1 Na yina, Eliwu bakaka kinzonzi, yandi tubaka dyaka:

2 Beno bantu ya ndwenga, kuwa mambu ya munu!

Beno bayina kele na luzabu, beno fungula makutu na mambu yina mu ke na kutuba!

3 Samu ti dikutu ke swasikisaka mambu,

mutindu ludimi ke zabaka kitoko to yimbi ya madya.

4 Beto soola kusungama,

beto zabeno beto na beto yina kele ya mbote.

5 Yobi tubaka: «Mu kele ya kudedama,

kasi Nzambi ke na kundima ve kudedama ya munu.

6 Mu kele ya kusungama, kasi ba ke na kutala munu mutindu muntu ya luvunu,

mu me sumuka ve kasi dyonga me lwalisa munu mputa mosi ya lufwa.»

7 Nani kele mutindu Yobi,

yandi ke sekaka Nzambi mutindu ba ke kunwaka maza,

8 yandi ke na kutambula kintwadi na bantu yina ke salaka yimbi,

yandi ke kwendaka nzila mosi na bantu ya yimbi.

9 Samu ti yandi tubaka: «Ya kele kwandi mpamba na muntu

na kusosa na kuyangidika Nzambi.»

10 Ni yawu yina, beno kuwa munu, beno bantu ya mayela!

Nzambi ke salaka ve yimbi!

Nzambi-Mpungu kele ya kudedama!

11 Yandi ke futisaka muntu mutindu kele mavanga ya yandi,

yandi ke pesaka na muntu ni muntu mutindu kele bansalulu ya muntu yina.

12 Ya tsyelika, Nzambi ke salaka ve yimbi.

Ata fyoti ve Nzambi-Mpungu ke tengimisaka ludedomo.

13 Nani pesaka yandi kiyeko ya kuyala ntoto?

Nani pesaka yandi yinza ya muvimba samu ti yandi kutwadisa yawu?

14 Kana yandi kanisa kaka na yandi mosi,

kana yandi katula mpeve ya yandi mpe kiwumunu ya yandi,

15 nyonso ke kufwa kaka na mbala mosi,

mpe muntu ke vutuka na ntoto.

16 Kana nge kele na mayela, kuwa mambu yayi,

fungula makutu na kuwa mambu ya munu!

17 Nzambi lenda kuyala kana yandi ke yinaka ludedomo?

Nzambi ya kudedama mpe ya lulendo, ba lenda semba yandi?

18 Ba lenda tuba na ntinu ti: «Nge kele muntu ya mpamba!» Ba lenda tuba na bamfumu ti: «Beno kele bantu ya yimbi!»

19 Nzambi ke talaka ve ti yandi yayi kele mfumu,

mpe yandi ke swasikisaka ve mvwama na mputu,

samu ti bawu nyonso ni yandi yidikaka bawu.

20 Kaka na mbala mosi, bantwadisi me kufwa na kati-kati ya mpimpa,

bantu me manga na kutumama mpe bamfumu me kufwa,

bantwadisi ya ntima ya yimbi ba me katula bawu na malembe nyonso.

21 Samu ti Nzambi ke talaka ndyatulu ya muntu,

yandi ke talaka banzila yina muntu ke landaka.

22 Samu ti na yandi kitombe kele ve, mpewo ya lufwa kele ve,

samu ti bantu ya yimbi kwenda kubumbama.

23 Nzambi kele ve na nsatu ya kubaka ntangu mingi na kutala muntu,

samu na kufundisa yandi.

24 Yandi ke nikaka bantu ya ngolo tekila yandi sosa na kuzaba yinki bawu me sala,

mpe yandi ke tulaka bamfumu ya nkaka na kisika ya bawu.

25 Samu ti yandi zaba mavanga ya bawu,

na mpimpa, yandi ke bwisa mpe ke nika bawu.

26 Yandi ke bulaka bawu mutindu ba ke bulaka bantu ya yimbi,

na meso ya bantu nyonso.

27 Samu ti bawu me bika yandi,

mpe samu ti bawu me swasikisa ve banzila ya yandi.

28 Bawu me sala ti bidilu ya mputu kuma tii na sika ya Nzambi,

Nzambi me kuwa kuyawula ya bantu ya kyadi.

29 Kana Nzambi dingama, nani ke semba yandi?

Kana yandi bumba kizizi ya yandi, nani lenda tala yawu?

Yandi ke sadisaka yinsi, yandi ke sadisaka muntu.

30 Yandi ke ndimaka ve ti muntu yina ke yala yinsi kuvwanda muntu ya yimbi,

yandi kuvwanda ve mutambu samu na bantu.

31 Kana yandi me tuba na Nzambi mutindu yayi:

«Mu me vibidila mpasi ya munu, mu ke sala dyaka ve yimbi.

32 Yina nabunu mu tala, lakisa munu yawu.

Kana mu salaka mambu yina kele ve ya kudedama,

mu ke vutukila dyaka yawu ve.»

33 Samu na kufuta muntu ya mutindu yina, Nzambi ke vwanda na nsatu ya dibanza ya nge?

Kana nge ke na kubanza mutindu yina, na munu, ya kele mutindu yina ve.

Na yina, tuba yina nge zaba!

34 Bantu ya mayela

mpe bantu ya ndwenga yina ke kuwa munu ke tuba:

35 «Yobi ke na kuzonza kondwa luzabu,

mpe bampova ya yandi ke kaka mambu ya buzoba.

36 Bika ti ba tatamana na kumeka Yobi tii na nsuka,

samu ti yandi ke na kupesa bamvutu mutindu muntu ya yimbi!

37 Samu ti na zulu ya disumu ya yandi, yandi ke na kubwela dyaka kondwa kutumama,

yandi ke na kubula maboko na lunangu nyonso na kati-kati ya beto,

yandi ke na kuzonza mambu mingi ya yimbi na Nzambi.»