1 Ntangu yayi, mu me kuma kisakununu ya bayina me lutila munu buntwenya,

bana ya batata yina mu vwandaka safula na kutuba ti,

mu lenda tula bawu ve kintwadi na bayimbwa yina ke kebaka bibulu ya munu.

2 Yinki mu zolaka sala na lusalusu ya maboko ya bawu?

Bawu vwandaka dyaka ve na ngolo.

3 Nsatu, mpasi vwandaka me kondisa bawu,

bawu vwandaka sosa madya na kizunga ya nene,

kisika ya kuyuma, ya kumwangana katuka ntama.

4 Ba vwandaka buka matiti yina vwandaka pene-pene na mwa bayinti,

mpe ba vwandaka ve na kima ya nkaka ya kudya, kaka myanzi ya mwa bayinti.

5 Ba vwandaka bingisa bawu na kati ya bantu,

ba vwandaka sadila bawu milolo ya mutindu yina ba ke sadilaka muyibi,

6 samu ti bawu kuzinga na kati ya biswamunu ya mindimba,

to na kati ya bantadi, to na mabulu ya matadi.

7 Bawu vwandaka looka mutindu bibulu na kati-kati ya mwa bayinti,

bawu vwandaka yonzama na yisi ya matiti ya yimbi.

8 Bawu kele bantu ya yimbi, bantu yina kele ve na nkumbu,

ba vwandaka bingisa na yinsi na kwendaka bula bawu na bayinti.

9 Ntangu yayi, mu me kuma nzimbu ya bawu,

muntu yina bawu nyonso ke na kuseka.

10 Ba ke na kutala munu nganzi, ba ke na kukima munu,

kondwa kutala nsoni, bawu ke na kulobola munu mante na kizizi,

11 samu ti Nzambi me katula ngolo ya munu mpe yandi me bwisa munu na ntoto,

bawu ke na kulakisa munu ndyatulu ya yimbi.

12 Bawu me telama na lubakala ya munu mpe ke na kununguna munu,

bawu ke na kufungulaka nzila samu na kutalisa munu mpasi samu na kubebisa munu.

13 Ba ke na kukanga banzila ya munu mpe ba ke na kusala nyonso samu na kubebisa munu,

bawu, bayina ata muntu vwandaka sadisa.

14 Ba me tobola dibulu ya nene na kati ya kibaka yina ke kebaka munu,

mpe ke na kwiza na sika ya munu na kati ya bikunku ya matadi.

15 Boma ya kulutila me simba munu,

mutindu mupepe, yawu me nata buyenge ya munu,

mpulusu ya munu me luta mutindu dituti.

16 Ntangu yayi, mwela ya munu ke na kubasika na kati ya munu,

bilumbu ya mpasi me kumina munu.

17 Na mpimpa, mpasi ke kotilaka munu tii na mikwa,

yawu ke katulaka munu pongi.

18 Na ngolo nyonso, yandi me simba munu na kinkuti,

na kinkuti yina, yandi me fyeta munu na laka.

19 Yandi me losa munu na poto-poto,

mu me kuma mutindu fundu-fundu, bombi.

20 Mu ke na kuyawula na sika ya nge, kasi nge ke na kupesa munu ata mvutu,

mu me telama na ntadisi ya nge, samu ti nge losa meso ya nge na munu.

21 Nge me kuma na ntima ya ngolo na munu,

nge ke na kunwanisa munu na ngolo ya diboko ya nge.

22 Nge ke na kunata munu na zulu ya mupepe mutindu mpunda,

nge ke na kuzimbisa munu na kitembo ya ngolo.

23 Mu zaba ti nge ke na kunata munu na lufwa,

na kisika ya mbwabanu ya bantu nyonso ya moyo.

24 Kasi muntu yina zaba ti yandi ke kufwa, yandi ke nangunaka ve maboko ya yandi?

Muntu yina ke na kati ya mpasi, yandi ke lombaka ve lusalusu?

25 Mu dilaka ve samu na muntu yina vwandaka na kati ya mpasi?

Mu vwandaka ve na kyadi samu na mputu?

26 Mu vwandaka na kivuvu ya kuzwa luzingu ya mbote,

kasi ni mpasi me kwiza,

mu vwandaka vingila nsemo, kasi ni kitombe me kwiza.

27 Kivumu ya munu ke na kubika ve na kubaluka,

bilumbu ya mpasi me kumina munu.

28 Mu ke na kutambula, mu me kuma ndombe,

kasi ni ntangu ve me kumisa munu mutindu yina,

mu me telama na kati ya mukangu ya bantu,

mu ke na kulomba lusalusu.

29 Mu me kuma mutindu mpangi ya mbulu,

ndiku ya bimfutu.

30 Mpusu ya nzutu ya munu me kuma ndombe,

yawu ke na kubwa,

mikwa ya munu ke na kuya na tiya ya dibawu.

31 Nsambi ya munu ke na kuwakisa kaka mikunga ya mafwa,

dituutu ya munu ke na kubasisa ndinga ya bakento yina ke dilaka.