ba ke yimbilaka yawu na matuutu.

Mukunga ya Davidi.

2 Yave, fungula makutu na kuwa mambu ya munu,

kuwa mbote kuyawula ya munu!

3 Ntinu ya munu, Nzambi ya munu,

kuwa mbote mbokolo ya munu.

Ni nge mu ke na kusambila.

4 Yave, na suka, nge ke kuwaka ndinga ya munu.

Na suka, mu ke kubamaka samu ti nge yamba munu,

mpe mu ke vingilaka.

5 Ya tsyelika, nge kele Nzambi yina ke zolaka ve yimbi.

Na sika ya nge, yimbi kele ve.

6 Bantu ya lunangu lenda talana ve na ntadisi ya nge.

Nge ke yinaka bayina nyonso ke salaka yimbi.

7 Yave, nge ke kufwaka bantu ya luvunu.

Bayina ke kufwaka bantu, bayina ke vunaka,

nge Yave, nge ke talaka bawu nganzi.

8 Kasi munu, na kukwikama ya nge ya nene-nene, mu ke kotaka na Yinzo ya nge.

Samu na kuzitisa nge, mu ke yinamaka na Yinzo ya nge ya longo.

9 Yave twadisa munu na ludedomo ya nge, samu na bambeni ya munu.

Sungika nzila ya nge na mantwala ya munu.

10 Ya tsyelika, ata dyambu ya butsyelika ke basikaka na bayinwa ya bawu.

Bawu ke banzaka kaka na kumwangisa.

Bayinwa ya bawu kele mutindu bandyamu ya kufunguka,

bikoba ya bawu ke basisaka kaka mambu ya luvunu.

11 Nzambi, futisa bawu yimbi ya bawu.

Bika ti mabanza ya bawu kubwisa bawu.

Losa bawu samu na yimbi ya bawu ya mingi-mingi,

samu ti bawu me balukila nge.

12 Na yina, bayina nyonso ke kuzwaka kiswamunu na sika ya nge ke yangalala.

Bantangu nyonso ya luzingu ya bawu, bawu ke vwanda na kyese.

Nge ke keba bawu,

nge ke vwanda kyese ya bayina ke zolaka Nkumbu ya nge.

13 Nge Yave, nge ke sakumunaka muntu ya kudedama.

Nge ke zungaka yandi na mambu ya mbote, mutindu kinwanunu ya nene yina ke kebaka ntulu.