15
Bampova ya Elifaze: Muntu ya yimbi ke vuuka ve
1 Elifaze, mu-Temane, tubaka: 2 Muntu ya ndwenga mutindu nge me bonga ve na kupesa mvutu yina kele ve na mfunu,
yandi ke zonzaka ve mambu ya mpamba!
3 Nge ke nwaninaka luzingu ya nge na mambu ya mpamba,
mambu ya mpamba yina kele ve na ndandu?
4 Kasi nge, nge ke zitisaka Nzambi ve.
Nge me bika kusambila Nzambi,
5 samu ti, ni yimbi ya nge ke twadisaka yinwa ya nge,
mpe nzonzolo ya nge kele kaka ya mayela ya kuvuna.
6 Ni munu ve, ni yinwa ya nge mosi ke na kufunda nge,
ni mambu yina nge ke basisaka na yinwa ya nge mosi ke na kufunda nge.
*
7 Na kati ya bantu nyonso ni nge muntu ya ntete?
Nge butukaka ntete na myongo ya fyoti?
8 Nge kuwaka mambu yina basikaka na lukutakanu ya Nzambi?
Kaka ni nge ke na ndwenga?
9 Yinki nge zaba yina beto zaba ve?
Wapi mayela yina ke na nge, yina beto kele ve na yawu?
10 Na kati ya beto, ya ke na bayina ke na bansuki ya mpembe, biboba,
mpe bantu yina me lutila kununa na tata ya nge.
11 Nge ke na kutala ti mbombolo ya Nzambi me lunga ve?
Mambu yina ba me zabisa nge na malembe nyonso, yawu mpe me lunga ve?
*
12 Wapi sika ntima ya nge ke na kunata nge?
Samu na yinki meso ya nge ke na kwendaka tala kidi-kidi?
13 Wapi mutindu nge lenda dasukila Nzambi,
mpe kubasisa nzonzolo ya mutindu yina?
14 Nani kele muntu samu ti yandi vwanda ya kuvedila?
Wapi mutindu muntu yina me butuka na kento lenda vwanda ya kudedama?
15 Kana Nzambi kele ve na kivuvu na balongo ya yandi,
kana na meso ya yandi, dizulu, kele ve ya kuvedila,
16 wapi mutindu ke vwanda muntu ya nganzi mpe ya muvusu,
muntu yina ke kunwaka masumu mutindu maza?
*
17 Kuwa munu, mu ke longisa nge!
Mu ke zabisa nge mambu yina mu me tala,
18 mambu yina bantu ya ndwenga tubaka,
mambu yina katukaka na bankooko ya bawu, yina bawu bumbaka ve.
19 Kaka ni na sika ya bawu yinsi pesamaka,
nzenza mosi ve vwandaka me kwiza zinga na kati-kati ya bawu.
20 Muntu ya yimbi ke talaka mpasi bilumbu nyonso ya luzingu ya yandi.
Yawu ke vwandila mutindu yina, bamvula nyonso yina ba kubikaka na yandi, muntu ya muvusu.
21 Makelele ya nsisi ke wakana na makutu ya yandi,
mpe ata na ntangu ya kizunu, muntu yina ke mwangisaka nyonso, ke bwidila yandi.
22 Yandi ke kwikila ve ti yandi ke vuuka na kitombe ya kulutila
samu ti mbele ya mvita me kubama na kufwa yandi.
23 Yandi ke kwendaka tambula kidi-kidi samu na kusosa madya,
yandi zaba ti kilumbu ya kitombe ya kulutila ke na kuvingila yandi.
24 Mpasi na kyadi ke fulusa yandi na boma.
Yawu ke lwata yandi mutindu ntinu me kubama na mvita,
25 samu ti yandi me nanguna diboko ya yandi samu na kubalukila Nzambi,
yandi me sosa kunwanisa Nzambi ya lulendo.
26 Yandi ke na kukima mbangu na nsoni nyonso samu na kwenda nwanisa Nzambi,
yandi ke na kubumba nzutu ya yandi na binwanunu ya bisengo yina ke kebaka nzutu.
27 Kizizi ya yandi vwandaka ya kufuluka na mafuta,
mpe nzutu ya yandi vwandaka nene na mafuta.
28 Kasi yandi ke zinga na bambanza ya kumwangana,
na kati ya bayinzo yina ke dyaka na bantu ve,
mpe me banda na kumwangana.
29 Yandi ke mvwama dyaka ve, bimvwama ya yandi ke kuma dyaka ve mingi,
yandi ke vwanda dyaka ve nsangu na yinsi.
30 Yandi ke lenda ve na kukatuka na kitombe ya kulutila.
Milaka ya tiya ke yumisa bikuni ya yandi,
Nzambi ke bingisa yandi na mupepe ya yinwa ya yandi.
*
31 Yandi tula ve kivuvu na mayindu ya yandi! Yawu kele nzila ya yimbi,
samu ti kaka ni mayindu ya yandi ke vwanda musendo ya yandi.
32 Mambu yayi ke salama ntete yandi kufwa,
mpe yandi ke kuzwa dyaka ve bintala ya malu-malu.
33 Yandi ke vwanda mutindu yinti ya vinu yina me bwisa bambuma ya yawu ata kuyela,
yandi ke vwanda mutindu yinti ya olive yina me bwisa bifulu ya yandi.
34 Bantu ya dikanda ya musumuki ke kuma bisita,
mpe tiya ke yoka bayinzo ya lele ya muntu yina ke ndimaka madeso ya bana.
35 Muntu yina ke na mabanza ya nkwamusu mutindu kento ke na kivumu, yandi ke buta mambu ya yimbi,
yina ke basika na yandi ke kaka yimbi.