yel 1.4-9) pene-pene ya mvula 626 tekila nkwizulu ya Yesu-Klisto mpe na bamvula 640-609 ya kintinu ya Yosiya. Yandi salaka kisalu ya yandi ya mumbikudi bamvula makumi yiya na mosi (Yel 41), mpe yandi manisaka kisalu ya yandi na Ngipiti. Yelemya vwandaka tuba ti Nzambi ke fidisa bampasi na bantu ya Yuda, samu ti bantu ya Yuda zengaka ngwisani, sambilaka biteki. Na yina, mumbikudi Yelemya vwandaka lwengisa bantu mpe bayinsi na kutumama na bambeni ya bawu mpe samu na yawu, bantu vwandaka tala Yelemya muntu ya yimbi.
Mambu ya Yave vwandaka mutindu tiya yina vwandaka lema na kati ya ntima ya mumbikudi Yelemya, ni yawu vwandaka sala ti Yelemya bika ve na kusamuna mambu ya Yave. Mambu ya Yelemya vwandaka kindisa mpe bantu na yina me tadila ngwisani ya malu-malu yina Yave zolaka sala na bantu ya yandi:
«Kasi ngwisani yina mu ke sala na bantu ya Isayeli ke vwanda mutindu yayi: Na manima ya bilumbu yina, mu ke tula Musiku ya munu na kati ya bawu. Mu ke sonika Musiku ya munu na bantima ya bawu. Mu ke vwanda Nzambi ya bawu, mpe bawu, bawu ke vwanda bantu ya munu. Ni Yave me tuba yawu (Yel 31.33).»
Dibuku yayi lenda kukabuka mutindu yayi:
- Mbokolo ya Yelemya (Yel 1).
- Kitumbu ya Yave samu na bantu ya Yuda mpe ya Yelusalemi (Yel 2–26).
- Yelemya na mantwala ya mimbikudi ya luvunu (Yel 27–29).
- Yave ke vutula dyaka bantu ya yandi (Yel 30–33).
- Kisalu mpe bampasi ya Yelemya (Yel 34–38).
- Mwangusulu ya Yelusalemi na ba-Kalede (Yel 39–42).
- Ba nataka Yelemya na ngolo na Ngipiti (Yel 43–44).
- Mambu ya Yave kuminaka Baluke (Yel 45).
- Kitumbu ya Yave samu na bantu ya bayinsi ya nzenza (Yel 46–51).
- Ba ke na kuzonzila na mwangusulu ya Yelusalemi mpe ya Yinzo ya Yave (Yel 52).
1
1 Yayi ni mambu ya Yelemya, mwana ya Yilekiya. Yandi vwandaka mosi na kati ya banganga-Nzambi na mbanza Anatote, kuna na yinsi ya Bezame. 2 Yave zabisaka mambu ya yandi na Yelemya na mvula ya kumi na tatu ya kintinu ya Yosiya, mwana ya Amone, ntinu ya Yuda. 3 Yave zabisaka dyaka mambu ya yandi na Yelemya na ntangu yina Yoyakime, mwana ya Yosiya, vwandaka ntinu ya Yuda tii na suka ya mvula ya kumi na mosi ya kintinu ya Sidekyase, mwana ya Yosiya, ntinu ya Yuda. Yave tatamanaka na kuzonzila yandi tii na ntangu yina ba nataka bantu ya Yelusalemi na ngolo na yinsi ya nzenza, na ngonda ya tanu ya mvula yina ya kumi na mosi.
Mbokolo ya Yelemya
4 Yave zabisaka munu mambu ya yandi mutindu yayi:
5 «Tekila mu yidika nge na kivumu ya mama ya nge,
mu soolaka nge.
Tekila nge kubutuka,
mu tulaka nge na lweka samu na kusadila munu.
Mu salaka nge mumbikudi na sika ya makanda ya bantu.»
6 Mu vutulaka mutindu yayi: «Aa! Yave Mfumu, mu zaba ve kuzonza, mu kele ntete mwana ya fyoti.»
7 Kasi Yave tubaka mutindu yayi:
«Kuzonza ve ti mu ke ntete mwana ya fyoti.
Samu ti nge fwana kukwenda na sika ya bayina nyonso mu ke fidisa nge.
Nge fwana kuzonza mambu nyonso yina mu ke tumisa nge.
8 Kuvwanda ve na boma ya bawu.
Samu ti mu kele kintwadi na nge samu na kukuula nge.
Ni Yave me tuba yawu.» 9 Na manima, Yave lambulaka diboko ya yandi, yandi simbaka yinwa ya munu mpe yandi tubaka:
«Tala, mu me tula mambu ya munu na yinwa ya nge.
10 Tala, bubu yayi, mu me pesa nge kiyeko
samu makanda ya bantu mpe samu na bayinsi ya bintinu:
Mu me pesa nge kisalu ya kutimuna mpe ya kubwisa,
kisalu ya kupasula mpe ya kumwangisa,
kisalu ya kutunga mpe ya kukunda.»
Lumoni ya ntete
11 Yave yufulaka munu: «Yelemya, yinki nge ke na kutala?» Mu vutulaka: «Mu ke na kutala kintala ya yinti ya ba-amande.» 12 Yave tubaka na munu: «Nge me tala mbote. Mu ke kyelulaka meso na mambu ya munu samu na kulungisa yawu.»
13 Na mbala ya zole, Yave zabisaka dyaka munu mambu ya yandi mutindu yayi: «Yinki nge ke na kutala?» Mu vutulaka: «Mu ke na kutala nzungu mosi ke na kutoka na tiya. Yawu me teka manima na node mpe yinwa ya yawu me talisa na lweka ya munu.»
14 Na yina, Yave tubaka:
«Ni na node ke katuka mpasi yina ke kumina
bantu nyonso ya yinsi.
15 Mu ke bokila bifumba nyonso ya bayinsi ya bintinu nyonso ya node.
Bawu ke tula bakiti ya bawu ya kintinu na nkotolo ya myelo ya Yelusalemi.
Bawu ke zunga bibaka ya Yelusalemi,
bawu ke nwanisa bambanza nyonso ya Yuda.
Ni Yave me tuba yawu.
16 Mu ke fundisa bantu ya yinsi yayi samu na yimbi nyonso yina bawu ke na kusalaka:
Bawu me manga munu,
bawu ke na kuyokilaka banzambi ya nzenza maaka ya nsunga ya mbote.
Bawu ke na kufukiminaka bima yina bawu me yidika na maboko ya bawu mosi.
17 Kasi nge Yelemya, kubama.
Telema mpe kwenda zabisa bawu
nyonso yina mu ke tumisa nge.
Kuvwanda ve na boma ya bawu.
Kana ve, ni munu ke sala ti
nge kuvwanda ve na kibakala na mantwala ya bawu.
18 Kubanda bubu yayi mu me sala ti
nge kuvwanda mutindu mbanza ya kutungama na bibaka ya lukengolo,
nge vwanda mutindu dikunzi ya kisengo,
mutindu kibaka ya kisengo ya mbwaki
na mantwala ya bantu nyonso ya yinsi,
na mantwala ya bantinu ya Yuda,
na mantwala ya bamfumu ya yinsi,
na mantwala ya banganga-Nzambi
mpe na mantwala ya bantu ya yinsi.
19 Bawu ke nwanisa nge,
kasi bawu ke nunga nge ve
samu ti mu kele na nge
samu na kukuula nge.
Ni Yave me tuba yawu.»