5
Betelemi, mbanza ya ntinu Muvuukisi
1 «Nge, Betelemi Efalata,
nge kele kizunga yina me lutila fyoti na kati ya bizunga ya Yuda.
Na nge ke basika, samu na munu, mfumu yina ke yala IsayeliMat 2.6.
Yandi kele katuka bantangu ya kulutila ntama.»
2 «Ni yawu yina, Nzambi ke yekula bawu
tii na ntangu yina kento yina ke buta fwana kubuta.
Bampangi ya yandi yina ke bikana moyo ke vutuka na sika ya bantu ya Isayeli.»
3 «Yandi ke telama mpe ke twadisa bawu na ngolo ya Yave,
na bunene ya Nkumbu ya Yave, Nzambi ya yandi.
Bantu ya yandi ke zinga mbote.
Bunene ya yandi ke vwanda tii na bandilu ya ntoto.»
4 «Ni yandi ke natina beto kizunu.»
«Ntangu bantu ya Asili ke kwiza na yinsi ya beto,
mpe ke kota na bayinzo ya beto yina kele na bibaka ya lukengolo,
beto ke fidisa bantwadisi nsambwadi mpe bamfumu nana,
samu na kunwanisa bawu.»
5 «Na bambele ya mvita, bawu ke tula na yisi ya luyalu ya bawu yinsi ya Asili.
Na binwanunu ya bawu, ba ke tula na yisi ya luyalu ya bawu Nemelode, yinsi ya Asili.»
«Mpe mfumu yina ke kuula beto na maboko ya bantu ya Asili,
ntangu yandi ke kwiza na yinsi ya beto
mpe ke kota na kizunga ya beto.»
Bantu ya Isayeli bayina ke bikana moyo
6 Bantu ya Yakobi yina ke bikana moyo, ke vwanda mutindu kinoko yina me katuka na Yave,
na kati-kati ya bantu mingi ya bayinsi ya nkaka.
Bawu ke vwanda mutindu mabete ya mvula na zulu ya matiti.
Bawu ke sosaka ve ti muntu kusadisa bawu.
Bawu ke vingilaka ve ti bantu kupesa bawu kima.
7 Na kati-kati ya bayinsi,
na kati-kati ya bantu mingi ya bayinsi ya nkaka,
bantu ya Yakobi, yina ke bikana moyo, ke vwanda mutindu nkosi na kati-kati ya bibulu ya mfinda.
Bawu ke vwanda mutindu mwana ya nkosi na kati-kati ya bana ya mameme.
Bisika nyonso yandi ke luta,
yandi ke dyata mpe ke pasula kibulu
mpe ata muntu ke katula yandi yawu.
8 «Nwanisa mitantu ya nge
mpe kufwa bambeni ya nge nyonso!»
Yave ke katula bantu ya luvunu na kati ya bantu ya yandi
9 Yave ke na kutuba:
«Na kilumbu yina, mu ke kufwa bampunda ya beno
mpe mu ke zimbisa bapusu-pusu ya beno ya mvita.
10 Mu ke mwangisa bambanza ya yinsi ya beno.
Mu ke mwangisa bisika ya beno ya kutungama na bibaka ya lukengolo.
11 Mu ke zimbisa bampandu na kati-kati ya beno.
Beno ke vwanda dyaka ve na bantu yina ke talaka mambu.
12 Mu ke katula banzambi ya beno ya biteki.
Mu ke katula matadi yina beno telemisaka mutindu bidimbu.
Beno ke fukimina dyaka ve bima yina beno yidikaka beno mosi.
13 Mu ke zenga makunzi ya beno ya nzambi Asela.
Mu ke mwangisa bambanza ya beno.
14 Na nkele ya munu ya kulutila,
mu ke vutula yimbi na bantu yina me manga na kutumama na munu.»