2 Nzambi lenda vwanda na nsatu ya lusalusu ya muntu?

Ve! Muntu ya ndwenga kele mfunu samu na yandi mosi.

3 Nzambi-Mpungu ke tala kilengi, kana nge kele muntu ya kudedama?

Kana nge kele ya kusungama, wapi ndandu yina yandi ke kuzwa?

4 Ni kuzitisa Nzambi ke sala ti yandi kutalisa nge mpasi,

to ni samu na yawu yandi ke na kusemba nge?

5 Nge me sala ve yimbi ya kulutila?

Masumu ya nge kele ve ya mingi-mingi?

6 Nge vwandaka baka bima ya bampangi ya nge samu na bamfuka,

nge vwandaka botola bawu binkuti ya bawu,

nge vwandaka bika bawu kondwa binkuti.

7 Nge pesaka ve maza na muntu yina vwandaka na mpwila,

nge mangaka na kupesa dimpa na muntu yina vwandaka na nsatu.

8 Yinsi vwandaka mvwilu ya muntu ya ngolo,

ni bantu ya lunangu vwandaka yala yawu.

9 Ntangu mifwidi vwandaka kwiza sosa lusalusu,

nge vwandaka vutula bawu maboko mpamba,

nge vwandaka kwamisa bansaana.

10 Ni yawu yina mitambu me zunga nge,

na mbala mosi boma ke na kusimba nge.

11 Nge ke na kutala ve kitombe yayi ya kulutila?

Nge ke na kutala ve maza yayi ya mingi-mingi yina me dyamisa nge?

12 Nzambi kele ve kuna na zulu?

Tala mutindu bambwetete kele ya kuzangama mingi na zulu!

13 Mpe nge ke na kutuba: «Yinki Nzambi zaba?

Yandi lenda fundisa muntu yina ke na kati ya kitombe ya kulutila?

14 Matuti ke fukaka yandi, yandi ke talaka ata kima,

yandi ke tambulaka na ndilu nyonso ya dizulu.»

15 Nge zola kutambula na banzila ya nge ya ntama,

yina bantu ya yimbi ke landaka?

16 Bawu zimbanaka na mbangu,

balufulu ya bayinzo ya bawu kele mutindu maza ya nzadi yina ke na kuluta.

17 Bawu vwandaka tuba na Nzambi: «Katuka na mantwala ya beto!»

Yinki Nzambi-Mpungu lenda sala samu na bawu?

18 Na kutala mbote, ni yandi fulusaka bayinzo ya bawu na bimvwama.

Kasi malongi ya bantu ya yimbi kele ntama na munu!

19 Bantu ya kudedama ke tala kubwa ya bawu, bawu ke yangalala,

bayina salaka ata kima ke seka bawu.

20 «Muntu yina vwandaka sala ntembe na beto yandi me zimbana ve?

Tiya me yoka ve bimvwama ya bawu yina bikanaka?»

21 Mulemvo ya nge, wisana na Nzambi mpe nge ke kuzwa kizunu,

nge ke zinga dyaka luzingu ya mbote.

22 Mulemvo ya nge, ndima malongi yina ke na kubasika na yinwa ya Nzambi,

bumba mambu ya yandi na ntima ya nge.

23 Luzingu ya nge ke bonga dyaka kana nge vutuka na sika ya Nzambi-Mpungu,

kana nge katula kondwa ludedomo na yinzo ya nge ya lele.

24 Losa wolo na fundu-fundu ya ntoto,

losa wolo ya kizunga ya Ofile na kati ya matadi yina ke na kati ya muzumba.

25 Na yina, Nzambi-Mpungu ke kuma wolo ya nge

mpe kikunku na nene ya palata.

26 Na yina, Nzambi-Mpungu ke vwanda kyese ya nge,

mpe nge ke talisa kizizi ya nge na Nzambi.

27 Ntangu nge ke yawula na sika ya yandi, yandi ke kuwa nge,

mpe nge ke lungisa balukanu nyonso.

28 Kana nge baka lukanu ya kusala kima, yawu ke salama samu na nge,

nsemo ke kyenzula banzila nyonso ya nge.

29 Kana muntu kele ya kukuluka, nge ke zabisa yandi: «Telama!»

Samu ti Nzambi ke kuulaka muntu ya kukuluka.

30 Yandi ke kuulaka ata muntu yina me sala yimbi,

Nzambi ke kuula muntu yina samu na maboko ya nge ya kuvedila.