2 Mu me kuwaka mambu mingi ya mutindu yayi.

Beno nyonso, beno ke na kusadisa munu ve,

kasi beno ke na kutalisa dyaka munu mpasi mingi.

3 Beno nyonso ke na kutuba: «Mambu yayi ke kaka mutindu mupepe ya mpamba,

yawu ke manisa kwandi?

Yinki ke na kupesa nge nkele, samu ti nge kupesa mvutu ya mutindu yayi?»

4 Kana beno vwandaka na kisika ya munu, munu mpe mu zolaka zonza mutindu beno.

Mu zolaka sala kinzonzi ya mbote samu na kufunda beno,

mu zolaka seka beno na kuningisa yintu.

5 Mu zolaka kukindisa beno na mambu yina ke basika na yinwa ya munu.

Mu zolaka sadisa beno na mambu yina ke basika na bikoba ya munu.

6 Kana mu zonza, bampasi ya munu ke manisa ve,

mpe kana mu bika na kuzonza, wapi mutindu bampasi yango ke kwenda ntama?

7 Kasi na ntangu yayi, yandi me manisa munu ngolo.

Nge me kotisa mvwanzi na kati ya dikanda ya munu nyonso.

8 Nge me nunisa munu mpe mu me konda,

yawu ke na kufunda munu mpe ke na kutuba ti mu me sala yimbi.

9 Nkele ya yandi ke na kupasula munu, yandi ke na kunwanisa munu.

Yandi ke na kukwetisa meno samu na munu.

Mbeni ya munu ke na kutala munu na nkele nyonso.

10 Bawu ke na kufungudila munu bayinwa ya bawu ya nene,

na kutalisa munu mpasi, bawu ke bulaka munu na matama.

Bawu nyonso ke vukanaka samu na kunwanisa munu.

11 Nzambi me yekula munu na maboko ya ntwenya,

yandi me losa munu na maboko ya bantu ya yimbi.

12 Mu vwandaka ya munu swii, kasi yandi me ningisa munu,

yandi me simba munu na dikosi mpe yandi me losa munu na ntoto.

Yandi me telemisa munu, mutindu kibulu yina yandi ke losila madyonga.

13 Madyonga ya yandi ke na kuzwa munu bisika nyonso.

Yawu ke na kutobola nzutu ya munu nyonso,

yawu ke na kumwangisa misopo ya munu na ntoto.

14 Yandi me tobola munu mabulu-mabulu,

yandi ke na kukima mbangu na sika ya munu mutindu kinwani.

15 Mu me tunga kinkuti ya ngoto samu na nzutu ya munu,

mu me kotisa mbunzu ya munu ya kati ya ntoto.

16 Meso ya munu me kuma mbwaki samu na kudila,

mpewo ya lufwa me bwidila munu na meso.

17 Na kutala mbote, mambu ya ngolo kele ve na maboko ya munu,

mpe lusambulu ya munu kele ya kuvedila.

18 Ntoto, kufuka ve menga ya munu.

Bika ti kulooka ya munu kuwakana ntama!

19 Kubanda ntangu yayi, mu me kuma na mbangi kuna na dizulu,

Kuna na bisika ya kuzangama, mu ke na muntu yina ke nwanina munu.

20 Bandiku ya munu ke na kusekaka munu,

kasi, mu ke na kuyawula na sika ya Nzambi na kudila nyonso.

21 Bika ti nzonzi kuvwanda na kati-kati ya munu na Nzambi

mutindu muntu ke nwaninaka mpangi muntu!

22 Samu ti lutangu ya bamvula ya luzingu ya munu me kuma na nsuka,

mu ke baka nzila na kukwenda, mu ke vutuka dyaka ve.