2 Tii wapi ntangu beno ke manisa na kuzonzila mambu yayi?

Beno yindula mpe beto ke zonza.

3 Samu na yinki ba ke kutala beto mutindu bibulu?

Samu na yinki beno ke na kutala beto mutindu bizoba ya mpamba-mpamba?

4 Nge yina me fuluka na nkele,

samu na nge, ba bika ntoto?

Samu na nge, matadi mpe ke sobaka bisika?

5 Ya tsyelika, mwinda ya muntu ya yimbi ke kufwa,

mulaka ya tiya ya yandi ke lezima dyaka ve.

6 Na yinzo ya yandi ya lele, nsemo ke vwanda dyaka ve,

mwinda ya luzingu ya yandi ke kufwa.

7 Kutambula ya yandi ya kibakala, ke kuma nkufi,

mambu yina yandi kanisaka na kusala, ni yawu ke bwisa yandi.

8 Ya tsyelika, makulu ya yandi me kangama na mpwasa,

yandi ke na kutambula na mabulu ya mpwasa.

9 Mutambu me bwila yandi na kinkoso,

basinga ya mutambu me kanga yandi.

10 Singa ya kitumbu yina ke na kuvingilaka yandi, ya ke ya kubumbama na yisi ya ntoto,

mutambu mosi ke na kuvingila yandi na nzila.

11 Boma ya nsisi ke na kuzunga yandi balweka nyonso,

yawu ke na kusimba yandi na makulu.

12 Yandi vwandaka na ngolo, kasi nsatu me manisa yandi ngolo,

mpasi me kuma pene-pene ya yandi.

13 Yawu ke na kudya yandi mpusu ya nzutu,

mwana ya ntete ya lufwa ke na kudya yandi binama ya nzutu,

14 Ba ke katula yandi na yinzo ya yandi ya lele, kisika yina yandi ke na kuzinga na lukengolo nyonso.

Ba ke nata yandi na ngolo na sika ya ntinu ya bunsisi.

15 Muntu ya nkaka lenda zinga na yinzo yina, samu ti yawu ke dyaka ya yandi ve,

sufe ke yoka mvwilu ya yandi nyonso.

16 Na yisi, myanzi ya yandi me yuma,

mpe na zulu bintala ya yandi me beba.

17 Na ntoto, ba ke bambukila dyaka yandi moyo ve,

nkumbu ya yandi ke zimbana.

18 Ba me katula yandi na kati ya nsemo, ba me losa yandi na kitombe ya kulutila,

ba me bingisa yandi na yinza.

19 Yandi ke vwanda ve na bana, na mitekolo,

mpe ata muntu ke bikana moyo na kisika yina, yandi vwandaka zinga na yinsi ya nzenza.

20 Bantu ya wesete ke yituka na mambu yina ke kumina yandi,

bantu nyonso ya esete ke fuluka na boma.

21 Ni mutindu yayi ke vwanda bayinzo ya bantu yina kele ve ya kudedama,

ni mutindu yayi kele kisika ya bayina zaba ve Nzambi.