1 Wapi mutindu yayi!

Mfumu na kati ya nkele ya yandi,

yandi me fuka ndumba Siyone na yisi ya matuti ya ndombe.

Yandi me bwisa na ntoto

nkembo ya Isayeli yina vwandaka na zulu.

Na kilumbu ya nkele ya yandi,

yandi me zimbana kisika ya yandi ya kutulaka makulu.

2 Mfumu me dyamisa bantoto nyonso ya Yakobi.

Yandi me bika ata fyoti ve.

Na nkele ya yandi, yandi me mwangisa bambanza ya ndumba ya Yuda

yina vwandaka na bibaka ya lukengolo.

Yandi me losa yawu na ntoto.

Yandi me safula kimfumu na bamfumu ya yawu.

3 Na nkele ya yandi ya kulutila,

yandi me mwangisa lulendo nyonso ya Isayeli.

Yandi me manga na kunwanisa mbeni

ntangu mbeni vwandaka me kwiza.

Ya kele mutindu ti yandi me namisa tiya na kati ya Yakobi,

yina ke na kuyoka na balweka nyonso.

4 Yandi me sadila munani ya yandi mutindu mbeni.

Yandi me sadila ngolo ya yandi mutindu mutantu.

Yandi me mwangisa nyonso yina vwandaka mbote na kutala.

Yandi me kulumuna nkele ya yandi mutindu tiya

na zulu ya Yinzo ya ndumba Siyone.

5 Mfumu me kuma mutindu mbeni.

Yandi me dyamisa Isayeli.

Yandi me dyamisa bayinzo ya yandi nyonso ya kitoko.

Yandi me mwangisa bambanza ya yandi nyonso yina vwandaka na bibaka ya lukengolo.

Yandi me sala ti bampasi na kuyawula kulutila mingi na sika ya ndumba ya Yuda.

6 Yandi me mwangisa lupangu ya yandi mutindu lupangu ya nsaba.

Yandi me mwangisa kisika ya yandi ya mbwabanu.

Yave me sala ti na Siyone, bantu kuzimbana bilumbu ya mikembo na ya basaba.

Na nkele ya yandi ya kulutila, yandi me safula ntinu na banganga-Nzambi.

7 Mfumu me nyafuna kiyokolo ya yandi ya minkayulu.

Yandi me losa Yinzo ya yandi ya longo.

Yandi me yekula na maboko ya bambeni, bibaka ya bayinzo ya kitoko ya Siyone.

Ba me sala makelele na kati ya Yinzo ya Yave mutindu na kilumbu ya feti.

8 Yave me baka lukanu ya kumwangisa bibaka ya ndumba Siyone.

Yandi me fungula singa ya kutezila.

Yandi me katula ve diboko ya yandi tekila yandi manisa na kumwangisa nyonso.

Yandi me kotisa kibaka ya ntete mpe kibaka ya lukengolo na kati ya kifwidi.

Nyonso me mwangana.

9 Myelo ya Siyone me kubwa na ntoto.

Yandi me katula mpe me mwangisa bikangulu ya yawu.

Ntinu na bamfumu ya yandi kele na kati-kati ya bantu ya bayinsi.

Musiku ke dyaka ve.

Mimbikudi ya yandi mpe ke na kuzwa dyaka ve ata lumoni ya Yave.

10 Bakuluntu ya ndumba Siyone me vwandaka na ntoto, ata dyambu ya kuzonza.

Bawu me tula fundu-fundu ya ntoto na bayintu ya bawu.

Bawu me lwata bangoto mutindu balele.

Bandumba ya Yelusalemi me talisa bayintu ya bawu na ntoto.

11 Meso ya munu me lemba na kudila,

misopo ya munu nyonso ke na kuningana,

ntima ya munu ke na kulenda dyaka ve,

samu na mwangusulu yayi yina me kubwa na bantu ya munu.

Bana ya fyoti na bana yina ke ntete na kunwa mabene,

bawu nyonso ke na kufwa na nsatu na babala-bala ya mbanza.

12 Bawu ke na kuyufula na bamama ya bawu:

«Wapi kisika beto ke kuzwa madya ya kudya mpe kima ya kunwa?»

Bawu ke na kubwa mutindu bantu yina me lwala na babala-bala ya mbanza.

Bawu ke na kufwa na maboko ya bamama ya bawu.

13 Yinki mu ke zabisa nge dyaka?

Ndumba Yelusalemi, na nani mu ke fwanikisa nge?

Ndumba ya kitoko Siyone, nani mu lenda tuba ti beno kele mutindu mosi samu na kukindisa nge?

Mpasi ya nge kele nene mingi mutindu mubu.

Nani ke belusa nge?

14 Mimbikudi ya nge kuzwaka kaka balumoni ya luvunu na ya buzoba samu na nge.

Bawu lakisaka ve yimbi ya nge samu na kuvutula nge na nzila ya mbote.

Balumoni yina bawu kuzwaka samu na nge,

vwandaka kaka ya luvunu mpe ya yimbi.

15 Bayina nyonso ke na kuluta na nzila,

ba ke na kubula maboko samu ti nge me mwangana.

Bawu ke na kusala muyosi mpe kuningisa bayintu na kutalaka nge, Yelusalemi ndumba ya kitoko.

«Ya tsyelika yayi ni mbanza yina

ba vwandaka bokila Mbanza ya Kitoko mpe Kyese ya ntoto nyonso?»

16 Bambeni ya nge nyonso ke na kufungula yinwa samu na kuseka nge.

Bawu ke na kusadila nge muyosi, bawu ke na kukwetila nge meno.

Bawu ke na kutuba: «Beto me dyamisa yandi.

Kilumbu yina beto vwandaka vingila ni yayi.

Kilumbu yango me kuma, beto me kuma yimeni!»

17 Yave me sala yina yandi bakaka lukanu ya kusala.

Yandi me lungisa mambu yina yandi tubaka, mambu yina yandi zengaka katuka ntama.

Yandi me mwangisa nyonso ata kutala kyadi.

Yandi me talisa nge mpasi samu na kuyangidika mbeni.

Yandi me bwela mitantu ya nge lulendo.

18 Na ntima mosi, bantu ya Yelusalemi ke na kulooka na Mfumu.

Nge kibaka ya ndumba Siyone, bika ti mansangasa ya nge kutanga mpimpa na ntangu mutindu mwila.

Beno kulemba ata fyoti ve.

Beno bika ve na kutangisa mansangasa ya beno.

19 Telama nge looka,

looka mpimpa nyonso na ngunga yina bankebi ke telamaka.

Mwangisa mutindu maza mambu nyonso yina kele na ntima ya nge na mantwala ya Mfumu.

Nanguna maboko ya nge samu na kubondila yandi,

samu na luzingu ya bana ya nge yina ke na kufwa na nsatu na bansongi nyonso ya banzila.

20 Yave, tala!

Tala na nani nge ke na kusala mambu ya mutindu yayi.

Bamama kudya bana yina bawu mosi me buta?

Bana yina bawu me zola na ntima nyonso?

Bantu kufwa banganga-Nzambi mpe mimbikudi tii na kati ya Yinzo ya longo ya Yave?

21 Banzutu ya bantwenya mpe ya biboba kele ya kuyalumuka na ntoto na babala-bala.

Matoko na bandumba ya munu me kufwa na mbele ya mvita.

Nge me kufwa bawu na kilumbu ya nkele ya nge.

Nge me zenga bawu laka ata kutadila muntu kyadi.

22 Mutindu ba ke bokilaka bantu na kilumbu ya mukembo, nge me bokila bantu yina me natina munu nsisi na balweka nyonso.

Na kilumbu ya nkele ya Yave, ata muntu vuukaka, ata muntu bikanaka moyo.

Bana yina mu zolaka na ntima nyonso, bana yina mu kulisaka, mbeni ya munu me manisa na kufwa bawu nyonso.