2 Nge zaba kukindisa muntu yina me lemba!

Nge zaba kusadisa muntu yina ke dyaka ve na ngolo!

3 Nge zaba kulwengisa muntu yina kele ve na ndwenga!

Nani me pesa nge mayela yayi ya kulutila?

4 Kasi na nani nge ke na kuzonza mambu yayi?

Nani ke na kupesa nge mabanza yayi?

5 Bantu nyonso ya kufwa ke tekitaka na boma samu na yandi,

nyonso yina ke zingaka na yisi ya mubu ke tekitaka na boma samu na yandi.

6 Samu ti na ntadisi ya yandi, yinsi ya bafwa kele ve ya kubumbama,

yinza ya bayina zimbanaka kele mwasi na ntadisi ya yandi.

7 Yandi yalumunaka node ya dizulu na kisika ya mpamba,

yandi tulaka ntoto na zulu ya kisika ya mpamba.

8 Yandi ke kangaka maza na kati ya matuti ya yawu,

matuti ke pasukaka ve na dema ya maza.

9 Yandi ke fukaka kizizi ya kiti ya yandi ya kintinu,

yandi ke yalumunaka dituti na zulu ya yawu.

10 Yandi zungaka mutindu mulunga bandilu ya maza,

tii na kisika ya bandilu ya nsemo na kitombe ya kulutila.

11 Ntangu yandi ke dasukaka,

makunzi yina ke simbaka dizulu ke tekitaka mpe ke ninganaka.

12 Na ngolo ya yandi, yandi ke ningisaka mubu,

na mayela ya yandi, yandi ke mwangisaka Laabe, kibulu ya nene ya nsisi ya mubu.

13 Na kiwumunu ya yandi, zulu ke lezimaka dyaka,

diboko ya yandi ke kufwaka Levyatane, nyoka yina ke kwendaka kima.

14 Kana nyonso yayi kele kaka mambu ya fyoti na nyonso yina yandi ke salaka,

beto ke kuwaka kaka mwa makelele ya fyoti,

nani lenda bakula lulendo ya kidumu ya yandi?