31
*
1 «Yave ke na kutuba: Kilumbu ke kwiza yina mu ke vwanda Nzambi ya makanda nyonso ya Isayeli, mpe bawu ba ke vwanda bantu ya munu.»
Mvutukulu ya bantu ya Isayeli na yinsi ya bawu
2 Yave ke na kutuba:
«Na yinsi ya kuyuma, bawu kuzwaka mulemvo na sika ya munu,
bayina kufwaka ve na mbele ya mvita.
Na yina, Isayeli ke kwenda na kisika yina bawu ke vwanda na kizunu.
3 Yandi vwandaka tuba:
“Yave me katuka ntama
mpe yandi me kwiza talana na munu:”
“Mu zola nge na luzolo ya seko.
Ni yawu yina mu ke kaka ya kukwikama na nge.
4 Isayeli ya kitoko, mu ke tunga dyaka nge,
mpe nge ke vwanda ya kutungama.
Nge ke baka dyaka bangoma ya nge ya kitoko.
Nge ke kota na kati-kati ya mabina ya bantu yina kele na kilengi.
5 Nge ke banda na kukunda dyaka
bilanga ya bayinti ya vinu na myongo ya Samaliya.
Ba yina ke kunda yawu, bawu ke yonzika bambuma ya yawu.
6 Ya tsyelika kilumbu ke na kukwiza
yina minkebi ke looka na kizunga ya myongo ya Efalayime ti
beto kwendeno na Siyone,
na sika ya Yave, Nzambi ya beto.”»
*
7 Ya tsyelika Yave ke na kutuba:
Beno kembila samu na Yakobi.
Beno sala milolo ya nsayi samu na dikanda ya bantu
ya kulutila makanda nyonso ya bantu.
Beno wakisa ba aleluya ya beno.
Beno tuba:
«Yave, vuukisa bantu ya nge,
vuukisa bantu ya Isayeli yina me bikana!»
8 «Mu ke katula bawu na yinsi ya node,
mu ke yonzika bawu katuka na nsuka ya ntoto.
Na kati ya bawu, kele bampofo,
bantu ya bifuma na makulu,
bakento ya bivumu
mpe bakento yina ke na mpasi ya kubuta.
Ya ke mukangu ya nene ya bantu ke na kukwiza kwaku.
9 Bawu ke na kukwiza na kudila nyonso.
Mu ke na kunata bawu na biyawula nyonso ya bawu.
Mu ke na kunata bawu na mizumba ya maza,
na nzila ya mbote yina kele ve na mabaku,
kisika yina bawu lenda kubwa ve.
Samu ti mu kele tata samu na Isayeli.
Mpe Efalayime kele mwana ya munu ya ntete.»
*
10 «Beno makanda ya bantu,
beno kuwa mambu ya Yave,
mpe beno samuna yawu na bayinsi yina kele ntama.»
Beno tuba:
«Yave yina mwangisaka Isayeli ke vuukisa yandi.
Yandi ke keba yandi mutindu muvungi ke kebaka bibulu ya yandi.
11 Samu ti Yave ke na kukuula Yakobi.
Yandi ke na kukuula yandi na maboko ya mbeni yina me lutila yandi ngolo.
12 Bawu ke kwiza mpe bawu ke sala milolo ya nsayi
na mongo ya Siyone.
Bawu ke kwiza baka bimvwama yina Yave kubikaka samu na bawu:
bambuma ya faline, vinu ya malu-malu, mafuta ya malu-malu,
mameme, bankombo, mpe bangombe.
Bawu ke vwanda mutindu nsaba yina ba ke mwangaka maza,
bawu ke beba ve.
13 Na yina, bandumba ke yangalala na mabina,
bantwenya mpe biboba ke yangalala kintwadi.
Mu ke kitula bufwidi ya bawu na nsayi.
Mu ke bomba bawu.
Mu ke pesa bawu kyese na manima ya bankwamusu ya bawu.
14 Mu ke yukutisa banganga-Nzambi na ngombe ya mafuta.
Bantu ya munu ke yukuta bima ya munu ya kulutila kitoko.»
Ni Yave me tuba yawu.
*
15 Yave ke na kutuba:
«Biyawula ke na kuwakana na mbanza Lama.
Bidilu ya kyadi ke na kuwakana.
Ni Lasele ke na kudila bana ya yandi.
Yandi ke na kumanga ti ba bomba yandi
samu na bana ya yandi,
bana ya yandi kele dyaka ve.»
16 Kasi Yave ke na kutuba mutindu yayi:
«Kudila dyaka ve, kubasisa dyaka ve mansangasa ya nge.
Samu ti nge ke kuzwa musendo ya mpasi ya nge.
Bana ya nge ke katuka yinsi ya bambeni,
bawu ke vutuka.
Ni Yave me tuba yawu.»
17 Na yina, ya kele na kivuvu samu na bana ya nge.
Bana ya nge ke vutuka na yinsi ya bawu.
Ni Yave me tuba yawu.
18 Mu kuwaka mbote
mutindu Efalayime vwandaka yawula na kutuba:
«Nge me semba munu, mu me kuzwa masembo ya nge.
Nge me bakila munu mutindu ngombe ya mbakala ya ntwenya,
yina ba me sadisaka ntete ve kisalu.
Kasi, vutula munu na sika ya nge,
mpe mu ke vutuka na sika ya nge.
Samu ti ni nge Yave, Nzambi ya munu.
19 Mu pesaka nge mukongo,
kasi mu ke na kunyonga samu na yawu.
Awa mu me bakula yimbi ya munu,
mu zola ata fyoti ve mambu yina mu salaka,
mpe mu ke na kubula mabunda ya munu samu na nsoni.
Mu me kufwa nsoni,
mu ke na kutala nsoni ya kulutila.
Samu ti yimbi yina mu salaka na buntwenya ya munu
ke na kulanda munu.
20 Efalayime kele ve mwana ya munu ya ntima?
Ni yandi ve mwana yina mu ke zolaka?
Konso ntangu yina mu ke zonzila samu na yandi,
mu fwana kutangunaka kaka nkumbu ya yandi bambala mingi.
Ntima ya munu ke babaka samu na yandi.
Mu ke talaka yandi kyadi mingi.
Ni Yave me tuba yawu.»
*
21 Isayeli ndumba ya kitoko, tula bidimbu na nzila ya nge,
telemisa makunzi na nzila yina nge ke na kulanda.
Sala keba na nzila yina nge me baka,
nzila yina nge ke na kulanda.
Vutuka, vutuka kwaku na bambanza ya nge!
22 Nge kento yayi yina me balukila munu,
tii wapi ntangu nge ke kwenda yenga-yenga?
Yave ke na kunata dyambu ya malu-malu na ntoto.
Ni kento ke na kwendaka sosa ti bakala kuzola yandi.
*
Ntungulu ya malu-malu ya Yuda mpe ngwisani ya malu-malu
23 Yave, Nzambi ya Binwani, Nzambi ya Isayeli, ke na kutuba: «Ntangu mu ke yidika dyaka yinsi ya Yuda mpe bambanza ya yawu, ba ke tuba dyaka mutindu yayi:
«Bika ti Yave kusakumuna nge,
nge yinzo ya ludedomo,
nge mongo ya longo!»
24 Na ntangu yango yina, bantu ya Yuda yina ke vwandaka na babwala mpe bayina ke vwandaka na bambanza, bawu nyonso ke kuzwa yinsi na kintwadi. Bayina ke salaka bilanga, na bayina ke kwendaka tambula na bibulu ya bawu. 25 Samu ti mu ke pesa maza na bayina me lemba, mu ke pesa madya na bayina kele dyaka ve na ngolo. 26 Na manima, mu me vumbuka, mu me fungula meso. Mu me tala ti pongi ya munu vwandaka pongi mosi ya mbote.
27 «Kaka mwa ntangu fyoti me bikana, mu ke funisa bantu mpe bibulu na bayinsi ya bintinu ya Yuda mpe ya Isayeli, mutindu ba ke mwangaka bambuma na bilanga. Ni Yave ke na kutuba yawu. 28 Mu salaka nyonso samu na kutimuna mpe kubwisa bawu, kupasula, kumwangisa bawu, mpe kutalisa bawu mpasi. Ni mutindu mosi mpe mu ke sala nyonso samu na kutunga mpe kutelemisa bawu. Ni Yave me tuba yawu.» 29 Na ntangu yina, ata muntu ke zonza dyaka kingana yayi:
«Ni batata kudyaka bambuma ya nkunzu ya vinu
Kasi ni bana ke na kutala mpasi na meno.»
30 Muntu-muntu ke kufwa samu na disumu ya yandi mosi. Konso muntu yina ke kudya bambuma ya nkunzu ya vinu, ni yandi mosi ke tala mpasi na meno.
31 Yave ke na kutuba: «Bilumbu ke na kukwiza, yina mu ke sala ngwisani ya malu-malu na dikanda ya Isayeli mpe ya Yuda. 32 Yawu ke vwanda ve mutindu ngwisani yina mu salaka na bankooko ya bawu na kilumbu yina mu bakaka bawu na maboko samu na kubasisa bawu na yinsi ya Ngipiti. Ngwisani yango yina, bawu zengaka yawu ata ti mu kele Mfumu ya bawu. Ni Yave me tuba yawu. 33 Kasi ngwisani yina mu ke sala na bantu ya Isayeli ke vwanda mutindu yayi: Na manima ya bilumbu yina, mu ke tula Musiku ya munu na kati ya bawu. Mu ke sonika Musiku ya munu na bantima ya bawu. Mu ke vwanda Nzambi ya bawu, mpe bawu, bawu ke vwanda bantu ya munu. Ni Yave me tuba yawu. 34 Ya ke vwanda dyaka ve na muntu yina ke longisa bampangi ya yandi to bayina ke vwandaka na yandi na kutuba ti: “Beno zaba Yave!” Samu ti bawu nyonso ke zaba munu, kubanda mwana ya kulutila fyoti tii na muntu ya kulutila kukula. Mu ke lemvokila yimbi ya bawu, mu ke bambuka dyaka ve moyo na masumu ya bawu.»
*
35 Yave ke na kutuba,
Yave, yina ke basisaka ntangu samu na kukyenzola na ntangu,
Yave, yina ke pesaka bantumunu na ngonda mpe bambwetete
samu na kukyenzola na mpimpa,
Yave, yina ke ningisaka mubu
samu na kuwakisa makelele ya bimpo,
Nkumbu ya yandi ni Yave, Nzambi ya Binwani.
36 Yandi ke na kutuba mutindu yayi:
«Kana bantumunu yina kwiza suka na mantwala ya munu»,
«bana ya Isayeli mpe
ke vwanda dyaka ve dikanda ya bantu
na mantwala ya munu bantangu nyonso.»
37 Yave ke na kutuba mutindu yayi:
«Kana dizulu ba lenda kuteza yawu na zulu,
kana balufulu ya ntoto ba lenda kufyongonina na yisi,
munu mpe mu ke losa bana nyonso ya Isayeli,
samu na nyonso yina bawu me sala.»
Ni Yave me tuba yawu.
*
38 Yave ke na kutuba: «Bilumbu ke na kukwiza, yina ba ke tunga dyaka mbanza yayi ya Yelusalemi samu na Yave, kubanda na yinzo ya mutela ya yinda ya Ananeele tii na Mwelo ya Nsongi. 39 Ba ke fungula dyaka singa ya kutezila. Yawu ke kwenda ya kusungama tii na mongo ya fyoti ya Ngalebe, mpe yawu ke baluka na lweka ya Ngowa. 40 Mudimba nyonso ya bamvumbi mpe bombi ya mafuta, kizunga nyonso yina kele na mudimba ya Sedelone tii na nsongi ya Mwelo ya Bampunda, kuna na esete, nyonso yina ke vwanda ya Yave. Kima ve ba ke timuna kuna, kima ve ba ke zenga kuna.»