30
Bansilulu ya Nzambi samu na yinsi ya kintinu ya Isayeli
1 Mambu ya Yave kuminaka Yelemya mutindu yayi:
2 «Yave, Nzambi ya Isayeli, ke na kutuba mutindu yayi: Sonika na kati ya dibuku mambu nyonso yina mu me zonza na nge. 3 Yave ke na kutuba: Bilumbu ke na kukwiza, yina mu ke vutula bantu ya munu, Isayeli mpe Yuda, mutindu bawu vwandaka ntete. Mu ke vutula bawu na yinsi yina mu pesaka na bankooko ya bawu, mpe bawu ke baka yawu mutindu mvwilu ya bawu. Ni Yave me tuba yawu.»
4 Yayi ni mambu yina Yave zonzaka na yina me tadila Isayeli mpe Yuda. 5 Yave ke na kutuba:
«Beto ke na kuwa makelele ya nsisi.
Boma me kuma, kizunu ke dyaka ve.
6 Beno sosa na kuzaba
kana bakala me butaka mwana.
Samu na yinki mu ke na kutala
babakala nyonso maboko na bivumu
mutindu bakento na kati ya mpasi ya kubuta?
Samu na yinki bizizi nyonso me soba?
7 Kyadi! Yayi ke kilumbu ya nsisi
mpe ata kilumbu me fwanana na kilumbu yayi.
Ya ke ntangu ya mpasi
samu na bantu ya Yakobi!
Kasi bawu ke vuuka.»
*
8 Yave, Nzambi ya Binwani, ke na kutuba: «Mu ke mwangisa kizitu yina kele na magembo ya bawu, mu ke zenga basinga ya bawu. Mpe bawu ke vwanda dyaka ve mindongo ya banzenza. 9 Bawu ke sadila munu Yave, Nzambi ya bawu, mpe Davidi ntinu ya bawu yina mu ke tedimisila bawu.»
*
10 Yave ke na kutuba:
«Nge kisadi ya munu Yakobi,
kutala boma ve.
Nge Isayeli, kulemba ve.
Samu ti mu ke na kwiza kuula nge
na bisika yina ya ntama.
Mu ke na kwiza vuukisa bana ya nge
na yinsi yina ba nataka bawu na ngolo.
Yakobi ke vutuka, yandi ke vwanda na kizunu
mpe yandi ke nata luzingu mosi ya mbote.
Ata muntu ke kwamisa dyaka yandi.»
11 Yave ke na kutuba:
«Mu kele kintwadi na beno samu na kuvuukisa beno.
Mu ke manisa na kufwa makanda ya bantu
yina kele na bisika yina mu mwangisaka beno,
kasi beno mu ke manisa ve na kufwa beno.
Kasi mu ke semba beno na ludedomo nyonso.
Mu lenda bika ve beno ata kitumbu.»
*
12 Yave ke na kutuba:
«Yimbi ya nge kele ya kulutila.
Mputa ya nge lenda beluka ve.»
13 «Ata muntu ke na kubaka bunkete ya nge,
ata muntu ke na belusa mputa ya nge.
Ya kele ve na manganga ya ngolo,
yina lenda simba na kimbemvo ya nge.»
14 «Bayina nyonso vwandaka zola nge me zimbana nge.
Bawu ke na kusosa dyaka nge ve.
Ya tsyelika mu me bula nge mutindu mbeni ke bulaka.
Mu me pesa nge kitumbu ya nsisi,
samu na yimbi ya nge ya kulutila,
samu na masumu ya nge ya mingi-mingi.»
15 «Samu na yinki nge ke na kuyawula na mambu yina nge ke na kutala?
Samu na yinki nge ke na kuyawula na mpasi yina nge ke na kutala?
Mu me sala nge mutindu yina
samu na yimbi ya nge ya kulutila,
samu na masumu ya nge ya mingi-mingi.»
16 «Kasi bayina nyonso ke na kutalisa nge mpasi,
ba ke talisa bawu mpasi.
Bambeni ya nge nyonso,
ba ke nata bawu nyonso na ngolo na yinsi ya nzenza.
Bayina ke na kumwangisa mvwilu ya nge,
ba ke mwangisa mvwilu ya bawu.
Bayina nyonso ke na kubotola mvwilu ya nge,
mu ke yekula mvwilu ya bawu samu ba botola bawu yawu.»
17 «Samu ti mu ke natina nge lunyakusu,
mu ke belusa bamputa ya nge.
Ni Yave me tuba yawu.»
*
Bawu ke na kubokila nge: «Ba me losa,
Siyone yina ba ke na kubanzila dyaka ve.»
Ni yawu yina 18 Yave ke na kutuba:
«Mu ke vutula makanda ya Yakobi mutindu yawu vwandaka ntete.
Mu ke fwila bayinzo ya yandi kyadi.
Mazanza ke tungama dyaka na bisika yina yawu mwanganaka.
Bayinzo ya kitoko ke tungama dyaka na bisika yina yawu vwandaka ntete.
19 Na kati ya bawu ke wakana mikunga
mpe kuseka ya kyese.
Mu ke funisa bawu,
lutangu ya bawu ke kuluka ve.
Mu ke sala ti bantu kuzitisa bawu.
Ba ke tala dyaka bawu ve mutindu bantu ya mpamba.
20 Bana ya Yakobi ke vwanda mutindu na ntangu ya ntama.
Bantu ya yandi ke yonzama dyaka na ntadisi ya munu.
Mpe mu ke pesa kitumbu na bayina nyonso ke nyokola bawu.
21 Mfumu ya bawu ke vwanda muntu ya bawu mosi.
Ntwadisi ya bawu ke basika na kati-kati ya bawu mosi.
Mu ke sala ti yandi kubelama na munu,
mpe yandi ke kwiza pene-pene na munu.
Ya tsyelika ata muntu lenda belama na munu na luzolo ya yandi mosi
kana mu me bokila yandi ve.
Ni Yave me tuba yawu.
22 Na yina, beno ke kuma bantu ya munu
mpe munu, mu ke kuma Nzambi ya beno.»
*
23 Beno tala mupepe ya ngolo ya Yave.
Nkele ya yandi ke na kuningisa.
Mupepe ya ngolo ke na kukwiza,
kimbongila ya nene ke na kukwiza
na zulu ya bayintu ya bayina salaka yimbi.
24 Nkele ya nene ya Yave ke manisa ve
kana yandi me sala ve mpe me lungisa ve
mambu yina yandi kubikaka na ntima ya yandi.
Na bilumbu yina ke kwiza, beno ke bakula yawu.