2 Na Nkumbu ya Nzambi ya Moyo yina me manga na kunwanina munu,

na Nkumbu ya Nzambi-Mpungu yina me fwemisa munu,

3 konso ntangu yina mu ke wumuna,

konso ntangu yina mupepe ya luzingu yina mu kuzwaka na Nzambi ke vwanda na bambombo ya munu,

4 bikoba ya munu ke zonza ve mambu yina kele ve ya kudedama,

yinwa ya munu ke basisa ve ata dyambu mosi ya luvunu.

5 Mu kele ve na dibanza ya kutuba ti beno me zonza mambu ya tsyelika!

Tii mu ke kufwa, mu ke bika ve na kuvwanda ya kusungama.

6 Mu ke kangama kaka na kusungama ya munu mpe mu ke bika yawu ve.

Ata kilumbu mosi ve, ntima ya munu me semba munu na ndyatulu ya munu.

7 Bika ti mbeni ya munu ba sala yandi mutindu ba ke salaka na muntu ya yimbi!

Bika ti muntu yina ke tedimina munu,

ba sala yandi mutindu ba ke salaka na muntu yina kele ve ya kudedama!

8 Wapi kivuvu lenda vwanda na muntu ya yimbi,

kana Nzambi zenga yandi singa ya luzingu,

mpe yandi katula yandi kiwumunu?

9 Nzambi ke kuwaka kuyawula ya muntu ya yimbi,

ntangu mpasi ke bwidilaka yandi?

10 Yandi ke yangalala na Nzambi-Mpungu?

Yandi ke sambila Nzambi konso ntangu?

11 Mu ke longisa beno mutindu lulendo ya Nzambi ke salaka,

mu ke bumbila ve beno mambu yina Nzambi-Mpungu me kanisa.

12 Beno nyonso, beno talaka yawu.

Kasi samu na yinki beno ke na kuvwanda na mambu ya mpamba-mpamba?

13 Kikunku yina Nzambi me kubika samu na muntu ya ntima ya yimbi,

mvwilu yina muntu ya yimbi ke kuzwa na sika ya Nzambi-Mpungu, ni yayi:

14 Kana yandi ke na bana mingi, bawu ke kufwa na mbele ya mvita

mpe batekolo ya yandi ke kondwa kima ya kudya.

15 Bayina ke bikana moyo, ke manisa na kufwa na kiyoolo

mpe mifwidi ya bawu ke kuzwa ve ntangu ya kudila bawu.

16 Kana yandi kuma na palata mingi mutindu fundu-fundu,

mpe kana yandi kutikisa binkuti mutindu kibuma,

17 yandi kutikisa ya yandi.

Kasi, ni muntu ya kudedama ke vwata yawu,

mpe palata ya yandi, ni muntu ya kusungama ke kuzwa yawu.

18 Yandi ke tunga yinzo yina kele ve na ngolo mutindu yinzo ya nkala-bumi,

mutindu yinzo ya mileba ya nkebi.

19 Yandi ke lala na bimvwama ya yandi,

kasi ya ke vwanda mbala ya nsuka,

ntangu yandi ke vumbuka,

yandi ke tala ata kima mosi ve.

20 Boma ya kulutila ke pamusa yandi mutindu bimpo ya maza,

kimbongila ke nata yandi na kati-kati ya mpimpa.

21 Mupepe yina ke katukaka na esete ke nanguna yandi mpe ke nata yandi,

yawu ke katula yandi na ngolo nyonso,

na kisika yina yandi ke na kuzinga.

22 Ba ke losila yandi madyonga ata kutala yandi kyadi,

mpe yandi ke kima diboko yina ke sosa kutalisa yandi mpasi.

23 Ba ke bula maboko, samu na kubwa ya yandi,

na bisika nyonso yina yandi vwandaka zinga, ba ke sadila yandi milolo ya nsoni.