41
1 Na mantwala ya yawu kivuvu kele kaka mpamba,
kaka na kutala yawu muntu ke kubwa?
2 Muntu ve ke na kibakala na kusombola yawu,
nani lenda kutedimina munu?
3 Nani defisaka munu samu ti mu vutula yandi yawu?
Awa na ntoto, bima nyonso kele ya munu.
4 Mu ke vwanda ve swii na yina me tadila nzutu ya yawu,
na ngolo ya yawu mpe na kitoko ya nzutu ya yawu.
5 Nani katulaka kinkuti ya yawu?
Nani lenda kota na kati-kati ya mibanga ya yawu?
6 Nani fungulaka myelo ya yinwa ya yawu?
Meno ya yawu ke pesaka nsisi!
7 Makalu ya yawu kele ya kuvukana yawu na yawu na mukongo ya yawu,
yawu kele mutindu binwanunu yina ke kebaka nzutu yina kele ya kuvukana na ngolo nyonso.
8 Ya kele ya kukangama yawu na yawu,
mupepe lenda kuluta ve na kati-kati ya yawu.
9 Yawu ke ya kukangama yawu na yawu,
yawu me simbasana mpe yawu lenda kabuka ve.
10 Yinwa ya yawu ke basisaka nsemo,
meso ya yawu ke mutindu nsemo ya suka-suka.
11 Tiya ke basika na yinwa ya yawu,
milaka ya tiya ke basika na yinwa ya yawu.
12 Mulinga ke basika na mbombo ya yawu,
mutindu nzungu ke na kutoka na tiya.
13 Kiwumunu ya yawu ke namisaka makala,
milaka ya tiya ke basikaka na yinwa ya yawu.
14 Ngolo ke zingaka na kati ya laka ya yawu,
boma ke tekilaka na mantwala ya yawu.
15 Binama ya nzutu ya yawu kele ya kuvukana kisika mosi,
yawu me kangama na yawu, yawu lenda kuningana ve.
16 Ntima ya yawu kele ngolo mutindu ditadi,
ngolo mutindu ditadi yina ba ke nikaka bambuma.
17 Ntangu yawu ke telamaka, bayina me lutila na kibakala ke tala boma,
mpe samu na boma bawu ke kima.
18 Samu na muntu yina ke belama na yawu, mbele ya mvita ke sala kima mosi ve,
ya vwanda dyonga, dikonga, mpe kinwanunu yina ke kebaka nzutu.
19 Yawu ke talaka kisengo mutindu matiti ya kuyuma,
kisengo ya mbwaki kele mutindu yinti ya kubola.
20 Dyonga ke talisa yawu boma ve,
yawu ke talaka matadi ya kizukumununu mutindu matiti ya kuyuma.
21 Yawu ke talaka kikonkoto mutindu matiti ya kuyuma,
yawu ke sekaka makelele ya dikonga.
22 Kivumu ya yawu kele na bansonso yina ke na meno,
yawu kele mutindu sengo yina yawu ke bendaka na ntoto.
23 Yawu ke tokisa yisi ya mubu mutindu nzungu,
yawu ke kitulaka mubu na mbwata ya mananasi.
24 Na manima ya yawu, yawu ke bikaka nzila yina ke lezimaka,
dibulu yina kele ve na nsuka me kuma mpembe mutindu bansuki ya kiboba.
25 Awa na ntoto yawu kele ve na ntwadisi,
yawu yilamaka samu na kutalaka boma ve.
26 Yawu ke talaka nyonso yina ke ya kuzangama,
yawu kele ntinu ya bibulu yina me lutila lulendo.