2 Tii wapi ntangu nge ke tatamana na kuzonzaka mambu yayi?

Tii wapi ntangu mambu yina ke na kubasika na yinwa ya nge ke tatamana na kuvwanda mutindu mupepe ya ngolo?

3 Nzambi ke bakaka banzengolo ya yimbi?

Ntangu Nzambi-Mpungu ke fundisaka, yandi ke salaka yawu ve na ludedomo nyonso?

4 Kana bana ya nge salaka masumu na ntadisi ya yandi,

yandi me futisa bawu yimbi ya bawu.

5 Kasi nge, kana nge sosa Nzambi,

kana nge bondila Nzambi-Mpungu,

6 kana nge ke na dyambu ve, kana nge kele ya kusungama, yandi ke keba nge,

yandi ke vutula nge buyenge na kati ya yinzo ya nge ya ludedomo.

7 Luzingu ya nge ya ntete ke vwanda ve mfunu mingi,

luzingu ya nge ya mbasi ke lutila mbote.

8 Mulemvo ya nge, yufula mbandu ya bantu yina me tekila nge na luzingu,

tala mbote mutindu vwandaka bankooko ya bawu.

9 Samu ti beto butukaka kaka mazono, mpe beto zaba ata kima ve,

lutangu ya bilumbu ya beto awa na ntoto, kele mutindu mpewo.

10 Bayina zingaka ntete na beto, ni bawu ve ke lwengisa nge?

Bawu ke zabisa nge mambu yayi ya ndwenga yina ke katuka na bantima ya bawu:

11 «Batwandu ke basikaka kisika yina maza kele ve?

Batwandu ke kulaka kisika yina me kondwa maza?

12 Ata ti yawu ke ntete ya maza, mpe ti nabunu ba zenga yawu,

yawu ke yumaka ya yawu mbangu tekila matiti nyonso ya nkaka!»

13 Ni mutindu yina luzingu ya bayina ke zimbanaka Nzambi ke sukaka,

kivuvu ya muntu ya masumu ke manisaka mutindu yina.

14 Kivuvu ya yandi ke zengana mutindu singa.

Yandi tulaka kivuvu ya yandi na basinga ya nkala-bumi.

15 Nkala-bumi ke yekamaka na yinzo ya yandi, kasi yinzo yango ke vwandaka ngolo ve.

Yandi ke kangamaka na yawu, kasi yawu ke zingilaka ve.

16 Yandi kele mutindu yinti ya kufuluka maaka na yisi ya ntangu,

yandi ke tandaka bintala ya yandi samu na kufuka bilanga.

17 Myanzi ya yawu ke vwandaka ya kuvukana, yawu ke menaka na zulu ya matadi,

mpe yawu ke kotaka tii na kati ya matadi.

18 Kasi kana ba katula yawu na kisika yina yawu kele,

ntoto ke tuba ti: «Mu me talaka ntete nge ve!»

19 Ni mutindu yayi ke sukaka buyengi ya bayina ke zimbanaka Nzambi!

Na kisika ya bawu, bayinti ya nkaka ke basika.

20 Ve, Nzambi ke losaka ve muntu ya kusungama,

yandi ke kindisaka ve bantu ya yimbi.

21 Yandi ke fulusa yinwa ya nge na kyese,

yandi ke fulusa bikoba ya nge na milolo ya nsayi.

22 Bayina nyonso ke yinaka nge, bawu ke fuluka na nsoni,

bayinzo ya lele ya bantu ya yimbi ke zimbana.