1 Mu salaka ngwisani na meso ya munu,

mu tubaka ti meso ya munu ke sikika ve ndumba yina me zaba ntete ve babakala.

2 Wapi kikunku yina Nzambi me bumbila munu kuna na zulu?

Wapi mvwilu yina Nzambi-Mpungu ke fidisa munu katuka kuna na mazulu?

3 Bampasi kele ve samu na bantu yina kele ve ya kudedama?

Mpe kyadi kele ve samu na bantu ya yimbi?

4 Nzambi ke talaka ve banzila yina mu ke landaka?

Yandi ke talaka ve mbote-mbote ndyatulu ya munu?

5 Mu vwandaka me zinga na kati ya mambu ya kulunga ve?

Mu vwandaka me landa banzila ya luvunu?

6 Bika ti Nzambi kutezila munu na bipezolo ya kudedama,

yandi ke zaba wapi mutindu kele kusungama ya munu.

7 Kana makulu ya munu vwandaka me bika nzila,

kana ntima ya munu vwandaka me landa bansatu ya meso ya munu,

kana mwa bima ya kuvedila ve vwandaka me sumuna maboko ya munu,

8 bika ti mu kunda, muntu ya nkaka yonzika ya yandi bima yina mu me kunda,

ba timuna mitwikila ya munu.

9 Kana mu pesaka ntima ya munu na kento ya nkaka,

kana mu kwendaka vingila na mansweki na mwelo ya mpangi ya munu,

10 bika ti kento ya munu kuvwanda kisadi ya muntu ya nkaka,

babakala ya nkaka kuvukisa mfulu na yandi!

11 Ya tsyelika, ya kele dyambu ya nganzi,

yawu kele yimbi yina bazuzi ke zengilaka muntu kitumbu.

12 Yimbi ya munu kele mutindu tiya,

yina ke na kuyoka nyonso tii na yinza ya bayina zimbanaka,

yawu ke na kuyoka nyonso yina mu me kunda.

13 Kana mu zitisaka ve luve ya kisadi ya munu ya kento to ya bakala,

ntangu ba vwandaka na dyambu na munu,

14 yinki mu ke sala ntangu Nzambi ke fundisa munu?

Ntangu yandi ke yufula, wapi mvutu mu ke pesa yandi?

15 Yina tulaka munu na kivumu ya mama ya munu,

ni Nzambi ve muntu yidikaka yandi mpe?

Kaka ni Nzambi mosi ve muntu yidikaka beto na kati ya bivumu ya bamama ya beto?

16 Mu vwandaka manga na kupesa na bamputu yina ba vwandaka na yawu nsatu?

Mu lungisaka ve bansatu ya mifwidi yina vwandaka tala munu?

17 Mu kudyaka madya ya munu kaka munu mosi

kondwa kupesa na nsaana samu ti yandi kudya?

18 Samu ti katuka bumwana ya munu,

nsaana me kula kintwadi na munu, mutindu mwana ke kulaka na sika ya tata ya yandi,

katuka bumwana ya munu, mu ke sadisaka mufwidi.

19 Kana mu talaka mputu ya kukondwa binkuti,

muntu ya mpasi ya kukondwa lele ya kufukila nzutu,

20 kana mu salaka ve dyambu yina ke sala ti bawu kusakumuna munu,

bawu kuzwa tiya ya mavunga ya mika ya mameme ya munu,

21 kana mu nangunaka diboko ya munu samu na kutalisa nsaana mpasi,

samu ti bazuzi ke vwanda na lweka ya munu,

22 bika ti digembo ya munu kukwabuka na mukongo ya munu,

diboko ya munu kuzengana na kinkoso.

23 Ya tsyelika, mpasi yina me katuka na sika ya Nzambi me talisa munu boma,

mu lenda sala kima mosi ve na ntadisi ya nkembo ya yandi.

24 Kana mu tulaka kivuvu ya munu na wolo,

kana mu tubaka na matadi ya ntalu ti: «Mu me tula ntima ya munu na nge.»

25 Kana mu yangalalaka samu na bimvwama ya munu ya mingi-mingi,

bimvwama yina mu kuzwaka na ngolo ya maboko ya munu.

26 Kana mu talaka nsemo ntangu yawu vwandaka lezima,

to kana mu talaka ngonda ntangu yawu basikaka na zulu na kulezima ya yawu nyonso,

27 Kana mu kubwaka na mansweki na masumu,

kana mu bakilaka bawu mutindu banzambi, samu na kusadilaka bawu,

28 yina mpe ya kele yimbi yina zuzi ke pesilaka kitumbu.

Samu ti na kusala mutindu yina, ya kele kumanga Nzambi ya mazulu!

29 Kana mu yangalalaka na mpasi ya muntu yina ke yinaka munu,

kana mu dumukaka na kyese samu na mpasi yina bwidilaka yandi,

30 munu yina salaka ve ti yinwa ya munu kubwa na masumu,

na kulomba lufwa ya yandi na nzila ya nsiingulu.

31 Kana bantu ya yinzo ya munu ya lele vwandaka tuba ve mutindu yayi:

«Nani me yukuta ve mbisi ya Yobi?»

32 Nzenza vwandaka lutisa ve mpimpa na ngaanda,

mu vwandaka fungudila kizyeti mwelo ya munu.

33 Kana mu bumbaka yimbi ya munu mutindu salaka Adami,

kana mu bumbaka yimbi ya munu na kati ya posi ya kinkuti ya munu,

34 samu ti mu kuzwaka boma na makelele ya nkonga,

samu ti mu vwandaka kima kusafula yina bantu ya makanda vwandaka safula munu,

mu vwandaka ya munu swii, kondwa kutula dikulu na mwelo ya yinzo ya munu samu na kubasika.

35 Aa, kana ya vwandaka na muntu yina lenda kuwa munu!

Yayi ni kinzonzi ya munu ya nsuka.

Bika ti Nzambi-Mpungu kupesa munu mvutu!

Na yina me tadila mukanda ya kufunda munu yina mutantu ya munu sonikaka,

36 mu ke nata yawu na zulu ya digembo ya munu,

mu ke kanga yawu na yintu mutindu yimpu.

37 Mu ke zabisa yandi na dede nyonso mutindu mu me dyatila,

mutindu mfumu, mu ke belama na yandi.

38 Kana bilanga ya munu fundaka munu,

mpe ti mikala ya yawu basisaka mansangasa,

39 kana mu kudyaka madya ya yawu kondwa kufuta yawu,

kana mu nyongisaka bantu ya kuzwa yawu,

40 bika ti bayinti ya bansende kubasika na kisika ya bambuma ya faline,

mpe ti matiti ya yimbi kubasika na kisika ya oloze!

Kinzonzi ya Yobi me suka awa.