2 Nge ke na kubanza ti nge ke ya kulunga?

Nge lenda tuba ti nge kele ya kudedama na ntadisi ya Nzambi?

3 Samu ti nge ke tubaka ti: «Wapi ndandu mu ke kuzwa kana mu sumuka ve?

Wapi difuta Nzambi ke kuzwa?»

4 Ni munu ke pesa nge mvutu,

mu ke pesa mvutu na nge, na bampangi ya nge yina kele na nge.

5 Tala dizulu mpe fyongonina yawu!

Tala matuti,

tala mutindu yawu kele ya kuzangama na zulu ya nge!

6 Kana nge sala disumu, ni na Nzambi nge me sala yimbi?

Ntangu yimbi ya nge ke kuma ya mingi, yinki nge ke sala yandi?

7 Kana nge kele ya kudedama, yinki nge ke pesaka yandi?

Yinki yandi ke kuzwaka na sika ya nge?

8 Yimbi ya nge lenda kukwamisa kaka muntu mutindu nge,

kudedama ya nge kele mfunu kaka na muntu.

9 Ba ke na kulooka samu ti kunyokola me lutila,

ba ke na kuyawula samu ti mingi ke na kukwamuswa.

10 Kasi ata muntu ke na kutuba: «Wapi Nzambi yina yidikaka munu,

Nzambi yina ke pesaka mikunga ya nsayi na yisi ya pongi,

11 yandi yina ke longaka beto kulutila bibulu ya ntoto,

mpe ke pesaka beto ndwenga kulutila bandeke ya mazulu?»

12 Na yina, ba ke na kulooka kasi yandi ke na kundima ve,

samu na mayama ya bantu yina ke salaka yimbi.

13 Ya tsyelika, ya kele kaka ya mpampa,

Nzambi ke kuwaka ve mambu ya mpamba-mpamba,

Nzambi-Mpungu ke talaka yawu ata fyoti ve!

14 Kasi nge ke na kutuba ti nge ke na kutala yawu ve,

nge ke na kutuba ti dyambu ya nge ke na ntadisi ya yandi,

nge ke na kuvingila yawu.

15 Kasi ntangu yayi Nzambi ke na kulakisa ve nkele ya yandi,

mpe yandi ke na kutala ve yimbi ya kulutila yina ke na kusalama.

16 Ya tsyelika Yobi ke na kufungula yinwa, samu na kuzonza kaka mambu ya mpamba,

yandi ke na kwendaka zonza mingi-mingi kondwa mayela.