4
Bampasi ya Siyone
1 Wapi mutindu yayi!
Wolo me beba!
Wolo ya mbote ke dyaka ve kitoko!
Matadi ya longo me mwangana bisika nyonso na babala-bala!
2 Wapi mutindu yayi!
Bana ya mfunu ya Siyone,
bayina vwandaka mutindu wolo ya ntalu,
ba ke na kubakila bawu mutindu bambungu ya ntoto, yina kisadi-bambinda me yidika!
3 Bambulu ke pesaka bana ya bawu mabene.
Bawu ke dikilaka bana ya bawu.
Kasi bandumba ya bantu ya munu me kuma na ntima ya yimbi,
mutindu bandeke ya kuzangama ya yinsi ya kuyuma.
4 Balaka ya bana ya fyoti me yuma samu na nsatu ya maza.
Bana ke na kulomba kima ya kudya,
kasi ata muntu ke na kupesa bawu yawu.
5 Bayina vwandaka me mesana na kudyaka madya ya mbote, bawu ke na kwendaka kubwa na banzila samu na nsatu.
Bayina ba kulisaka na luzingu ya mbote, ke na kwendaka sosa madya na mboloso.
6 Yimbi ya bandumba ya bantu ya munu me lutila yimbi ya Sodome.
Mbanza yina mwanganaka kaka yawu mosi.
Ata muntu ve mwangisaka yawu.
7 Bana ya bantinu*Na babibila ya nkaka ba sonikaka ba-Nazile. lutilaka kulezima na neze.
Bawu vwandaka mpembe kulutila miliki.
Banzutu ya bawu lutilaka kitoko na matadi ya ntalu yina ba ke bokilaka kolaye.
Bizizi ya bawu vwandaka mutindu matadi ya Safile.
8 Kasi na ntangu yayi, bizizi ya bawu me kuma ndombe kulutila makala.
Ba ke na kuzaba dyaka bawu ve na banzila.
Bampusu ya banzutu ya bawu me vukana na mikwa.
Yawu me yuma mutindu bankuni.
9 Bayina me kufwa na mbele ya muzingu me lutila mbote na bayina ke na kufwa na nsatu.
Bawu ke na kufwa na kukonda samu ti madya ya bilanga ke dyaka ve.
10 Bamama, ata ti ba vwandaka na luzolo ya bana ya bawu,
kaka ni bawu mosi dyaka me banda na kulamba bana ya bawu samu na kudya bawu,
na ntangu ya mpasi yayi yina me kumina bandumba ya bantu ya munu.
11 Yave me sadila nkele ya yandi nyonso.
Yave me dukula nkele ya yandi ya kulutila.
Yandi me namisa tiya na Siyone.
Yandi me yoka balufulu ya yawu.
12 Ya vwanda bantinu ya ntoto, ya vwanda bantu ya yinza, ata muntu ndimaka ti
mutantu to mbeni lendaka kota na myelo ya Yelusalemi.
13 Mambu yayi me kubwa samu na masumu ya mimbikudi ya yandi.
Ya me kubwa samu na yimbi yina salaka banganga-Nzambi
na kumwangisa menga ya bantu ya kudedama na mbanza.
14 Bawu ke na kwendaka yima na babala-bala mutindu bampofo.
Bawu ke ya kuvedila ve samu na menga.
Ba fwana kusimba ve binkuti ya bawu.
15 «Beno katuka! Beno kele ya kuvedila veKnz 13.45!» Ni mutindu yina bantu ke na kulooka samu na bawu.
«Beno katuka! Beno katuka! Beno kusimba beto ve!»
Yina ba ke na kwendaka kima, na kwendaka tambula kidi-kidi na bayinsi ya nkaka,
bantu ya bayinsi yina ke na kutuba:
«Bawu yayi lenda vwanda ve na sika ya beto!»
16 Yave yandi mosi me sala ti bawu kumwangana bisika nyonso.
Yandi zola kutala dyaka bawu ve.
Ba me zitisa ve banganga-Nzambi.
Ba me pesa ve biboba buzitu.
17 Meso ya beto vwandaka tatamana na kulemba.
Meso ya beto vwandaka tatamana na kulemba na kuvingila lusalusu yina vwandaka kwiza ve.
Beto vingilaka ata kulemba mutindu bankebi, nkwizulu ya bantu ya yinsi yina lendaka kwiza vuukisa beto.
18 Ba ke na kulandaka makulu ya beto.
Beto ke na kulenda ve na kukwenda na bisika ya beto.
Beto salaka ntangu ya beto.
Nsukunu ya beto me kuma pene-pene.
Nsukunu ya beto yawu yayi.
19 Bayina ke na kulandaka beto, me lutila mbangu na bambemba ya mazulu.
Bawu ke na kulandaka beto tii na zulu ya myongo.
Bawu ke na kutadikilaka beto na bisika yina bantu ke zingaka ve.
20 Muntu yina vwandaka luzingu ya beto,
muntu yina Yave byekaka, ba bwilaka mpe kotisaka yandi na dibulu.
Ni yandi beto vwandaka tuba ti:
«Ntangu kinsinsya ya yandi ke fukaka beto, beto ke lendaka na kuzinga na bantu ya bayinsi.»
21 Bantu ya Edome, beno yangalala,
beno vwanda na kyese beno bayina ke zingaka na Wuse!
Kasi kilumbu kele yina beno ke kunwa kopo ya kitumbu,
beno ke kola yawu mpe beno ke katula bilele!
22 Nge ndumba Siyone kento ya kitoko,
kitumbu ya nge me manisa.
Ba ke nata dyaka nge ve na yinsi ya nzenza.
Kasi nge ndumba ya Edome,
Mfumu ke futisa nge yimbi ya nge
yandi ke lakisa masumu ya nge na sika ya bantu nyonso.