17
Yave lakisaka yimbi ya bantu ya Yuda
1 «Yimbi yina bantu ya Yuda salaka
kele mutindu bisono ba sonikaka
na kisonokono ya kisengo
mpe na dyamane.
Yawu ke ya kusonama na bantima ya bawu
mpe na bansongi ya biyokolo ya bawu ya minkayulu.
2 Mpe bana ya bawu ke bambuka moyo
na biyokolo ya bawu ya minkayulu,
mpe makunzi ya bawu ya longo ya banzambi ya kento Asela,
pene-pene na bayinti ya bawu ya makasa ya maza
yina kele na zulu ya myongo ya fyoti.
3 Beno bantu ya Yuda,
beno yina ke kwendaka sambila banzambi ya luvunu
na zulu ya myongo, mpe na matiti,
mu ke sala ti ba botola bimvwama ya beno,
bima nyonso ya beno
mpe bisika ya beno ya lusambulu yina kele na zulu ya myongo.
Yawu kele difuta samu na yimbi yina beno salaka
na ntoto nyonso ya beno.
4 Beno mosi, beno ke bika mvwilu yina mu pesaka beno.
Mu ke yekula beno na maboko ya bambeni ya beno
na yinsi yina beno zaba ve,
samu ti beno me pesa munu nkele
mpe yawu ke manisa ve.»
Lukengolo ya luvunu, lukengolo ya tsyelika
5 Yave ke na kutuba:
«Mu ke siinga muntu yina ke tula kivuvu ya yandi na muntu,
mu ke siinga muntu yina ke sosa ngolo ya yandi na bantu,
mu ke siinga muntu yina ke pesa Yave manima.
6 Muntu yango ke vwanda mutindu mwa
yinti na kati ya yinsi ya kuyuma,
yandi ke kuzwa ve bumbote.
Yandi ke vwanda kaka kuna na kati ya
ntoto yina ba mwangisaka mungwa,
kisika yina ata muntu ke zingaka.
7 Kasi mu ke sakumuna muntu yina
ke tula kivuvu ya yandi na Yave.
Yave ke kuma lukengolo ya yandi.
8 Yandi kele mutindu yinti yina ba kundaka pene-pene ya maza,
myanzi ya yawu kele tii na kati ya mwila.
Yinti yango ke talaka boma ve na ntangu ya tiya
mpe makasa ya yawu ke yumaka ve.
Na ntangu ya kisiwu, yandi ke yawulaka ve,
yawu ke bikaka ve na kubuta bambuma.
9 «Ntima ya muntu ke vunaka mingi.
Yawu ke na kimbevo yina ke belukaka ve,
nani lenda zaba yawu?
10 «Munu Yave, mu ke fyongoninaka ntima ya muntu,
mu ke talaka mambu yina kele
ya kubumbama na kati ya yandi.
Mu ke pesa muntu difuta yina
me lunga na ndyatulu ya yandi mpe na mavanga ya yandi.
11 Mutindu ngwadi ke vwandilaka meki yina
yandi me buta ve,
ni mutindu yina mpe kele
muntu yina me kuzwa bimvwama
yina yandi me kuzwa na mutindu ya yimbi.
Na bilumbu ke kwiza,
yandi ke bika yawu mpe yandi ke kuma
muntu ya mpamba mutindu kilawu.»
Yave, yinto ya maza ya luzingu
12 Kubanda na mbandukulu tii ntangu yayi,
ya kele na kiti ya kintinu ya nkembo,
ni kuna kele Yinzo ya beto ya longo.
13 Yave, nge kele kivuvu ya Isayeli.
Nsoni samu na bayina ke manga nge!
Bayina ke na kupesa nge manima,
bankumbu ya bawu ke ya kusonama
na fundu-fundu ya ntoto.
Bawu me manga nge Mfumu,
nge yina kele yinto ya maza yina ke pesaka luzingu.
Lusambulu ya Yelemya
14 Yave, belusa munu mpe mu ke beluka,
vuukisa munu mpe mu ke vuuka,
samu ti, ni nge mu ke kembilaka.
15 Bantu nyonso ke na kutuba na munu:
«Wapi sika me kwenda bankebosolo ya Yave?
Bika ti yawu kusalama!»
16 Munu, mu mangaka ve na kuvwanda muvungi.
Mu zolaka ve ti kilumbu yayi ya mpasi kukumina munu.
Nge zaba mambu nyonso yina mu zonzaka.
17 Kusala ve ti mu tekita na boma,
nge yina kele kiswamunu ya munu
na kilumbu ya mpasi.
18 Bika ti bayina ke kwamisaka munu,
kutala nsoni kasi munu ve.
Bika ti bawu tala mpasi, kasi munu ve.
Sala ti kilumbu ya mpasi kukumina bawu,
manisa na kufwa bawu nyonso.
Mbokolo samu na kuzitisa kilumbu ya Saba
19 Yave tubaka na munu mutindu yayi: «Kwenda mpe telama na mwelo ya mbanza, yina ba ke bokilaka mwelo ya Bantu, na kisika yina ke kotilaka mpe ke basikilaka bantinu ya Yuda. Sala mpe mutindu mosi na myelo nyonso ya mbanza Yelusalemi. 20 Nge ke tuba na bawu mutindu yayi: “Beno kuwa mambu ya Yave, beno bantinu mpe bantu nyonso ya Yuda, beno bantu nyonso yina ke zingaka na Yelusalemi, beno bayina ke lutaka na myelo ya yawu, 21 Yave ke na kutuba: Na kilumbu ya Saba, ata muntu ke nanguna mufuna mpe kulutisa yawu na myelo ya Yelusalemi. 22 Na kilumbu ya Saba, beno kubasisa ve mifuna na bayinzo ya beno. Beno ke sala ata kisalu mosi ve. Kasi beno ke sala ti kilumbu ya Saba kuvwanda kilumbu ya longo mutindu mu tumisaka yawu na bankooko ya beno. 23 Bawu kuwaka ve, ba kangaka makutu ya bawu. Ba salaka yintu-ngolo na kumanga na kuwa mpe na kundima ve malongi.»
24 Yave ke na kutuba: «Kana beno kuwa munu mbote, kana beno kotisa ve mifuna na myelo ya mbanza yayi na kilumbu ya Saba, kana beno bakila kilumbu yayi mutindu kilumbu ya longo, mpe beno sala ve ata kisalu na kilumbu yango, 25 bantinu na bamfumu ke kota na myelo ya mbanza yayi, bawu ke vwanda ya kuvwanda na kiti ya kintinu ya Davidi, bawu ke tambula na zulu ya bampunda mpe na bipusu-pusu ya mvita, bawu na bamfumu ya bawu. Bantu ya Yuda na bantu yina ke zingaka na Yelusalemi ke tatamana na kuzinga na mbanza yayi bantangu nyonso. 26 Bantu ke banda na kukatukaka na bambanza ya Yuda, mpe na bambanza yina kele pene-pene ya Yelusalemi, yinsi ya Bezame, yinsi ya Sefela, mongo ya Nengeve, samu na kwizaka pesa minkayulu, minkayulu ya kuyoka, minkayulu ya mutindu ya nkaka, maaka ya nsunga ya mbote mpe minkayulu ya kuvutula matondo na Yinzo ya Yave. 27 Kasi, kana beno kuwa munu ve na yina me tadila mbyekolo ya kilumbu ya Saba, kana na kilumbu yango beno luta na myelo ya Yelusalemi na bifunda ya dema, mu ke namisa tiya na mwelo ya mbanza. Yawu ke yoka bayinzo ya beno ya kitoko mpe tiya yango ke kufwa ve.»