2 Bubu yayi dyaka, kuyawula ya munu kele mutindu mu ke na kusadila Nzambi yintu ngolo,

mu ke na kutula diboko na yinwa samu ti mu looka ve.

3 Aa, kana mu zabaka wapi kisika mu lenda tala yandi,

mu zolaka kwenda tii na kisika yina yandi ke zingaka!

4 Mu zolaka talisa dyambu ya munu na ntadisi ya yandi, samu na kulakisa ti mu me sala ve yimbi,

mu zolaka zabisa yandi mambu nyonso yina kele na kati ya ntima ya munu.

5 Mu ke zaba wapi mvutu yandi ke vutula munu

mpe mu ke bakula yinki yandi ke zabisa munu.

6 Yandi ke sadila ngolo ya yandi nyonso

samu na kufundisa munu?

Ve, kasi mu banza ti yandi ke sala keba na munu.

7 Kuna, ya ke vwanda na muntu ya kusungama yina ke sala bunzonzi na yandi,

mpe mu ke vuuka ya mankululu na mantwala ya zuzi ya munu.

8 Kasi kana mu kwenda na esete, yandi kele ve,

na wesete, mu me tala yandi ve.

9 Yandi ke na kusala kuna na node? Mu ke na kutala yandi ve.

Yandi me bumbama na sude? Mu ke na kutala yandi ve.

10 Yandi zaba mbote nzila kisika yina mu kele.

Kana yandi meka munu,

mu ke kuma mutindu wolo.

11 Makulu ya munu me kwikama na kwendaka landa nzila ya yandi.

Mu me landa nzila ya yandi ata kutengama.

12 Mu me bika ve na kusadila bantumunu ya bikoba ya yandi.

Mu me ndima na kutumama na mambu ya yinwa ya yandi.

13 Kasi kana yandi baka lukanu, nani lenda sala ti yandi soba yawu?

Nyonso yina yandi zola kusala, yandi ke sala yawu.

14 Ya tsyelika, yandi ke lungisa lukanu yina yandi bakaka samu na munu,

yandi ke lungisa mpe balukanu ya nkaka.

15 Ni yawu yina, mu ke ya kufuluka na boma na ntadisi ya yandi.

Kana mu tatamana na kuyindula,

mu ke lutila dyaka na kuvwanda na boma ya yandi.

16 Nzambi me lembisa ntima ya munu.

Nzambi-Mpungu me fulusa munu na boma,

17 ya vwanda kitombe ya kulutila,

ya vwanda mpimpa yina yandi me fukila munu, ni yawu ve ke dingimisa munu!