6
Yave ke na kufundisa bantu ya yandi
1 Beno kuwa mambu yina Yave ke na kutuba:
«Telama, funda munu na mantwala ya myongo,
mpe bika ti myongo ya fyoti kuwa nge.
2 Myongo, beno kuwa mutindu Yave ke na kufunda.
Balufulu ya ngolo ya ntoto, beno kuwa!
Yave ke na kufunda bantu ya yandi,
yandi ke na mambu na bantu ya Isayeli.»
3 «Beno bantu ya munu, yinki mu me sala beno?
Na wapi mambu mu me lembisa beno?
Beno pesa munu mvutu!
4 Mu basisaka beno na yinsi ya Ngipiti,
mu kuulaka beno na bundongo.
Mu fidisaka na mantwala ya beno Moyize, Aloni mpe Miliyame.
5 Beno bantu ya munu, beno bambuka moyo na mambu ya yimbi yina Balake, ntinu ya Mowabe,
zolaka sala beno mpe mambu yina Balame, mwana ya Bewole, zabisaka yandi.
Katuka na Sitime tii na Ngilengale,
beno talaka nyonso yina mu salaka samu na ludedomo ya munu Yave.»
Ndombolo ya Yave na sika ya bantu
6 «Yinki mu ke nata na ntwala ya Yave?
Yinki mu ke nata samu na kwenda fukama na ntadisi ya Nzambi ya mazulu?
Mu ke kwenda pesa yandi minkayulu ya kuyoka ya bana ya bangombe ya mvula mosi?
7 Yave ke ndima ti mu natina yandi mafunda ya mameme ya bakala?
Mu natina yandi mafunda ya mizumba ya mafuta?
Mu pesa yandi mwana ya munu ya ntete ya bakala mutindu munkayulu samu na yimbi ya munu?
Mu pesa yandi mwana ya munu samu na masumu ya munu mosi?»
8 Nge muntu, ba me zabisa nge mambu yina kele mbote. Mambu yina Yave ke na kulomba na nge ni yayi:
«Sadila mambu ya kusungama, vwanda na luzolo ya kukwikama.
Tambula na Nzambi ya nge na kukuluka nyonso.»
Yave ke pesa kitumbu na bantu ya muyibi mpe ya luvunu
9 Yave ke na kuzonza na bantu ya mbanza,
mpe yandi ke vuukisa bayina ke zitisa nkumbu ya yandi.
Yandi ke na kutuba: «Beno kuwa, beno bantu ya kifumba ya Yuda,
beno nyonso bayina me yonzama na mbanza!
10 Mu ke ndima ti bantu ya yimbi kukutikisa bimvwama ya kulaba na bayinzo ya bawu?
Mu ke ndima ti bawu sadila EfaKbk 16.36 ya luvunu yina ke na kusombola munu?
11 Mu nungisa bayina ke na kusadila bipezolo ya luvunu?
Mu nungisa bayina kele na bitezolo ya luvunu ya bakilo?
12 Bamvwama ya mbanza ke sadilaka yimbi samu na kuvwama,
bantu ya mbanza yango ke vunaka bantu
mpe bawu me fuluka na luvunu.
13 Na yina, mu me banda na kufidisa beno bampasi,
mu ke mwangisa beno samu na masumu ya beno.
14 Beno ke kudya kasi beno ke yukuta ve,
beno ke vwanda kaka na nsatu.
Nyonso yina beno ke bumba beno ke sadila yawu ve.
Mpe kana beno me bumba, mu ke mwangisa yawu na muzingu.
15 Beno ke mwanga bambuma,
kasi beno ke yonzika yawu ve.
Beno ke kamuna bambuma ya olive,
kasi beno ke sadila ve mafuta ya yawu.
Beno ke kamuna bambuma ya vinu,
kasi beno ke kunwa ve vinu ya yawu.
16 Beno ke na kulanda mavanga ya yimbi ya ntinu Omeli
mpe mavanga nyonso ya dikanda ya ntinu Akabe1Bt 16.23-28; 18.16-40.
Beno ke na kulanda mutindu ya bawu ya kusadila.
Na yina, mu ke mwangisa mbanza ya beno
mpe bantu ya nkaka ke seka beno.
Mpe beno ke vwanda na nsoni yina me kumina bantu ya munu.»