1 Mu kele muntu yina me tala bampasi na kikoti yina Mfumu me bula na nkele ya yandi.

2 Mfumu nataka munu.

Yandi me kotisa munu na nsemo ve,

kasi yandi me kotisa munu na kitombe.

3 Kaka ni munu yandi ke na kutatamana na kubula.

Yandi ke na kubika ve na kubula munu bilumbu nyonso.

4 Yandi me manisa munu musuni nyonso na mpusu ya nzutu.

Yandi me buka mikwa ya munu.

5 Yandi me zunga munu na kibaka mosi

mutindu kibaka ya bampasi na bankwamusu.

6 Yandi me vwandisa munu na kitombe

mutindu bantu yina kufwaka ntama.

7 Yandi me kangila munu na kati ya lupangu samu ti mu basika ve.

Yandi me tula munu bampanga ya dema.

8 Ni na mpamba mu ke na kulooka mpe kulomba lusalusu.

Yandi me kanga makutu ya yandi na lusambulu ya munu.

9 Yandi me kanga banzila ya munu na matadi ya nene.

Yandi me sala ti mu landa banzila ya yimbi.

10 Samu na munu, yandi me vwanda mutindu yingo yina me bumbimina kibulu.

Yandi me vwanda mutindu nkosi yina kele na kisika ya kubumbama.

11 Yandi me zimbisa munu nzila,

yandi me pasula-pasula munu.

Yandi me bika munu kaka munu mosi.

12 Yandi me telemisa munani ya yandi,

yandi me tula munu na mantwala ya yawu samu na kukubula munu.

13 Yandi me manisa madyonga ya nkutu ya yandi na kutobola munu luketo.

14 Bantu nyonso ke na kuseka munu.

Bilumbu nyonso, ba ke na kuyimbila munu banzimbu ya bawu samu na kuseka munu.

15 Yandi me yukutisa munu na matiti ya ndudi.

Yandi me nwikisa munu mindudi-ndudi.

16 Yandi me bukutisa munu matadi.

Yandi me vindumuna munu na kati ya fundu-fundu ya ntoto.

17 Nge me yimina munu kizunu.

Mu me zimbana yinki ba ke bokilaka buyenge.

18 Mu me tuba ti ya munu yimeni.

Mu ke dyaka ve na kima ya kuvingila na sika ya Yave.

19 Bambuka moyo na nsoni yayi mu ke na kutala na kwendaka yima.

Bambuka moyo na bampasi mpe luzingu yayi ya ndudi.

20 Bantangu nyonso, mu ke na kubambuka moyo na mambu yina.

Ya ke na kukwamisa munu.

21 Kasi dyambu yina mu ke na kutula na ntima,

dyambu yina ke na kupesa munu kivuvu ni yayi:

22 Bumbote ya Yave, me manisa ve,

luzolo ya yandi me suka ve.

23 Yawu ke vutukilaka konso suka.

Kukwikama ya nge kele nene!

24 Mu ke na kutuba: Yave kele kikunku ya munu.

Ni yawu yina mu ke na kusadila yandi kivuvu.

25 Yave kele mbote samu na muntu yina ke na kutula kivuvu na yandi.

Yave kele mbote samu na muntu yina ke na kusosa yandi.

26 Ya kele mbote mingi na kuvingila mpulusu ya Yave na kati ya kudingama.

27 Ya kele mbote na muntu na kundima na kunata kizitu na buntwenya ya yandi.

28 Yandi fwana kuvwanda kisika ya yandi mosi mpe kudingama, samu ti ni yawu Yave me kwika yandi.

29 Yandi fwana kutula yinwa ya yandi na kati ya fundu-fundu ya ntoto.

Kuzaba ve kana kivuvu lenda vwanda dyaka!

30 Yandi fwana kupesa dibundi ya yandi na muntu yina me bula yandi mbata.

Yandi fwana kuyukuta bifingu.

31 Samu ti Mfumu ke losaka ve muntu ya mankululu.

32 Ata ti yandi talisa mpasi,

yandi ke talaka kyadi.

Samu ti bumbote ya yandi kele ya nene mingi.

33 Mfumu ke yangalalaka ve na kukulula bantu,

yandi ke yangalalaka ve na kutalisa bantu mpasi.

34 Ntangu ba ke nyokolaka bankole nyonso yina kele na boloko na kati ya yinsi,

35 ntangu ba ke safulaka luve ya muntu na meso ya Nzambi ya Kulutila Kuzangama,

36 ntangu ba ke tengimisaka balufundusu, Mfumu ke talaka yawu ve?

37 Nani yina kele ti, kana yandi me tuba dyambu, dyambu yina mpe me salama?

Ni Mfumu ve muntu ke tumisaka?

38 Ya kele ve ni na yinwa ya Nzambi ya Kulutila Kuzangama ke basikilaka mambu ya mpasi mpe mambu ya kyese?

39 Samu na yinki muntu ke yawulaka kana yandi kele moyo?

Bika ti konso muntu kuyawula samu na masumu ya yandi mosi!

40 Beto taleno banzila ya beto mpe beto fyongonina yawu.

Mpe beto vutukeno na Yave.

41 Beto sambileno na bantima ya beto nyonso na kuzangula maboko ya beto na Nzambi yina kele na zulu.

42 Beto, beto me sala yintu ngolo, beto me manga na kutumama.

Nge, nge me lemvokila beto ve.

43 Nge me fukila nkele ya nge, nge me landa beto.

Nge me kufwa beto ata kutala beto kyadi.

44 Nge me fukila dituti samu ti lusambulu ya beto kukuma ve na sika ya nge.

45 Nge me kitula beto dizala,

kima ya busoto na kati-kati ya bantu ya bayinsi ya nkaka.

46 Bambeni nyonso ya beto ke na kusalaka beto yinwa samu na kusombola beto.

47 Boma, kizungu-zungu, mwangusulu, mpe lufwa kele samu na beto.

48 Meso ya munu ke na bulumuna bamwila ya mansangasa,

samu na mwangusulu yayi yina me bwidila bantu ya munu.

49 Meso ya munu ke na kubasisa mansangasa.

Yawu ke na kubika ve na kubasisa mansangasa.

Yawu ke na kulemba ve na kubasisa yawu,

50 tii ntangu yina Yave ke balula meso ya yandi na kutala beto katuka kuna na dizulu.

51 Meso ya munu ke na kutalisa munu mpasi samu na mambu yayi me bwidila bandumba ya mbanza ya munu.

52 Ba ke na kulanda-landa munu mutindu ndeke,

bambeni yina ke na kuyina munu ya mpamba.

53 Bawu me kotisa munu na kati ya dibulu ya maza samu na kudingimisa munu.

Mpe bawu me tula ditadi na zulu ya munu.

54 Maza me luta ndilu ya yintu ya munu.

Mu me tuba ti ya munu yimeni.

55 Mu me tanguna nkumbu ya nge Yave kuna na yisi ya dibulu ya maza.

56 Nge me kuwa ndinga ya munu.

Kukanga ve makutu ya nge na kuyawula ya munu.

Kukanga ve makutu ya nge yayi mu ke na kulomba lusalusu.

57 Na ntangu yina mu bokilaka nge, nge belamaka,

nge tubaka na munu: «Kutala boma ve.»

58 Mfumu, nge me nwanina munu.

Nge me kuula luzingu ya munu.

59 Yave, nge me tala yimbi yina ba me sala munu.

Sadila munu bunzonzi!

60 Nge me tala wapi mutindu ba me vutula munu yimbi.

Nge me tala yimbi yina ba me kanisa na kusala munu.

61 Yave, nge me kuwa bifingu ya bawu.

Nge me tala yimbi yina ba me kanisa na kusala munu.

62 Nge me kuwa mambu yina ke na kuzonza bayina me tedimina munu.

Bawu ke na kusadila munu bamfundu bilumbu nyonso.

63 Ba vwanda ya kuvwanda, ba vwanda ya kutelama,

tala nge mosi: Nzimbu ya bawu ni munu.

64 Yave, nge ke futisa bawu yimbi ya bawu.

Nge ke vutula bawu mutindu kele mavanga ya bawu.

65 Nge ke sala ti bawu kukuma bantu ya bantima ya ngolo.

Nsingulu ya nge ke vwanda na bawu.

66 Nge ke landa bawu na nkele ya nge.

Mpe nge ke manisa na kuzimbisa bawu na ntoto ya nge Yave.