40
Mvutu ya ntete ya Yobi
1 Yave bakaka kinzonzi. Yandi tubaka na Yobi mutindu yayi:
2 Muntu yina ke pesaka malongi, yandi lenda meka na kuswanisa Nzambi ya lulendo?
Muntu yina ke sembaka Nzambi, yandi lenda kuzwa mvutu ya kuvutula na Nzambi?
3 Yobi vutulaka na Yave mutindu yayi:
4 Mu kele kaka kima ya mpamba, wapi mvutu mu ke vutula?
Mbote mu tula diboko na yinwa ya munu, mu vwanda swii.
5 Mu me zonza kaka mbala mosi, mu ke pesa dyaka ve mvutu,
na mbala ya zole, mu ke bwela ata dyambu ve.
Yobi kele Nzambi?
6 Na kati ya kitembo ya ngolo, Yave vutulaka Yobi mvutu yayi:
7 Kubama, vwanda mutindu kinwani ya ngolo!
Mu ke yufula nge, nge ke pesa munu mvutu.
8 Nge zola kuzonza ya tsyelika ti mu kele ve ya kudedama?
Nge ke na kufunda munu samu ti nge talana muntu ya kudedama?
9 Diboko ya nge kele mutindu mosi na ya Nzambi?
Ndinga ya nge ke dumaka mutindu ndinga ya yandi?
10 Kana ya kele ni mutindu yina, lwata nkembo mpe bunene,
lwata kitoko mpe buzitu mutindu kinkuti.
11 Mwangisa bimpo ya nkele ya nge,
tala bantu nyonso ya lunangu mpe kulula bawu.
12 Tala bantu nyonso ya lunangu, futika bawu,
kaka na kisika yina, nika bantu ya yimbi.
13 Bumba bawu na kati ya fundu-fundu,
kanga bawu na kati ya boloko.
14 Na yina, munu mosi, mu ke kembila nge,
samu ti kununga ya nge ke salama na diboko ya nge.
Nguvu
15 Tala kibulu yina ba ke bokilaka nguvu, mu me sala mutindu nge,
yawu ke kudyaka matiti mutindu ngombe.
16 Ngolo ya yawu kele na luketo ya yawu,
mpe mvingu ya yawu kele na musuni ya kivumu ya yawu.
17 Mukila ya yawu kele ngolo mutindu sedele,
misisa ya makulu ya yawu kele ya kukangama.
18 Mikwa ya yawu kele mutindu kisengo ya mbwaki,
bambanzi ya yawu kele mutindu bisengo.
19 Yawu kele mbandukulu ya banzila ya Nzambi,
yina me yidika yawu me pesa yawu mbele ya mvita.
20 Matiti yina yawu ke kudyaka ke katukaka na myongo,
kisika ke sakanaka bibulu ya mfinda.
21 Yawu ke lalaka na mpewo ya bayinti,
yawu ke bumbamaka na miila kisika kele batwandu.
22 Mpewo ya matiti ke bumbaka yawu,
bayinti yina kele pene-pene ya nzadi me zunga yawu.
23 Kana nzadi fuluka, yawu ke nyonga ve,
ata ti nzadi ya Yolodani kuyuluka tii na yinwa ya yawu, yawu ke vwanda swii.
24 Ba lenda simba yawu ntangu meso ya yawu kele ya kufunguka?
Ba lenda kanga yawu na mutambu samu na kutobola mbombo ya yawu?
Levyatane
25 Nge lenda benda Levyatane na ndoba?
Nge lenda kanga ludimi ya yawu na singa?
26 Nge lenda kotisa yawu twandu na mbombo?
Nge lenda tobola mubanga ya yawu na kisengo yina kele mutindu ndoba?
27 Yawu lenda baka ntangu mingi na kubondila nge?
Yawu lenda zabisa nge mambu na lembami?
28 Yawu lenda sala ngwisani na nge?
Nge lenda baka yawu mutindu mundongo bantangu nyonso?
29 Nge lenda sakana na yawu mutindu ba ke sakanaka na ndeke?
Nge lenda kanga yawu samu ti bana ya nge ya bakento sakana na yawu?
30 Bantu ya mumbungu lenda tekisa yawu?
Bantu ya mumbungu lenda kabula yawu bawu na bawu.
31 Nge lenda tobola mpusu ya yawu na kubula yawu na madyonga?
Nge lenda tobola yintu ya yawu na kisengo?
32 Sombola yawu, nwanisa yawu,
nge ke bambuka moyo mpe nge ke sala dyaka yawu ve!