14
Ntangu maza vwandaka talana dyaka ve
1 Yayi ni mambu yina Yave, zonzaka na Yelemya ntangu yina maza vwandaka talana dyaka ve.
2 «Yuda ke na kati ya bufwidi,
bambanza ya yandi ke na kubeba.
Bawu me vwanda na ntoto samu na bufwidi.
Kuyawula ya Yelusalemi ke na kukwenda na zulu.
3 Bantwadisi ke na kufidisa bisadi ya bawu na kwenda teka maza.
Ntangu bawu ke na kukuma na bizinga,
bizinga ke ya kuyuma.
Bawu ke na kuvutuka na mayuki ya mpamba.
Bawu ke na kwendaka yinama na nsoni,
mpe bawu ke na kwendaka bumba bizizi ya bawu.
4 Ntoto ya kuyuma ke na kwendaka pasuka
samu ti bamvula ke dyaka ve na yinsi.
Na yina, bisadi-bilanga ke na kwendaka bumba bizizi ya bawu na nsoni.
5 Na kati ya bilanga,
bankabi ke na kubutaka
mpe ke na kwendaka bika bana
samu ti matiti me yuma.
6 Bambuluku ya mfinda me telama
na zulu ya myongo yina ke na matiti ya mpamba
mpe bawu ke na kubenda mupepe na bambombo mutindu bambulu.
Meso ya bawu me lemba na kwendaka sosa matiti
kasi matiti ke dyaka ve.»
Bantu
7 «Kana masumu ya beto ke na kufunda beto,
Yave sala dyambu samu na Nkumbu ya nge!
Ya tsyelika, masumu ya beto me lutila
mpe ni na nge beto me sumuka.
8 Nge yina kele kivuvu ya Isayeli,
nge yina ke vuukisaka yandi
na ntangu ya mpasi,
samu na yinki nge ke na kusala mutindu nzenza na kati ya yinsi?
Samu na yinki nge ke na kusala mutindu muntu ya nzyetolo
yina ke na kulutisa kaka mpimpa?
9 Samu na yinki nge ke na kusala
mutindu muntu yina me kulemba,
mutindu kinwani yina lenda kuvuukisa ve?
Yave, na kutala mbote,
nge ke na kati-kati ya beto,
ni Nkumbu ya nge beto ke bokilaka,
kubika beto ve.»
*
10 Yave ke na kutuba na bantu yayi mutindu yayi: «Ee, bawu ke zolaka kwenda tambula kidi-kidi, bawu ke vwandaka ve kisika mosi.» Yave ke na kuyangalala na bawu ve. Na ntangu yayi, yandi ke na kubambuka moyo ya yimbi ya bawu mpe yandi ke na kufutisa bawu masumu ya bawu.
11 Yave tubaka na munu: «Kusambila ve samu na mbote ya bantu yayi. 12 Ata ti bawu kumina nsoki, mu ke kuwa ve kuyawula ya bawu. Ata ti bawu kupesa munu minkayulu ya kuyoka mpe makabu, mu ke ndima yawu ve. Mu ke manisa na kufwa bawu na mbele ya mvita, na nsatu ya kulutila mpe na biyoolo.»
13 Mu vutulaka: «Aa! Yave Nzambi, mimbikudi ke na kutubaka na bawu mutindu yayi: “Ba ke nwanisa beno ve, beno ke kufwa ve na nsatu, Kasi Nzambi, ke pesa beno luzingu ya mbote na kisika yayi.” »
14 Yave vutulaka na munu: «Mambu yina mimbikudi ke na kutuba na Nkumbu ya munu kele ya luvunu. Mu fidisaka bawu ve, mu pesaka bawu ntumunu ve, mu zonzilaka bawu ata dyambu ve. Kubikula yina ba ke na kubikula kele kaka balumoni ya luvunu. Bawu ke na kusalaka bambikululu ya kutengama. Bawu ke na kusadilaka bunganga samu na kutala mambu yina ke kwiza. Bawu ke na kusambilaka biteki. Nyonso yina ke kaka luvunu ya bantima ya bawu! 15 Ni yawu yina Yave, ke na kutuba mutindu yayi samu na mimbikudi yina yandi me fidisa ve kasi bawu ke na kubikula na Nkumbu ya yandi, bayina ke na kutuba ti na yinsi yayi bamvita ke vwanda ve, nsatu ya kulutila mpe ke vwanda ve: bawu ke manisa na kufwa na mbele ya mvita mpe na nsatu ya kulutila. 16 Na yina me tadila bantu yina bawu ke na kubikudilaka, nsatu ya kulutila mpe bamvita ke losa bawu na babalabala ya Yelusalemi. Ya ke vwanda ve na muntu samu na kutula bawu na ndyamu, ya vwanda bawu mosi, ya vwanda bana ya bawu ya babakala, to bana ya bawu ya bakento. Mu ke bwisila bawu yimbi yina bawu salaka.»
17 «Nge ke zonza na bawu mambu yayi:
«Mansangasa ya munu ke na kutangaka
mpimpa na ntangu, ata kulemba,
samu ti mukangu ya bantu ya munu,
ndumba ya munu ya kitoko
me tala mpasi ya kulutila.
Mputa ya yawu lenda kubeluka ve.
18 Kana mu kwenda na bilanga,
mu ke tala kaka bamvumbi ya bantu yina me kufwa na mvita.
Kana mu kota na kati ya mbanza,
mu ke tala kaka bantu yina ke na kufwa na nsatu.
Mimbikudi mpe banganga-Nzambi
ke na kutambula na yinsi nyonso
kasi bawu ke na kubakula ata kima ve.»
Bantu
19 «Mfumu, nge me manga Yuda?
Nge ke na kuyina Siyone?
Samu na yinki nge ke na kulwalisa beto
bamputa yina ke belukaka ve?
Beto vwandaka na kivuvu ti nyonso ke vwanda mbote,
kasi ata dyambu ya mbote ke na kusalama.
Beto vwandaka vingila ntangu ya kubeluka,
kasi ni boma ke na kulutila.
20 Yave, beto me zaba yimbi ya beto.
Beto me ndima yimbi yina salaka bankooko ya beto.
Beto me sala masumu na meso ya nge.
21 Samu na Nkumbu ya nge,
kumanga beto ve,
kuyina ve kiti ya kintinu ya nkembo ya nge.
Kukulula yawu ve.
Bambuka moyo, kuzenga ve ngwisani yina nge salaka na beto.
22 Na kati ya binzambi-nzambi ya makanda ya bantu,
ya kele na mosi yina ke nokisaka mvula?
Ni dizulu ke nokisaka mvula
to ni nge Yave, Nzambi ya beto?
Ni na nge beto me tula kivuvu ya beto,
samu ti ni nge ke salaka nyonso yina.»