Dibuku ya
MANYONGO
ya Yelemya
NKOTOLO
Bikapu tanu ya dibuku yayi yina mumbikudi Yelemya sonikaka, kele na dyambu yayi ya mfunu: Mwangusulu ya Yelusalemi mpe mwangusulu ya Yinzo ya nene ya Nzambi. Yawu salamaka na binwani ya Babilone na mvula 587 tekila mbutukulu ya Yesu-Klisto (2Bt 25.1-30; Yel 39.1-18). Mwangusulu yango sukisaka kimfumu ya Yuda mpe kimpwanza ya yawu. Dibuku yayi ke na kulakisa mbote-mbote bampasi ya mingi-mingi yina bantu ya Yuda talaka. Ni yawu yina ba ke bokilaka yawu «Dibuku ya Manyongo.»
Dibuku yayi ke na kuyufula mutindu yayi: Samu na yinki Nzambi me bika beto? Yandi ke ntete kwandi mbote? Mumbikudi Yelemya ke na kupesa mvutu yayi:
«Bumbote ya Yave me manisa ve, luzolo ya yandi me suka ve. Yawu ke vutukilaka konso suka (Mng 3.22-23).»
Dibuku yayi lenda kukabuka mutindu yayi:
- Mukunga ya ntete ya kyadi: Ba me losa Yelusalemi (Mng 1).
- Mukunga ya zole ya kyadi: Yave vwandaka mutindu mbeni (Mng 2).
- Mukunga ya tatu ya kyadi: Kivuvu kele kwandi (Mng 3).
- Mukunga ya yiya ya kyadi: Yelusalemi me mwangana (Mng 4).
- Mukunga ya tanu ya kyadi: Ba ke na kulomba kyadi ya Yave (Mng 5).
1
Yelusalemi, mufwidi ya kento yina ba me losa
1 Wapi mutindu yayi!
Yawu me bikana kaka yawu mosi!
Mbanza yina vwandaka ya kufuluka na bantu!
Yawu me kuma mutindu mufwidi ya kento!
Mbanza yina vwandaka nsangu na bayinsi nyonso!
Mbanza yina vwandaka mutindu mwana ya ntinu yina ke na kuyala bizunga,
yawu me kuma mutindu mundongo.
2 Yawu ke na kudila-dila mpimpa nyonso,
mansangasa ke na kukulumuka na matama ya yandi.
Na bayina nyonso vwandaka zola yandi,
ata muntu ke na kukindisa yandi.
Bandiku ya yandi nyonso me bika yandi,
bawu me kuma bambeni ya yandi.
3 Ba me nata na ngolo bantu ya Yuda na yinsi ya nzenza.
Ba me nyokola bawu.
Ba me kotisa bawu na bundongo ya mpasi.
Bawu ke na kuzinga na kati-kati ya bayinsi ya nkaka.
Bawu ke na kuzwa ve kisika ya bawu mosi.
Mitantu nyonso yina vwandaka landa bawu,
me fyetikisa bawu na kati-kati ya bampasi ya bawu.
4 Banzila ya mbanza Siyone me kota kifwidi,
samu ti ata muntu ke na kukwiza dyaka na minkembo.
Bisika yina bantu vwandaka kwiza vukana me kuma ya mpamba.
Banganga-Nzambi ya yandi ke na kuyawula.
Bandumba ya yandi kele dyaka ve na kivuvu.
Yandi mosi mbanza me fuluka na kyadi ya kulutila!
5 Mitantu ya yandi me lutila yandi ngolo.
Ntima ya bambeni ya yandi me pema.
Ni Yave, ke na kutalisa mbanza mpasi,
samu ti bambala mingi, bantu ya yandi me tumama ve.
Bana ya fyoti ya mbanza me kwenda na yinsi ya nzenza
na lutumu ya ngolo ya bambeni ya bawu.
6 Nyonso yina vwandaka sala nkembo ya Siyone kele dyaka ve.
Bamfumu ya yandi me kuma mutindu
bansyesye yina me kondwa matiti ya kudya
mpe ke na kwendaka kima na kulemba nyonso
na mantwala ya kikubudi yina ke na kwendaka landa bawu.
7 Na bilumbu yayi, yina Yelusalemi kele ya kukuluka mpe ke na kwendaka yima,
Yelusalemi ke na kubambuka moyo na bima nyonso ya ntalu yina yandi vwandaka na yawu na ntangu ya ntama.
Ntangu bantu ya mbanza Yelusalemi me kubwa na maboko ya mutantu,
mpe ata muntu samu na kusadisa mbanza,
mitantu me tala mbanza yango
mpe bawu me seka samu ti yimeni samu na yawu.
8 Yelusalemi me sala disumu ya nene.
Ni yawu yina, yandi me kuma kima ya busafu.
Bayina nyonso vwandaka pesa yandi buzitu ke na kunyafuna yandi,
samu ti ba me tala kimpene ya yandi.
Yandi mosi ke na kuyawula
mpe ke na kuvutuka manima.
9 Bidimbu ya kondwa kuvedila ya yandi kele na dizwela ya yandi.
Yandi yindulaka ve na mambu yina zolaka bwidila yandi.
Yandi me pamuka na kubwa yina yandi me kubwa
mpe ata muntu ke na kukindisa yandi.
Yandi ke na kutuba: «Yave, tala mpasi ya munu,
samu ti mbeni ke na kulakisa ngolo ya yandi.»
10 Mbeni me tula diboko
na bima nyonso ya ntalu yina Yelusalemi vwandaka na yawu.
Yelusalemi me tala mutindu bantu ya bayinsi ya nkaka me kota na Yinzo ya nge ya longo,
bayina nge tumisaka ti bawu fwana kukota ata fyoti ve na kati ya mukangu ya nge.
11 Bantu nyonso ya mbanza Yelusalemi ke na kuyawula.
Bawu ke na kusosa kima ya kudya.
Bawu me pesa bima ya ntalu yina vwandaka na bawu samu na kuzwa kima ya kudya,
samu na kuzwa dyaka ngolo.
Yelusalemi ke na kutuba: «Yave, tala!
Tala wapi mutindu ba me yina munu.»
12 Beno bayina ke na kulutaka ya beno,
mpasi yayi me kuminaka ntete beno ve.
Beno tala mpe beno yindula,
ya kele na mpasi yina me fwanana na mpasi yayi me bwidila munu?
Ni Yave me kwika munu mpasi yayi na kilumbu yina yandi lakisaka nkele ya yandi ya kulutila.
13 Katuka kuna na dizulu,
yandi me fidisa tiya na kati ya mikwa ya munu
mpe yandi me dyata yawu.
Yandi me tambila munu mutambu na makulu
mpe yandi me vutula munu manima.
Yandi me kumisa munu kisika ya mpamba.
Yandi me kotisa munu na mpasi ya konso kilumbu.
14 Yandi me kangila munu kizitu samu na yimbi ya munu.
Yandi me kutikisa yimbi ya munu nyonso,
yawu me kuma tii na laka ya munu.
Yandi me manisa munu ngolo nyonso.
Mfumu me yekula munu na maboko ya bantu yina mu lenda sala ata kima ve.
15 Mfumu me bingisa binwani nyonso ya ngolo yina vwandaka na kati ya munu.
Yandi me vukisa binwani samu na kunwanisa munu,
samu na kufwa bantwenya ya munu.
Mfumu me nika ndumba ya kitoko ya Yuda
mutindu ba ke kamunaka bambuma ya vinu na kikamununu.
16 Mu ke na kudila samu na mambu yina.
Meso ya munu ke na kubulumuna mansangasa.
Samu ti muntu yina lenda kindisa munu kele ntama na munu.
Muntu yina lenda pesa dyaka munu ngolo kele ntama na munu.
Bana ya munu nyonso me zimbana,
samu ti mbeni vwandaka na ngolo ya kulutila.
17 Siyone me lambula maboko na kudila nyonso,
kasi, ata muntu samu na kukindisa yandi.
Yave me tumisa mitantu samu na kuzunga Yakobi.
Yelusalemi me kuma kima ya kuvedila ve na kati-kati ya bawu.
18 Ni Yave kele ya kudedama,
samu ti mu tumamaka ve na mambu yina yandi zonzaka.
Beno bantu nyonso, beno kuwa munu.
Beno tala mpasi ya munu!
Ba me nata na ngolo matoko na bandumba ya munu na yinsi ya nzenza.
19 Mu me bokila bayina vwandaka zola munu,
kasi bawu me manga munu.
Banganga-nzambi mpe bakuluntu ya munu
me manisa na kufwa na kati ya mbanza
na ntangu bawu vwandaka sosa kima ya kudya
samu na kukindisa banzutu ya bawu.
20 Yave, tala bampasi yina mu ke na yawu.
Nzutu ya munu nyonso ke na kutekita.
Ntima ya munu ke na kusala mpasi
samu na mutindu yina mu tumamaka ve na nge.
Na ngaanda, mbele ya muzingu me kufwa bana ya munu.
Na kati ya yinzo, ya kele lufwa.
21 Ba me kuwa mutindu mu ke na kuyawula.
Kasi ata muntu samu na kukindisa munu.
Bambeni ya munu nyonso me kuwa nsangu ya bampasi ya munu.
Bawu me kuma na kilengi,
samu ti ni nge me sala mutindu yina.
Sala ti kilumbu yina nge zonzilaka, yawu kukuma,
mpe bawu, ba kuma mutindu munu!
22 Bika ti yimbi nyonso ya bawu kutalana na meso ya nge.
Sala bawu mpe mutindu nge me sala na munu,
samu na yimbi ya munu nyonso.
Samu ti mu ke na kuyawula mingi,
mpe mu ke na kutala mpasi mingi na ntima.