MAMBU YA ELIWU
32
32–37
1 Babakala tatu yayi bikaka na kupesaka Yobi bamvutu, samu ti yandi mosi Yobi vwandaka banza ti yandi vwandaka ya kudedama. 2 Na yina, Eliwu dasukaka. Eliwu vwandaka mwana ya Balakele, mu-Buzi, muntu ya dikanda ya Lame. Yandi dasukilaka Yobi, samu ti Yobi vwandaka tuba ti yandi vwandaka ya kudedama kulutila Nzambi. 3 Yobi dasukilaka mpe bampangi ya yandi tatu, samu ti bawu vwandaka ve na mvutu ya kupesa mpe samu ti, bawu talaka ti Nzambi salaka yimbi. 4 Mutindu bampangi ya yandi tatu yina vwandaka bakuluntu ya yandi, Eliwu vingilaka mwa ntangu ntete ti yandi zonza na Yobi. 5 Kasi ntangu Eliwu talaka ti babakala tatu yina vwandaka dyaka ve na mvutu ya kupesa, yandi dasukaka.
Eliwu ke na kusikimisa mambu ya yandi
6 Eliwu, mwana ya Balakele, mu-Buzi bakaka kinzonzi na kutuba mutindu yayi:
Mu kele ntwenya mpe beno, beno ke bantu ya kukula.
Ni yawu yina mu vwandaka me tekita, mu vwandaka na boma,
boma ya kuzabisa beno mambu yina mu zaba.
7 Mu vwandaka tuba na yisi ya ntima mutindu yayi: «Muntu ya kukula ke zaba na kuzonza,
muntu yina ke na bamvula mingi ke zaba na kulakisa ndwenga.»
8 Na kutala mbote na kati ya muntu ni mpeve ke pesaka mayela,
kiwumunu ya Nzambi-Mpungu.
9 Lutangu ya bamvula mingi ke pesaka ve ndwenga,
mpe ni biboba ve ke na mayela ya kuzaba ludedomo.
10 Ni yawu yina, mu ke na kutuba mutindu yayi: «Kuwa munu!
Munu mpe mu ke zabisa nge yina mu zaba.»
11 Beno me tala! Mu vwandaka vingila beno manisa kinzonzi ya beno,
mu tekaka dikutu ya munu na kuwa banzonzolo ya beno,
samu na kufyongonina na mbote nyonso mambu ya Yobi.
12 Mu vwandaka me landa beno mbote-mbote.
Kasi ata mosi na kati ya beno me sala ti Yobi kundima mambu ya beno,
ata mosi na kati ya beno me pesa mvutu na mambu ya yandi.
13 Mpe beno tuba ve ti: «Beto kele na ndwenga,
samu ti kaka ni Nzambi lenda nunga yandi, kasi ni muntu ve!»
14 Ni na munu ve yandi me sadila kinzonzi ya yandi.
Mu ke baka ve mambu ya beno na kuvutudila yandi mvutu.
15 Bawu me kuma na boma, bawu kele dyaka ve na dyambu ya kuzonza!
Bayinwa me kangama bawu!
16 Mu me vingila, mpe mutindu bawu ke na kuzonza ve,
bawu me telama mpe ke na kupesa dyaka ve mvutu,
17 na ntangu yayi, ni munu ke pesa mvutu,
munu mpe, mu ke zabisa beno mambu yina mu zaba.
18 Ya tsyelika, mu ke ya kufuluka na mambu,
mpeve ke na kutumisa munu na kutuba,
19 na kati ya munu, mu ke na kutala mutindu malafu yina ba me ningisa
mpe ke na kusosa na kubasika, mu ke na kutala
mutindu mayuki ya malu-malu ke na kusosa na kumwangana.
20 Mu ke zonza samu ti mu pema,
mu ke fungula yinwa, mu ke pesa mvutu.
21 Mu ke vwanda ve na lweka ya muntu mosi,
mu ke leba ata muntu ve.
22 Na kutala mbote, mu zaba ve kuleba.
Kana mu sala yawu, Nzambi yina yidikaka munu,
ke katula munu na nswalu nyonso.