2 «Nge yina ke na kutala ti mambu ya munu kele mambu ya mpamba-mpamba,

nge kele nani na kwendaka zonza mambu yina nge zaba ve?

3 Kubama, vwanda mutindu kinwani ya ngolo,

mu ke yufula nge byuvu mpe nge ke pesa munu bamvutu.

4 Wapi sika nge vwandaka ntangu mu vwandaka yidika ntoto?

Zonza yawu kana nge ke na mayela.

5 Nge zaba nani sikikaka bandilu?

Nge zaba nani tulaka singa ya kutezila?

6 Nge zaba yinki me simbaka makunzi ya yawu?

To nani tulaka ditadi ya nsongi,

7 ntangu bambwetete ya suka vwandaka yimbila kintwadi na kyese nyonso,

mpe ntangu bana nyonso ya Nzambi vwandaka sala milolo ya nsayi?»

8 Nani kangaka mubu na myelo,

ntangu yawu vwandaka basika na kivumu ya mama,

9 ntangu mu salaka ti dituti kuvwanda mutindu kinkuti ya yawu

mpe kitombe ya ngolo mavunga ya yawu?

10 Mu kwikaka yawu bandilu ya munu,

mpe mu tulaka yawu bikangulu mpe myelo.

11 Mpe mu tubaka: «Nge ke suka awa. Nge ke kuma ve tii awa,

bimpo ya lunangu ya nge ke suka awa!»

12 Ya ke na kilumbu nge me tumisaka bwisi na kutsya?

Nge me lakisaka nsemo ya kilumbu kisika ya yawu,

13 samu ti yawu kutalana na bandilu ya ntoto,

mpe ti bantu ya yimbi kubwa?

14 Na suka-suka, ntoto ke kumaka mbwaki

mutindu kibuma yina ba ke yidikilaka mayuki,

yawu ke talanaka mutindu kinkuti ya mukembo.

15 Kasi bantu ya yimbi ke kondwa nsemo ya bawu,

bawu ke lendaka dyaka ve na kunanguna diboko samu na kunwana.

16 Nge me kumaka tii na kisika yina ke katukaka mubu?

Nge me tambulaka na dibulu yina kele ve na nsuka?

17 Myelo ya kufwa, ba me lakisaka nge yawu?

Nge me talaka nkotolo ya mpewo ya bafwa?

18 Nge me tadikilaka yimeni bunene nyonso ya ntoto?

Zabisa mutindu yawu kele, nge yina zaba yawu, yawu nyonso.

19 Wapi nzila yina ke kwendaka kisika kele nsemo?

Kitombe ke zingaka wapi sika,

20 samu ti nge nata bawu na kisika ya bawu,

mpe kuzaba nzila ya kisika yina bawu ke zingaka?

21 Nge zaba yawu mbote, samu ti nge vwandaka me butuka yimeni,

nge yina ke zingaka katuka ntama!

22 Nge me kumaka tii na kibumbulu ya neze?

Nge me talaka kibumbulu ya mvula ya matadi,

23 yina mu tulaka na lweka samu na bantangu ya mpasi,

samu na bilumbu ya muzingu mpe ya mvita?

24 Wapi nzila ke basikilaka nsemo samu ti yawu kwenda na balweka nyonso,

lweka yina mupepe ya esete ke fulaka na ntoto?

25 Nani ke pesaka maza ya mvula nzila ya kulutila,

nani pesaka nzila na lusyemo mpe kidumu?

26 Samu na kunokisa mvula na ntoto yina me kondwa bantu,

mpe na yinsi ya kuyuma kisika ata muntu kele?

27 Nani ke nokisaka mvula samu na kunwikisa ntoto ya kuyuma,

samu na kumenisa matiti mpe samu na kukulisa yawu?

28 Mvula ke na tata?

Nani ke butaka mabete ya kinoko?

29 Maza ya matadi ke basikilaka na kivumu ya nani?

Nani ke butaka mvula ya madidi ya kulutila yina ke katukaka na zulu?

30 Maza ke kangamaka mutindu ditadi,

zulu ya mubu ke kumaka ngolo.

31 Nge lenda kukanga ba-Peleyade kisika mosi,

to kufungula basinga yina ke simbaka Oliyone?

32 Ni nge ke basisaka bambwetete na ntangu ya yawu,

mpe ke salaka ti bambwetete ya node yina ba ke bokilaka Uluse ya nene kutambula na bana ya yandi?

33 Nge zaba misiku ya dizulu?

Nge lenda kuvwandisa luyalu ya Nzambi awa na ntoto?

34 Nge lenda kuzangula ndinga ya nge tii na matuti,

samu ti maza ya mvula kubwidila nge?

35 Ni nge ke fidisaka balusyemo bisika yawu ke kwendaka?

Ni na sika ya nge yawu ke tuba: «Beto bawu yayi?»

36 Nani pesaka ndwenga na ndeke yina ba ke bokilaka ibise?

Nani pesaka susu ya mbakala mayela ya kuswasikisa?

37 Nani lenda sadila ndwenga ya yandi samu na kutanga matuti,

mpe kutengimisa mayuki yina kele na mazulu,

38 samu ti fundu-fundu kunanguka,

mpe yawu kukangama na bikunku ya ntoto?

39 Ni nge ke sosilaka nkosi ya nkento mbisi ya kudya,

mpe ke salaka ti bana ya yandi kuvwanda ve nsatu?

40 Ni nge ke salaka yawu ntangu bawu ke vwandaka na kati ya bayinzo ya bawu,

kana bawu me kubama na kubwila kibulu?

41 Nani ke lambilaka nkwankwa madya ya yandi,

ntangu bana ya yandi ke lookaka na sika ya Nzambi,

mpe ke kwendaka yenga-yenga na kusosa madya?