1 Kyadi na bayina ke na mabanza ya kusala yimbi,

mpe ke na kubanza na kusala yimbi na ntangu bawu ke ntete na mfulu.

Na suka-suka bawu ke na kusala yimbi yango ntangu bawu kele na lutumu.

2 Bawu ke zininaka bilanga ya ngana,

mpe ke bakaka yawu na ngolo.

Bawu ke zininaka bayinzo ya ngana, mpe bawu ke botolaka yawu.

Bawu ke nyokolaka mfumu ya yinzo na dikanda ya yandi nyonso.

Bawu ke bwilaka bantu na bamvwilu ya bawu.

3 Ni yawu yina, Yave ke na kutuba:

«Mu me kubika mambu ya kyadi samu na bantu yayi.

Beno ke vuuka ata fyoti ve.

Beno ke tambula dyaka ve na lunangu samu ti ntangu yayi kele ntangu ya kyadi.»

4 Na ntangu yina, ba ke sadila beno nzimbu, ba ke yimbidila beno nzimbu ya manyongo mutindu yayi:

«Ba me baka beto bima nyonso.

Bantu ya beto ke dyaka ve na bantoto.

Samu na yinki ba me botola beto yawu!

Ba me kabula bilanga ya beto na sika ya bayina tekaka Nzambi manima.»

5 Ni yawu yina, ya ke vwanda ve na muntu

na kati ya bantu ya Yave samu na kutezila beno kitini ya ntoto.

6 Bawu ke na kuzonza kidi-kidi mutindu yayi:

«Bika na kuzonza kidi-kidi.

Ba bika banzonzolo yina ya kidi-kidi!

Bifingu ke na kumanisa ve.

7 Beno bantu ya Yakobi, ni beno ke na kutuba mutindu yina?

Yave kele na mvibudulu ve?

Ni mutindu yina yandi ke salaka?

Mambu ya munu Yave kele ve ya mbote samu na bayina kele ya kusungama?»

8 Na bilumbu yina lutaka, beno vwandaka bambeni ya bantu ya munu.

Beno vwandaka botola biyunga yina vwandaka na zulu ya binkuti ya bantu

yina vwandaka katuka na mvita

mpe vwandaka luta na kizunu.

9 Beno ke na kubingisa bakento ya bantu ya munu na bayinzo ya bawu ya kitoko.

Beno ke na kukatula na bana ya bawu

kyese ya kuvwanda mvwilu ya munu bantangu nyonso.

10 Beno telama, beno kwenda,

ntoto yayi kele ve kisika ya kupema,

samu ti yawu kele ve ya kuvedila,

yawu ke natina beno bampasi,

bampasi ya kulutila.

11 Kana muntu kwiza na nswalu na sika ya beno mpe ke zabisa beno mambu ya luvunu mutindu yayi:

«Samu na beno, mu ke na kuzabisa ti beno ke kuzwa vinu mpe malafu!»

Ni muntu ya banzonzolo ya kidi-kidi ya mutindu yina me fwanana na bantu yayi.

12 «Ya tsyelika, beno bantu ya Yakobi, mu ke vukisa beno nyonso kisika mosi.

Beno bantu ya Isayeli, bayina ke bikana ya moyo, mu ke vukisa beno kisika mosi.

Mu ke tula beno kisika mosi mutindu mameme na kati ya mpaka.

Mutindu bibulu na kati ya mpaka ya bawu.

Ya ke vwanda na makelele ya bantu mingi.

13 Muntu yina ke fungula nzila,

ni yandi ke vwanda na mantwala ya bawu.

Bawu ke sadila ngolo na kufungula nzila,

bawu ke luta na mwelo mpe bawu ke basika.

Ntinu ya bawu ke luta na mantwala ya bawu.

Yave ke tekila na mantwala ya bawu.»