18
Yelemya na yinzo ya kisadi-bambinda
1 Mambu ya Yave kuminaka Yelemya mutindu yayi: 2 «Yelemya, baka nzila, kwenda na sika ya kisadi-bambinda mpe ni kuna mu ke zabisa nge mambu ya munu.»
3 Mu kwendaka na sika ya kisadi-bambinda. Yandi vwandaka sala kisalu na kisalulu ya yandi yina ke balukaka. 4 Yandi vwandaka sala mutindu ba ke salaka samu na kuyidika konso mbinda, ntangu kibuma ke vwandaka na maboko ya kisadi-bambinda. Kana mbinda yina yandi ke na kuyidika me bonga ve, yandi vwandaka pasula yawu mpe yandi vwandaka yidika mbinda ya nkaka ya mutindu yandi zolaka. 5 Na yina, mambu ya Yave kuminaka munu mutindu yayi: 6 «Beno bantu ya Isayeli, beno ke na kubanza ti mu lenda sala ve mutindu kisadi yayi ya bambinda? Na kati ya diboko ya munu, beno kele mutindu kibuma na diboko ya kisadi-bambinda. 7 Bantangu ya nkaka, mu ke tubaka samu na yinsi to samu na yinsi ya kintinu, samu na kutimuna yawu, kubwisa mpe kumwangisa yawu. 8 Kasi, kana bantu ya yinsi yango bika na kusala yimbi yina ke na kusala ti mu semba bawu, mu ke soba mabanza ya munu mpe mu ke sala dyaka ve yimbi yina mu kanikinaka na kusala bawu. 9 Bantangu ya nkaka, mu ke tubaka samu na yinsi to samu na yinsi ya kintinu, samu na kutunga mpe kukunda. 10 Kasi, kana bantu ya yinsi yina kusala mambu yina mu ke zolaka ve mpe bawu kuwa ve bankebosolo ya munu. Na yina, mu ke soba mabanza ya mbote yina mu kanikinaka na kusala bawu.
11 «Na ntangu yayi, nge Yelemya, kwenda zabisa na bantu ya Yuda mpe na bantu yina ke zingaka na Yelusalemi: “Yave ke na kutuba: Mu me kubika mambu ya mpasi samu na beno, mu me yidika mambu ya kyadi samu na beno. Konso muntu kuviluka na yina me tadila nkadulu ya beno ya yimbi. Ya tsyelika, beno soba ndyatulu ya beno mpe mutindu ya beno ya kusadila.” »
12 Kasi bawu ke na kutuba: «Yawu me tala beno ve, beto ke sala yina beto bakaka lukanu na kusala, konso muntu na kati ya beto ke sala mambu ya yimbi yina kele na kati ya ntima ya yandi.»
Isayeli me zimbana Mfumu ya yandi
13 Ni yawu yina, Yave ke na kutuba:
«Beno kwenda na bayinsi ya nkaka
beno sosa kuzaba kana ba me kuwaka
dyambu ya mutindu yayi!
Dyambu yina Isayeli, ndumba ya kitoko, me sala,
kele yimbi mosi ya kulutila.
14 Beno me talaka ti neze*Neze kele mvula yina ke vwandaka na maza ya mpembe mutindu matadi. me manisaka
na zulu ya myongo ya Libane?
Beno me talaka ti maza ya kitoko ya
bamwila yina ke katukaka ke na kuluta dyaka ve?
15 Kasi, bantu ya munu me zimbana munu,
bawu ke na kuyokaka maaka ya nsunga ya mbote ya mpamba
bayina ke salaka ti bawu bula mabaku na nzila ya bawu.
Bawu bikaka banzila ya bankooko ya bawu
mpe bawu me landa banzila ya kuzabakana ve.
16 Bawu me kumisa yinsi mutindu kisika ya kumwangana,
yawu me kuma kisika ya boma mingi bantangu nyonso.
Bayina nyonso ke banda na kulutaka kuna,
bawu ke yituka, ke tekita na boma mpe ke ningisa yintu.
17 Mu ke fidisa bambeni samu na kwiza nwanisa bantu ya munu.
Mutindu mupepe ya esete ke nangunaka fundu-fundu,
ba ke mwangisa bawu.
Na kilumbu yina ya kyadi, mu ke pesa bawu manima,
mu ke tala bawu ve.»
Ba sadilaka Yelemya mfundu, lusambulu ya mumbikudi
18 Bantu ya nkaka vwandaka tuba: «Beto sadila Yelemya mfundu ya yimbi. Samu ti beto ke kondwa ve banganga-Nzambi yina lenda longa beto to bantu ya ndwenga yina ke pesa beto malongi to mimbikudi yina ke zabisa beto Musiku ya Nzambi. Beto vunina yandi mambu, beto meka ve na kuwa mambu ya yandi.»
19 Yave kuwa munu,
tala bamfundu yina bambeni
ke na kusala samu na munu.
20 Ba ke vutulaka yimbi
na muntu yina me sala mbote?
Ba ke na kusadila munu mutambu.
Bambuka moyo ti mu vwandaka ya kutelama na ntadisi ya nge
na kulombaka samu na bawu,
samu ti nge bika na kulakisa bawu nkele ya nge.
21 Na yina, yekula bana ya bawu na nsatu,
kufwa bawu na mbele ya mvita.
Bika ti bakento ya bawu kufwila bana
mpe babakala ya bawu.
Bika ti babakala mpe bantwenya,
bawu kufwa na mbele ya mvita,
na kati ya mvita!
22 Bika ti makelele ya kyadi
kuwakana na kati ya bayinzo ya bawu,
ntangu nge ke fidisa bawu nkonga ya bimpumbulu na mpamukunu!
Samu ti bawu me timuna mabulu samu na kubwila munu,
mpe bawu me kubika bampwasa
samu na kutambila munu yawu na makulu.
23 Nge Yave, nge me zaba mbote
mabanza nyonso ya bawu ya yimbi samu na munu.
Kulemvokila ve yimbi ya bawu,
kuzimbana ve disumu ya bawu.
Bika ti bawu kubwa na mantwala ya nge,
pesa bawu kitumbu samu ti bawu kutala nkele ya nge!