1 Samu na yinki Nzambi-Mpungu me kubika ve ntangu ya kusadila mfundusu ya yandi?

Samu na yinki bayina zaba yandi ke talaka ve bilumbu yina yandi ke futisa bantu yimbi ya bawu?

2 Ba ke katulaka bandilu na bisika ya yawu,

ba ke labaka bibulu mpe ba ke dikilaka yawu.

3 Ba ke botolaka bambuluku ya bansaana,

ba simbaka ngombe ya mufwidi samu na mfuka.

4 Ba ke kabikisaka bantu ya mpasi na kutambula na kimpwanza,

ba ke kwikaka bamputu nyonso ya yinsi na kubumbama.

5 Mutindu bambuluku ya mfinda na yinsi ya kuyuma,

bawu ke basikaka na suka-suka na kwenda sala, samu na kuzwa mwa madya.

Bawu ke sosaka na bisika ya kuyuma dimpa ya kudikila bana.

6 Samu na bibulu ya bawu,

bawu ke zengaka madya yina ke bikanaka na bilanga,

bawu ke yonzikaka bambuma ya vinu,

na kati ya bilanga ya bayinti ya vinu ya bantu ya yimbi.

7 Bawu ke lutisaka mpimpa banzutu mpamba, kondwa binkuti,

bawu kele ve na kima ya kufuka banzutu samu na madidi.

8 Bawu ke bolaka na maza ya mvula yina ke kulumukaka na myongo,

na kondwa bisika ya kubumbama,

bawu ke simbaka matadi ya nene, samu na nyamba ya maza.

9 Bawu ke botolaka nsaana na maboko ya mama ya yandi na ngolo nyonso,

bawu ke bakaka bima ya mputu samu na mfuka.

10 Bawu ke tambusaka bawu banzutu mpamba, kondwa binkuti,

bawu ke kwikaka bamputu na kunata bifunda ya matiti ya bambuma ya faline na kati ya nsatu nyonso.

11 Bamputu ke kamunaka bambuma ya olive na bilanga ya bamvwama,

bawu ke yidikaka vinu kasi bawu ke kufwaka na mpwila.

12 Na kati ya mbanza, ba ke na kuwa bantu ke na kuyawula,

bayina me lwala ke na kusosa lusalusu,

kasi Nzambi ke na kutala ve ntima mpasi na busafu yina ke na kusalamaka!

13 Bantu ya yimbi ni bawu ke zolaka ve nsemo,

bawu ke landaka ve banzila yina yandi ke kyenzulaka,

bawu ke bikaka yawu.

14 Muntu yina ke kufwaka bantu ke telamaka na ntangu bwisi ke kutsyaka,

yandi ke kufwaka mputu mpe muntu ya mpasi,

na mpimpa, yandi ke kumaka mutindu muyibi.

15 Meso ya muntu ya kinsuza ke vingilaka nkokila,

yandi ke tulaka lele na kizizi ya yandi,

yandi ke tubaka ti ata muntu ke tala yandi.

16 Na mpimpa, ba ke kotaka na bayinzo na ngolo nyonso,

na ntangu, bawu ke vwandaka ya kubumbama,

bawu zaba ve nsemo.

17 Samu na bawu, nsemo ya suka-suka kele mutindu mpewo ya lufwa,

samu ti ni kuna bawu ke talaka boma ya mpewo ya lufwa.

18 Ya tsyelika, nyamba ya maza ke nataka bantu ya yimbi,

kikunku ya yandi ya ntoto kele ya kusiingwa,

bawu ke kwendaka sala ve na bilanga ya bayinti ya vinu.

19 Mutindu ntoto ya kuyuma ke minaka maza ya neze,

ni mutindu yina mpe yinsi ya bafwa ke minaka bantu ya masumu.

20 Bakento yina butaka bawu, me zimbana bawu,

misete ke kudya bawu na nsayi nyonso,

bantu ke zonzila dyaka ve bankumbu ya bantu yina!

Kukondwa ludedomo me zengana mutindu yinti.

21 Bawu me nyokola kisita, kento yina kele ve na mwana,

bawu sadilaka ve mifwidi mambu ya mbote.

22 Kasi Nzambi ke na ngolo ya kubingisa bantu ya lulendo,

ntangu yandi ke telamaka, bawu ke vwandaka dyaka ve na kivuvu ya kuzinga.

23 Kana yandi pesaka bawu lukengolo mpe kivuvu,

samu ti yandi sikikaka meso ya yandi na ndyatulu ya bawu.

24 Bawu ke zangamaka na mwa ntangu mpe bawu ke zimbanaka,

bawu ke kubwaka mutindu matiti ya bambuma yina ba me yonzika,

mpe ba ke zengaka bawu mutindu ba ke zengaka matiti yina me yela.

25 Kana ya kele ve mutindu yina,

nani ke tuba ti ni mutindu yina ve?

Nani ke zabisa munu ti mambu yina mu ke na kutuba kele mpamba?