1 Ni yawu yina, ntima ya munu ke na kutekita,

yawu ke na kuningana na kisika ya yawu.

2 Beno kuwa, beno kuwa kuningana ya ndinga ya yandi,

mpe kungala yina ke na kubasika na yinwa ya yandi!

3 Yandi ke mwangisaka yawu na mazulu nyonso,

mpe lusyemo ya yandi ke bulaka tii na bandilu ya ntoto.

4 Mpe kidumu ke wakanaka, bunene ya yandi ke zabakanaka na ndinga ya yandi,

mpe kana ndinga ya yandi me wakana, yandi ke simbaka dyaka ve banzasi.

5 Na ndinga ya yandi ya lulendo, Nzambi ke salaka mambu ya ngitukulu,

yandi ke salaka bimangu ya nene yina beto lenda bakula ve.

6 Yandi ke tubaka na neze mutindu yayi: Kubwa na ntoto!

Yandi ke fidisaka bamvula ya mutindu na mutindu mpe bamvula ya nene-nene.

7 Nzambi ke kangaka bisalu ya bantu nyonso,

samu ti bantu nyonso kuzaba ti ni yandi yidikaka bawu.

8 Kibulu ya mfinda ke kwendaka bumbama na kati ya ntadi,

yandi ke lalaka na kati ya yinzo ya yandi.

9 Kitembo ya ngolo ke katukaka na sude,

mupepe ya madidi ke katukaka na node.

10 Na kiwumunu ya Nzambi maza ya ditadi ke yilamaka,

mpe bamaza ya nene ke kangamaka.

11 Yandi ke tulaka mupepe ya madidi na kati ya matuti,

yandi ke mwangisaka yawu mutindu balusyemo.

12 Ni yandi ke zungisaka yawu na balweka nyonso,

samu ti yawu kutumama

na nyonso yina yandi ke tumisaka bawu,

na kati ya yinza mpe na ntoto.

13 Nzambi ke fidisaka matuti samu na kusemba bantu awa na ntoto,

to samu na kulakisa bawu bumbote ya yandi.

14 Yobi fungula makutu, kuwa mambu yayi!

Dingama samu na kubakula bimangu ya Nzambi!

15 Nge zaba wapi mutindu Nzambi ke twadisilaka yawu?

Nge zaba wapi mutindu yandi ke basisaka lusyemo na kati ya matuti?

16 Nge zaba wapi mutindu matuti ke salaka samu ti yawu kubwa ve?

Yina ni bisalu ya ngitukulu ya muntu yina zaba mbote-mbote mambu nyonso.

17 Nge yina binkuti kele tiya,

ntangu yina ntoto kele ya kudingama na yisi ya mupepe yina me katuka na sude,

18 nge lenda sala mutindu yandi na kuyalumuna muludi ya mazulu,

mpe ti yawu kuvwanda ngolo mutindu kitala-tala yina ba me yidikila na kisengo?

19 Zabisa beto yinki beto fwana kutuba na yandi,

beto ke zonza dyaka ve samu na kitombe.

20 Kana mu zola kuzonza, ba fwana kuzabisa ntete yandi?

Ba fwana kuzabisa yandi yawu samu ti yandi kuzaba?

21 Na mpamukunu, ba ke na kutala dyaka ve nsemo yina matuti me bumba,

kasi ntangu mupepe ke fula, matuti yango ke katuka,

22 nsemo me katuka na node,

kulezima ya ngitukulu ke na kuzunga Nzambi.

23 Beto zaba ve wapi mutindu beto ke kuma tii na sika ya Nzambi-Mpungu.

Yandi kele Nzambi ya nene, yandi ke na ngolo,

yandi kele ya kudedama mpe bunene ya yandi kele ya kulunga,

yandi ke nyokolaka ata muntu ve.

24 Ni yawu yina bantu fwana kuzitisa yandi.

Yandi ke talaka ve bantu yina ke talaka ti ba ke bantu ya ndwenga.