2 Vibidila munu mwa ntangu, mu ke longa nge,

samu ti ya ke na mambu ya nkaka ya kutuba samu na Nzambi.

3 Mu ke baka luzabu ya munu ntama,

mpe mu ke sadila ludedomo na ntadisi ya Nzambi yina yidikaka munu.

4 Samu ti ya tsyelika mambu ya munu kele ve ya luvunu,

Nzambi yina kele na munu, yandi kele ya kulunga na kati ya luzabu ya yandi!

5 Nzambi ke na lulendo mpe yandi ke mangaka ata muntu ve,

yandi ke na lulendo na ngolo ya mayela ya yandi.

6 Yandi ke bikaka ve ti muntu ya yimbi kuzinga,

kasi yandi ke lakisaka ludedomo ya yandi na bamputu.

7 Yandi ke bikaka ve na kusikika meso ya yandi na bantu ya kudedama,

yandi ke tulaka bantinu na kyandu,

yandi ke vwandisaka bawu ya mankululu, samu ti bawu kuzwa nzitusu.

8 Kana bawu kangama na bampanga ya bankole,

kana bawu kangama na kati ya bampasi,

9 yawu zola kutuba ti yandi me zola kulakisa mavanga ya bawu,

mpe kondwa kutumama ya bawu ntangu bawu vwandaka lakisa lunangu ya bawu.

10 Yandi me fungula makutu ya bawu samu na kulwengisa bawu,

mpe yandi me zabisa bawu na kubika mavanga ya bawu ya yimbi.

11 Kana bawu kuwa mpe ti bawu kutumama,

bawu ke manisa bilumbu ya bawu na kati ya buyenge,

mpe bawu ke manisa bamvula ya bawu na kyese.

12 Kana bawu kuwa ve, bawu ke kufwa na mbele ya mvita,

bawu ke kufwa samu ti bawu ke ve na luzabu.

13 Bantu ya yimbi yina ke na bantima ya kukangama na nkele,

bawu, ba ke lombaka ve lusalusu ya Nzambi, ntangu yandi ke kangaka bawu na bampanga.

14 Bawu ke kufwaka na buntwenya,

bawu ke bebisaka luzingu ya bawu

na kati ya bantu yina ke salaka kindumba ya longo.

15 Kasi Nzambi ke kuulaka muntu ya mpasi

na kati ya mpasi ya yandi,

ni na kati ya bankwamusu Nzambi ke kebisaka yandi.

16 Nge, yandi ke katula nge na kati ya manyongo,

samu na kutula nge na kisika ya mbote, ya kuzuna,

mesa, kisika ba ke vwandisa nge,

yawu ke vwanda ya kufuluka na madya ya kitoko.

17 Kasi kana nge sala lufundusu ya nge,

nge mosi mutindu bantu ya yimbi,

lufundusu mpe banzengolo yina, ke kanga nge.

18 Kubika ve ti nkele ya nge sala ti nge seka Nzambi.

Kubanza ve ti nge lenda sumba Nzambi na madeso ya bana,

ya ke vwanda yimbi mingi.

19 Kana nge looka ti ba kwiza sadisa nge,

yawu ke katula nge na mpasi?

Ata nge sadila ngolo ya nge nyonso,

yawu ke katula nge na mpasi?

20 Kutula ve ntima na mpimpa,

kubanza ve ti yawu ke zimbisa makanda ya bantu.

21 Sala keba! Kubaluka ve na lweka ya yimbi!

Samu ti bampasi ya nge ke na kunata nge na yimbi.

22 Ya tsyelika, bunene ya Nzambi ke talanaka na lulendo ya yandi,

wapi mulongisi yina ke longisaka mutindu yandi?

23 Ya ke na muntu me lakisaka yandi nzila?

Nani lenda tuba na yandi: «Dyambu yina nge me sala kele ve ya kudedama?»

24 Bambuka moyo na kukembila bunene ya bisalu yina yandi me sala.

Bika ti bantu kuyimbila yandi.

25 Bantu nyonso ke talaka yina Nzambi ke salaka,

konso muntu ke tadikilaka yawu ntama.

26 Nzambi ke nene, kasi nabunu beto bakula yawu,

ba ke tangaka ve lutangu ya bamvula ya yandi.

27 Yandi ke bendaka mabete ya maza,

yina ke kwendaka na zulu mutindu dibungi,

yandi ke nokisaka mvula na yawu,

28 matuti ke bikaka ti yawu kubwa,

matuti ke mwangisaka yawu na zulu ya mukangu ya bantu.

29 Nani lenda zaba mutindu matuti ke fungukaka,

mpe wapi mutindu nzasi ke wakisaka makelele ya yawu na mazulu?

30 Nzambi ke yalumunaka nsemo ya yandi na balweka ya yandi nyonso,

mpimpa ke fukaka yisi ya mubu.

31 Ni na bima nyonso yina yandi ke fundisaka bantu,

yandi ke pesaka madya ya mingi-mingi.

32 Yandi ke bumbaka lusyemo na kati ya maboko ya yandi,

yandi ke tumisaka yawu na kwenda bula kisika yina yandi me kanisa.

33 Nzasi ya yandi ke zonzilaka nkwizulu ya yandi,

bibulu ke lakisaka ti yandi me belama.