13
Yelemya na mukaba ya lino
1 Yave me tuba na munu mutindu yayi: «Kwenda sumba mukaba ya lino mpe kanga yawu na luketo ya nge, kasi kusukula yawu na maza ve.» 2 Mu sumbaka mukaba mpe mu lwataka yawu mutindu Yave tubaka na munu. 3 Yave tubaka na munu na mbala ya zole: 4 «Baka mukaba yina nge sumbaka, yina nge ke ya kukanga na luketo. Kwenda na nzadi ya Efalate mpe kuna, bumba mukaba yango na kati ya dibulu ya ntadi.» 5 Mu kwendaka bumba mukaba yango pene-pene ya nzadi ya Efalate mutindu Yave tumisaka munu. 6 Na manima ya bilumbu mingi, Yave tubaka na munu: «Vutuka pene-pene ya nzadi ya Efalate, kwenda baka mukaba yina mu tumisaka nge na kubumba kuna.» 7 Mu vutukaka pene-pene ya nzadi ya Efalate, mu sosaka mukaba yango na kisika yina mu bumbaka yawu mpe mu bakaka yawu. Kasi yawu vwandaka me fusa mpe yawu vwandaka dyaka na kisalu ve.
8 Na yina, Yave tubaka na munu: 9 «Yave ke na kutuba: Ni mutindu yayi mu ke sukisa mayama ya Yuda mpe mayama ya mingi-mingi ya Yelusalemi. 10 Bantu yayi kele yimbi mpe bawu ke na kumanga na kuwa mambu ya munu. Bawu ke na kulanda kaka mabanza ya bantima ya bawu. Bawu ke na kulanda banzambi ya nzenza samu na kusadilaka bawu mpe kufukiminaka bawu. Ni yawu yina bawu ke kuma mutindu mukaba yayi yina ke dyaka kisalu ve! 11 Yave ke na kutuba: Mutindu muntu ke kangaka mukaba na luketo ya yandi, ni mutindu yina mu kangaka na munu dikanda nyonso ya Isayeli mpe dikanda nyonso ya Yuda, samu ti bawu kuvwanda bantu ya munu, Nkumbu ya munu, kidimbu ya nkembo ya munu mpe kitoko ya munu. Kasi bawu kuwaka munu ve.»
Malafu mpe nkele ya Yave
12 «Nge ke zabisa bawu mambu yayi: “Yave, Nzambi ya Isayeli, ke na kutuba: Ba salaka bambinda samu na kutulaka yawu malafu”. Kana ba tuba na nge ti “Ya tsyelika, beto mosi beto zaba ve ti ba salaka bambinda samu na kutulaka yawu malafu?” 13 Nge ke vutula na bawu mutindu yayi: “Yave ke na kutuba: mu ke sala ti bantu nyonso na bayina ke zingaka na yinsi yayi kukola malafu, ya vwanda bantinu yina ke vwandaka na kyandu ya kintinu ya Davidi, ya vwanda banganga-nzambi, mimbikudi mpe bantu nyonso yina ke zingaka na Yelusalemi. 14 Mu ke tutisa bawu, bawu na bawu, batata mpe bana. Mu ke katula ata muntu, mu ke fwila ata muntu kyadi, mu ke tala ve kyadi na kumanisa na kufwa bawu.” »
Kukuwa tekila ti ntangu kumanisa
15 Beno fungula makutu, beno kuwa!
Beno sala ve yintu-ngolo!
Ni Yave ke na kutuba.
16 Beno pesa nkembo na Yave, Nzambi ya beno,
tekila yandi fidisa kitombe,
tekila beno bula mabaku na myongo yina me kuma mpimpa.
Beno ke na kuvingila ntangu
kasi yandi ke na kukitula yawu na kitombe ya lufwa,
yandi ke kitula yawu na kitombe ya ngolo.
17 Kana beno kuwa ve nkebosolo yayi,
mu ke dila na mansweki
samu na mayama ya beno.
Mu ke basisa mansangasa ya munu,
meso ya munu ke bwaka na kudila,
samu ti mameme ya Yave
ke na kukwenda na bundongo.
Mambu ya Yave samu na dikanda ya ntinu
18 Tuba na ntinu
mpe na mama ya ntinu mutindu yayi:
«Beno vwanda na ntoto,
samu ti yimpu ya beno ya kintinu,
yimpu yina ya kitoko,
yawu me katuka na yintu mpe yawu me kubwa.
19 Bambanza ya Nengeve me kuma ya kukangama.
Muntu kele ve samu na kufungula myelo ya yawu.
Yuda nyonso me kwenda na bundongo.
Ba me nata bantu nyonso ya Yuda na bundongo.»
Nsoni ya Yelusalemi
20 «Yelusalemi, fungula meso mpe tala:
bambeni ya nge ke na kukatuka na node.
Wapi sika kele nkonga ya mameme yina mu pesaka nge?
Wapi sika kele mameme yina vwandaka pesa nge nsangu?
21 Ntangu bayina nge me longisaka na kuvwanda na bunkundi na nge
ke tedimina nge samu na kufutisa nge yimbi ya nge,
yinki nge ke tuba?
Ya tsyelika, bampasi ke simba nge
mutindu kento na ntangu ya kubuta.
22 Na yina, nge ke kukiyufula:
“Samu na yinki mambu yayi ke na kukumina munu?
Ya ke ni samu na yimbi ya nge ya kulutila
ba me nanguna nge dizwela
mpe kutalisa nge mpasi.”»
23 «Muntu ya Etyopi lenda kusoba mpusu ya yandi?
Yingo lenda kusoba miika ya yandi?
Mpe beno bayina me mesanaka
na kusalaka yimbi,
beno lenda na kusala mbote?
24 Mu ke mwangisa bawu
mutindu matiti ya nyanga ke mwanganaka
na mupepe ya yinsi ya kuyuma.»
25 «Yelusalemi, tala mpasi yina ke na kuvingila nge,
kinkunku yina mu me kubika samu na nge,
samu ti nge me zimbana munu,
nge me tulaka kivuvu ya nge na luvunu:
26 Munu mpe, mu ke nanguna nge dizwela tii na kizizi,
mpe ba ke tala nge kimpene.
27 Mu me tala kinsuza ya nge
mpe mwa makelele yina nge salaka samu na kilengi,
kindumba ya nge ya nsoni
na zulu ya myongo ya fyoti mpe na matiti.
Mu me tala busafu ya nge.
Kyadi na nge Yelusalemi,
nge yina kele ya kuvedila ve!
Tii wapi ntangu nge ke vwanda mutindu yina?»