3
Mumbikudi Mika ke na kukebisa bantwadisi
1 Mu ke na kutuba: «Beno bamfumu ya Yakobi.
Beno kuwa, beno bantwadisi ya Isayeli.
Ni beno ve me lunga na kuzaba ludedomo kele yinki?
2 Beno ke yinaka mambu ya mbote
mpe beno ke zolaka mambu ya yimbi.
Beno ke katulaka mpusu ya nzutu ya bantu ya munu
mpe beno ke katulaka musuni yina ke fukaka mikwa ya bawu.»
3 Bawu ke na kudya musuni ya bantu ya munu.
Bawu ke na kukatula mpusu ya bawu.
Bawu ke na kubuka mikwa ya bawu.
Bawu ke na kuzenga yawu fyoti-fyoti
mutindu mbisi yina ba ke na kulamba,
mutindu mbisi na kati ya nzungu.
4 Ni yawu yina, na ntangu bawu ke looka na Yave,
yandi ke vutula bawu ata mvutu.
Yandi ke pesa bawu mukongo na ntangu yina
samu na yimbi yina bawu salaka.
Nkebosolo na mimbikudi ya luvunu
5 Na yina me tadila mimbikudi ya luvunu, yina ke na kuzimbisa bantu ya munu,
Yave ke na kutuba:
«Kana muntu pesa bawu kima ya kudya,
bawu ke samuna mambu ya kizunu.
Kasi, kana muntu pesa bawu ve kima ya kudya,
bawu ke kubika nkonga ya binwani samu na kunwanisa muntu yina.
6 Samu na yawu, beno ke na kuzwa dyaka ve balumoni na mpimpa.
Beno ke vwanda na kati ya kitombe.
Beno ke tala dyaka ve mambu.
Ntangu ke zimbana samu na beno.
Mpimpa ke bwidila mimbikudi yina na ntangu.»
7 Na yina, bayina ke kuzwaka balumoni ke kuma nsoni-nsoni
Bayina ke talaka mambu ke kufwa nsoni.
Bawu nyonso ke bumba bizizi ya bawu samu na nsoni.
Samu ti Nzambi ke pesa dyaka bawu ve bamvutu.
8 Kasi munu, samu na mpeve ya Yave,
mu kele ya kufuluka na ngolo.
Mu ke na ludedomo.
Mu ke na kibakala samu na kuzabisa na Yakobi yimbi ya yandi
mpe na Isayeli disumu ya yandi.
Mika ke na kusamuna mwangusulu ya Yelusalemi
9 Beno kuwa, beno bamfumu ya Yakobi,
beno bantwadisi ya Isayeli,
bayina ke na kuyina mingi ludedomo
mpe ke na kusadila ve mambu ya kusungama, beno kuwa mambu yayi:
10 Beno ke na kutunga Siyone na menga.
Beno ke na kutunga Yelusalemi na kati ya kondwa ludedomo.
11 Bazuzi ya yandi ke na kulomba madeso ya bana samu na kufundisa.
Banganga-Nzambi ya yandi ke na kulomba difuta samu na kupesa bandongosolo.
Mimbikudi ya yandi ke na kubikula samu na mbongo,
mpe bawu ke na kutula Nkumbu ya Yave na mantwala.
Bawu ke na kutuba: «Ve, ata dyambu ya yimbi lenda kukumina beno,
samu ti Yave kele na kati-kati ya beto.»
12 Ni yawu yina, samu na beno,
Siyone ke kuma mutindu bilanga yina ba me saba.
Yelusalemi ke kuma kikunku ya matadi
mpe mongo ya Yinzo ya Nzambi ke kuma matiti na matiti.