2 Kana mu zonzila nge dyambu, nge ke ndima yawu?

Mu lenda tatamana ve na kuvwanda kaka swii.

3 Nge longaka bantu mingi,

nge kindisaka bayina vwandaka ya kulemba.

4 Mambu ya nge vwandaka telemisa bayina zolaka kubwa,

mambu ya nge vwandaka pesa ngolo samu ti bawu tatamana na kutambula.

5 Kasi na ntangu yayi, ya me kuma ni nge, nge me lemba!

Mutindu mpasi me bwidila nge, nge me kuma na boma ya kulutila!

6 Kuzitisa yina nge ke zitisaka Nzambi, ni yawu ve kele kiyekamanu ya nge?

Kusungama ya nge, ni yawu ve kele kivuvu ya nge?

7 Mulemvo ya nge, bambuka moyo:

Nge me talaka muntu yina me sala ata dyambu me kufwa?

To bantu ya kusungama manisa na kuzimbana?

8 Mu me tala ti bayina ke salaka yimbi,

bayina ke kundaka mpasi,

bawu ke yonzikaka bambuma ya yawu.

9 Bawu ke zimbanaka na mpeve ya Nzambi,

bawu ke manisaka na kufwa na mupepe ya nkele ya Nzambi.

10 Nkosi lenda kuduma ya yandi, yingo mpe lenda kuduma,

kasi Nzambi ke zengaka meno ya bana ya bankosi.

11 Nkosi ke kufwaka na nsatu samu ti madya kele ve,

mpe bana ya yandi ke mwangana.

12 Dyambu mosi vwandaka me wakana na mansweki,

mpe dikutu ya munu me kuwa kunyunguta.

13 Ntangu boma ya kulutila ke simbaka bantu na kati ya balumoni ya mpimpa,

ntangu bantu ke vwandaka na kati ya pongi mosi ya ngolo,

14 nzutu ya munu ke fulukaka na boma,

binama nyonso ya nzutu ya munu ke tekitaka.

15 Mupepe mosi lutaka na kizizi ya munu,

bansuki nyonso ya munu ya nzutu telamaka.

16 Muntu mosi vwandaka ya kutelama kuna, mu zabaka yandi ve,

kasi mu talaka kinsinsya na mantwala ya munu.

Mu kuwaka ndinga mosi vwandaka zonzila munu na malembe mutindu yayi:

17 «Muntu yina ke kufwa lenda vwanda ya kudedama kulutila Nzambi?

Muntu lenda vwanda ya kuvedila kulutila yina yidikaka yandi?

18 Kana Nzambi ke tulaka ve kivuvu na bisadi ya yandi,

mpe kana yandi ke talaka ti bambazi ya yandi kele ve ya kusungama,

19 wapi mutindu yandi lenda tula kivuvu

na bayina ke zingaka na bayinzo ya kibuma,

lufulu ya bawu kele kaka fundu-fundu,

yina ba lenda kudyatila kwandi mutindu ngambu!

20 Ba lenda mwangisa bawu kaka na kilumbu mosi,

bawu ke zimbanaka ya mankululu, mpe ata muntu ke bambukila bawu moyo.

21 Singa yina ke simbaka bayinzo ya bawu ya lele me zengana, ni yawu yina,

bawu ke na kwendaka kufwa ata kuzwa ndwenga.»