2 Tii wapi ntangu beno ke nyongisa munu,

mpe beno ke sasa munu na mambu ya beno?

3 Ya me kuma bambala kumi yina beno ke na kufingaka munu,

beno ke na nsoni ve na kunyokola munu?

4 Kana mu landaka nzila ya yimbi,

yimbi yina me tadila kaka munu.

5 Kana ya tsyelika beno ke na kutelemina munu,

kana beno ke na kusemba munu samu na nsoni ya munu,

6 beno fwana kuzaba ti, ni Nzambi ke na kutalisa munu mpasi,

mpe me kanga munu na mutambu ya yandi.

7 Kana mu zonzila mambu ya ngolo yina mu ke na kutala, ata muntu ke pesa munu mvutu.

Kana mu tuba ti beno kwiza mbangu, ata muntu ke nwanina munu!

8 Yandi me kanga munu nzila, mu lenda luta dyaka ve,

yandi me tula kitombe ya kulutila na banzila ya munu.

9 Yandi me katula kimvwama ya munu,

yandi me katula nkembo ya munu yina mu vwandaka lwata mutindu yimpu.

10 Yandi me lembisa munu nyonso mpe ya munu yimeni,

yandi me katula kivuvu ya munu mutindu ba ke timunaka yinti.

11 Yandi me dasukila munu,

yandi ke na kutala munu mutindu mosi na bambeni ya yandi.

12 Binwani ya yandi ke kwizaka kintwadi,

bawu me fungula nzila tii na sika ya munu,

bawu me sala kivwandu ya bawu na balweka nyonso ya yinzo ya munu ya lele.

13 Yandi me sala ti bampangi ya munu kuvwanda ntama na munu,

bayina zaba munu ke na kwendaka kima munu.

14 Bayina vwandaka na munu me bika munu,

bandiku ya munu me zimbana munu.

15 Banzenza yina ke na yinzo na bisadi ya munu ya bakento ke na kutala munu mutindu nzenza,

na meso ya bawu mu me kuma muntu yina bawu zaba ve.

16 Kana mu bokila kisadi ya munu, yandi ke ndima ve.

Na kundima, mu fwana kubondila yandi.

17 Nsunga ya yinwa ya munu ke na kubingisa kento ya munu,

mu me kuma ngazi na meso ya bana ya munu mosi.

18 Bana ya fyoti mpe ke na kusafula munu,

kana mu telama, bawu ke seka munu.

19 Bantu yina mu vwandaka zonzila mansweki ya munu, bawu ke na kutala munu nganzi,

bayina mu vwandaka zola me balukila munu.

20 Mikwa ya munu me kangama na mpusu ya nzutu ya munu mpe na musuni ya munu,

kaka ni mpusu ya meno me bikana na munu.

21 Beno bandiku ya munu, beno fwila munu kyadi, beno fwila munu kyadi,

samu ti Nzambi me bula munu!

22 Samu na yinki beno ke na kukwamisa munu mutindu Nzambi?

Beno me yukuta ve musuni ya munu?

23 Mu zola ti ba sonika mambu ya munu,

mu zola ti ba sonika yawu na dibuku!

24 Ba sonika yawu na kisonokono ya kisengo to ya kokote,

samu ti yawu bikana ya kusonama na ditadi bantangu nyonso!

25 Munu, mu zaba mbote ti kikuudi ya munu kele moyo,

mpe yandi ke telama muntu ya suka na ntoto,

26 ntangu mpusu ya nzutu ya munu ke beba,

munu, na nzutu ya munu, mu ke tala Nzambi.

27 Munu, mu ke tala yandi,

meso ya munu ke tala yandi, kasi muntu ya nkaka ve,

mu zola ti yawu kusalama na nswalu, mu ke na kuvibidila dyaka ve!

28 Ntangu beno ke tuba: «Samu na yinki beto ke na kwendaka landa yandi?»

Na yina, ba ke bakula wapi kisika me katuka mpasi ya munu.

29 Beno tala ya beno boma ya mbele ya mvita,

samu ti nkele ya beno lenda nata na beno lufwa ya beno na mbele ya mvita.

Na yina, beno ke zaba ti, mfundusu kele!