4
Yelusalemi, mbanza-kimfumu ya kizunu
1 «Na bilumbu yina ke kwiza,
mongo, kisika yina kele Yinzo ya Yave,
ke lutila myongo nyonso.
Yawu ke lutila myongo ya fyoti, mpe bantu nyonso ke kwiza fuluka kuna.
2 Bantu ya bayinsi mingi ke kwenda kuna mpe ke tuba bawu na bawu:
“Beno kwiza, beto kwendeno na mongo ya Yave, kisika kele Yinzo ya Nzambi ya Yakobi.
Yandi ke longisa beto luzolo ya yandi mpe beto ke sadila yawu.”
Samu ti Musiku ke katuka na Siyone
mpe mambu ya Yave ke katuka na Yelusalemi.
3 Yandi ke vwanda zuzi na kati-kati ya bantu ya bayinsi mingi.
Yandi ke baka nzengolo samu na bantu ya bayinsi yina ke na lulendo mpe yina kele ntama.
Ba ke baka bambele ya bawu ya mvita samu na kuyidikila yawu bansengo
Ba ke baka madyonga ya bawu samu na kuyidikila yawu minkwati.
Ata yinsi mosi ke nwanisa dyaka yinsi ya nkaka.
Bantu ke longoka dyaka ve na kunwana bamvita.
4 Konso muntu ke kwenda vwanda na yisi ya yinti ya yandi ya vinu
mpe na yisi ya yinti ya yandi ya fike,
ata muntu ke talisa yandi boma.»
Ni yandi mosi Yave, Nzambi ya Binwani, me tuba yawu.
5 Na yina me tadila bantu nyonso ya bayinsi ya nkaka,
konso muntu ke tumamaka na banzambi ya yandi.
Kasi beto, konso ntangu, beto ke tumamaka na Nkumbu ya Yave, Nzambi ya beto, bantangu nyonso.
Yave ke yala na Yelusalemi
6 Yave ke na kutuba: «Na kilumbu yina,
mu ke yamba bayina ke na bifuma.
Mu ke vukisa bayina ba bingisaka, bayina mu talisaka mpasi.
7 Mu ke sala ti bayina ke na bifuma, bawu kuvwanda bayina ke bikana moyo.
Mu ke sala ti bayina ba tulaka na lweka, bawu kukuma bantu ya ngolo.
Yave ke yala bawu kuna na mongo ya Siyone,
kubanda ntangu yayi tii bantangu nyonso.
8 Nge, mwa yinzo ya kibandu ya bankebi ya bibulu,
mongo ya fyoti yina kele na sika ya ndumba ya Siyone,
nge ke kuzwa dyaka lutumu yina vwandaka na nge na ntama.
Ndumba ya Yelusalemi ke kuma dyaka mbanza ya kintinu.»
Mpasi mpe kuvuuka ya Yelusalemi
9 Na ntangu yayi, samu na yinki nge ke na kulooka?
Na sika ya nge, ntinu kele ve?
Mupesi-malongi ya nge kele dyaka ve
samu ti nge tala mpasi mutindu kento yina ke na kubuta?
10 Nge, ndumba ya Siyone,
tala mpasi mpe yawula mutindu kento yina ke na kubuta
samu ti na ntangu yayi, nge ke basika na mbanza
mpe nge ke kwenda zinga na bilanga.
Nge ke kwenda tii na Babilone,
mpe kuna, ba ke kuula nge.
Ni kuna, Yave ke katula nge na maboko ya bambeni ya nge.
11 Na ntangu yayi, bayinsi mingi me vukana samu na kunwanisa nge.
Bawu ke na kutuba:
«Bika ti ba sumuna mbanza ya bawu.
Bika ti meso ya beto kutala kumwangana ya Siyone!»
12 Bantu yayi zaba ve mabanza ya Yave.
Bawu me bakula ntete ve mayindu ya yandi.
Yandi me vukisa bawu
mutindu ba ke yonzikaka matiti
na kisika yina ba ke kabulaka matiti na bambuma ya yawu.
13 «Nge ndumba ya Siyone, telama mpe dyatikisa!
Mu ke sala ti nge vwanda na ngolo
mutindu ngombe yina kele na mampoka ya bisengo
mpe yina kele na makulu ya kisengo ya mbwaki.
Nge ke nika bantu ya makanda mingi.
Bima nyonso ya bawu yina nge ke botola ke kuma ya Yave.
Bimvwama nyonso ya bawu ke vwanda ya Mfumu ya ntoto nyonso.»
14 Na ntangu yayi, ndumba ya bankonga ya binwani,
sala bansamba na nzutu ya nge!
Bambeni me zunga beto.
Ba ke na kubula yinti na dibundi ya zuzi ya Isayeli*Na babibila ya nkaka, 4.14 kele ni 5.1 mpe 5.1-14 kele ni 5.2-15..