yandi siingaka kilumbu ya yandi ya mbutukulu. 2 Yobi tubaka mutindu yayi:

3 Bika ti kilumbu yina mu butukaka kuzimbana.

Bika ti mpimpa yina tubaka ti:

mwana ya bakala me yilama na kati ya kivumu!

4 Bika ti kilumbu yina mu butukaka,

yawu kuvwanda kilumbu ya kitombe ya kulutila.

Nzambi kubambuka ve moyo na yawu,

nsemo kulezima ve na kilumbu yina.

5 Bika ti kitombe ya ngolo mpe kitombe ya lufwa,

yawu kufuka kilumbu yina.

Bika ti dituti ya ndombe kufuka yawu,

to ngonda kuvukana na ntangu.

6 Na yina me tadila mpimpa yina,

bika ti kitombe ya kulutila kufuka yawu.

Yawu kuvwanda ve na kati ya lutangu ya bilumbu ya mvula,

bika ti yawu kukota ve na lutangu ya bangonda.

7 Ya tsyelika, bika ti na mpimpa yina ata mwana kubutuka,

bika ti milolo ya nsayi kuwakana ve.

8 Bika ti mpimpa yina, ba kusiinga yawu na bayina ke siingaka bilumbu,

bayina ke zabaka na kuvumbula kibulu ya nsisi ya mubu.

9 Bika ti kitombe kufuka bambwetete ya suka-suka!

Bika ti kilumbu yango kusosa nsemo, kasi nsemo ke talana ve.

Kilumbu yango kutala ve nsemo ya suka-suka.

10 Samu ti yawu kangaka ve kivumu yina mu basikilaka,

samu ti yawu me kabikisa ve bampasi yayi mu ke na kutala.

11 Samu na yinki mu kufwaka kwandi ve na kati ya kivumu ya mama ya munu?

Samu na yinki mu kufwaka kwandi ve ntangu mu vwandaka basika na kivumu ya yandi?

12 Samu na yinki ba tulaka munu na nkata?

Samu na yinki mama ya munu pesaka munu mabene?

13 Ya tsyelika na ntangu yayi,

mu zolaka vwanda ya munu ya kulala,

mu zolaka vwanda na kizunu.

Mu zolaka lala mpongi, mu zolaka pema,

14 na bantinu mpe bamfumu ya ntoto,

bayina ke tungisaka bandyamu ya nene mpe ya kitoko.

15 Mu zolaka vwanda na bamfumu yina kele na wolo

mpe bayina ke fulusaka bayinzo ya bawu na palata.

16 Mu zolaka vwanda mutindu mwana yina butukaka ya kufwa,

mwana yina ba kundaka.

Mu zolaka vwanda mutindu bana yina talaka ve nsemo.

17 Kuna na kati ya bampyema, bantu ya yimbi ke kwamisaka dyaka ve bantu.

Kuna, ke pemaka bayina me lemba, bayina kele dyaka ve na ngolo.

18 Bankole me kuzwa kizunu,

bawu ke na kuwa dyaka ve ndinga ya muntu yina ke kwamisaka bawu.

19 Bakuluntu nyonso na bana ya fyoti me kuma kisika mosi.

Mundongo kele dyaka ve na yisi ya lutumu ya mfumu ya yandi.

20 Samu na yinki Nzambi ke pesaka nsemo na muntu ya mpasi?

Samu na yinki yandi ke pesaka luzingu na bayina ke na manyongo na ntima?

21 Bawu ke na kuvingila lufwa kasi yawu ke na kukwiza ve.

Bawu ke na kusosa yawu kulutila bimvwama ya kubumbama.

22 Bawu ke yangalala mingi ntangu ba ke tula bawu na ndyamu!

23 Samu na yinki, kupesa luzingu na muntu yina zaba ve kisika ya kukwenda.

Yandi me kuma mutindu muntu yina Nzambi me zunga na balweka nyonso.

24 Kuyawula me kuma ni madya ya munu,

bidilu ya munu me kuma mutindu maza ke na kubasika na mukelo.

25 Dyambu yina mu ke na kutala boma, ni yawu ke na kukumina munu,

Dyambu yina ke na kutalisa munu boma ya kulutila, ni yawu ke na kubwidila munu.

26 Mu ke dyaka ve na ngemba, mu ke dyaka ve na kizunu,

mu ke na kupema dyaka ve,

kaka ni bankwamusu ke na kulanda munu.