Dibuku ya
MIKA
NKOTOLO
Mumbikudi Mika vwandaka muntu ya bwala Molesete, na yinsi ya Yuda. Yandi salaka kisalu ya yandi ya mumbikudi ntangu mosi na mimbikudi Esaya mpe Oseya, na bamvula 740-700, tekila mbutukulu ya Yesu-Klisto. Bambikululu ya yandi vwandaka tadila bambanza zole ya bimfumu: Samaliya mbanza-kimfumu ya Isayeli kuna na yinsi ya kimfumu ya node, mpe Yelusalemi mbanza-kimfumu ya Yuda kuna na yinsi ya kimfumu ya sude.
Mika zonzilaka mpe lakisaka mavanga ya yimbi ya bantwadisi, ya banganga-Nzambi, ya bamfumu ya bambanza mpe ya bamvwama. Yandi zonzilaka mpe mambu yina me tadila mimbikudi ya luvunu yina vwandaka syamisa bantu na kutuba ti mambu nyonso kele mbote. Bantu ya Asili mwangisaka mbanza Samaliya na ntangu ya Mika (722 tekila mbutukulu ya Yesu-Klisto).
Kasi mbikululu ya Mika vwandaka pesa kivuvu mpe yawu vwandaka kindisa bantu. Yandi vwandaka tuba ti bayinsi nyonso ke ndima ti Yave kele Nzambi, (Mka 4.1-4). Nzambi ke fidisa muntu mosi ya dikanda ya Davidi, samu na kuyala, mpe yawu ke vwanda ntangu ya kizunu, (Mka 5.1-4). Mika bakulaka masumu ya bantu ya yandi, kasi yandi vwandaka na lukwikulu mingi na Yave. Na yina, dibuku yayi ke na kuzabisa na muntu mambu yina Nzambi ke na kulomba na yandi na kusala, (Mka 6.8).
Dibuku yayi kele ya kukabuka mutindu yayi:
- Yave ke fundisa bantu ya yandi (Mka 1–3).
- Yave ke yala na Siyone mpe ke kuula bantu ya yandi (Mka 4–5).
- Yave ke fundisa Isayeli mpe ke pesa yandi bansilulu (Mka 6–7).
1
1 Yayi ni mambu ya Yave, yina yandi zabisaka na Mika, muntu ya bwala Molesete, na ntangu yina Yotame, Akaze mpe Ezekyase, vwandaka bantinu yina landasanaka na yinsi ya Yuda. Yayi ni mambu yina Mika talaka na lumoni, samu na bambanza Samaliya mpe Yelusalemi.
Yave ke na kufunda bantu ya yandi
2 Beno bantu nyonso, beno kuwa, beno fungula makutu.
Beno bantu nyonso ya ntoto na bima nyonso yina kele na ntoto.
Bika ti Yave, Mfumu, kutuba kimbangi na yimbi ya beno katuka yinzo ya yandi ya longo.
3 Yave ke na kubasika na kisika yina yandi ke zingaka.
Yandi ke na kukulumuka.
Yandi ke na kutambula na zulu ya myongo yina kele na ntoto.
4 Bisika yina yandi ke na kudyata,
myongo ke na kubulumuka.
Midimba ke na kufunguka
mutindu mafuta ya nyosi ke sulumukaka na tiya
mpe mutindu maza ke kulumukaka mongo.
5 Nyonso yayi samu na yimbi ya Yakobi,
samu na masumu ya bantu ya Isayeli.
Nani me sala ti Yakobi kusala yimbi yina?
Yawu kele ve ni Samaliya?
Nani ke nataka Yuda na kuvwanda na bisika ya lusambulu yina kele na zulu ya myongo?
Yawu kele ve ni Yelusalemi?
6 «Mu ke sala ti Samaliya kukuma kikunku ya matadi na kati ya bilanga,
kisika yina ba ke banda na kusalaka bilanga ya bayinti ya vinu.
Mu ke nengumuna matadi ya mbanza yina na mudimba.
Mu ke sala ti lufulu ya yawu kutalana.
7 Biteki ya bawu nyonso ke mwangana.
Difuta nyonso yina bawu kuzwaka, ba ke losa yawu na tiya.
Mu ke mwangisa banzambi ya bawu nyonso ya biteki
yina bawu kuzwaka na difuta ya kindumba ya bawu.
Bawu mosi ke kuma difuta ya kindumba.»
Mpasi me kumina bantu ya Yelusalemi
8 Ni yawu yina, mu ke wakisa manyongo ya munu.
Mu ke yawula, mu ke tambula makulu-ngulu, kondwa binkuti na nzutu.
Mu ke wakisa manyongo ya munu mutindu mbulu.
Mu ke yawula mutindu kimfutu.
9 Bampasi ya Samaliya ke manisa ve.
Yawu me kuma tii na Yuda.
Yawu me kuma tii na mwelo ya Yelusalemi, mbanza ya bantu ya munu.
10 Beno mwangisa ve nsangu yayi na mbanza Ngate.
Beno dila ve.
Na mbanza Bete-Leyafela, beno kota bufwidi, beno vindumuka na ntoto.
11 Beno bantu yina ke zingaka na Safile,
beno kwenda ya beno.
Beno kwenda kimpene na nsoni nyonso.
Bantu ya Sanane ke meka ve na kubasika na mbanza ya bawu.
Bantu ya Bete-Ayesele bawu mosi kele na kati ya manyongo.
Beno lenda kuzwa dyaka ve lusalusu ya bawu.
12 Bantu yina ke zingaka na Malote ke na kutekita samu na kyese ya bawu.
Ya tsyelika, mpasi yina Yave me fidisa me kuma tii na mwelo ya Yelusalemi.
13 Beno bantu yina ke zingaka na Lakise,
beno kanga bampunda ya beno na bapusu-pusu.
Ni beno me kotisa ndumba ya Siyone na masumu.
Samu ti yimbi ya Isayeli me talana na sika ya nge.
14 Ni yawu yina beno fwana kukabuka na bantu ya Molesete-Ngate.
Mbanza Akezibe ke pesa kivuvu ya mpamba na bantinu ya Isayeli.
15 Beno bantu ya Malesa, mu ke fidisa beno muntu ya nkaka yina ke kwiza yala beno.
Bantinu ya nkembo ya Isayeli ke kima tii na ntadi ya Adulame.
16 Beno bantu ya Yelusalemi, beno zenga bansuki.
Beno katula bansuki ya beno,
samu na bana ya beno yina beno ke zolaka mingi.
Beno vwanda na makungulu.
Samu ti ba ke nata bawu na bunkole na yinsi ya nzenza, ntama na beno.